ភ្នំពេញ – ក្នុងពិធីប្រគល់សញ្ញាបត្រដល់និស្សិតពេទ្យបញ្ចប់ការសិក្សាពីសាកលវិទ្យាល័យវិទ្យាសាស្ត្រសុខាភិបាលចំនួន ១,៣៩៦នាក់ ដែលធ្វើឡើងនៅសណ្ឋាគារសុខាភ្នំពេញ រាជធានីភ្នំពេញ នាព្រឹកថ្ងៃទី១៨ ខែឧសភា ឆ្នាំ២០២៣ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា មានប្រសាសន៍ លើកទឹកចិត្តនិស្សិតពេទ្យទោះជាពិការផ្នែកកាយសម្បទារប៉ុន្តែមិនពិការចិត្តនោះទេ គឺមិនត្រឹមតែយើងមិនពិការចិត្ត ថែមទាំងមានចំណេះដឹងថែមទៀតផង។

សម្តេចតេជោ ហ៊ុន សែន បញ្ជាក់បន្ថែមថា ដើម្បីអបអរដល់និស្សិតពេទ្យដែលមានពិការភាពចំនួន ៤នាក់នេះ ក្នុងនោះបុរស២នាក់ ស្រី២នាក់ បានខិតខំប្រឹងប្រែង តស៊ូរៀនសូត្ររហូតបានបញ្ចប់ការសិក្សានៅសាកលវិទ្យាល័យវិទ្យាសាស្ត្រសុខាភិបាលដោយជោគជ័យ សម្តេចតេជោបានបន្ថែមជូនថវិកាក្នុងម្នាក់ចំនួន១លានរៀល។

សម្តេចតេជោ ហ៊ុន សែន ក៏បានអបអរសាទរចំពោះសាកលវិទ្យាល័យវិទ្យាសាស្រ្តសុខាភិបាល និងអបអរសាទរចំពោះនិស្សិតទទួលបានជ័យលាភីទទួលបានសញ្ញាបត្រនៅថ្ងៃនេះ។ សម្តេចតេជោ ហ៊ុន សែន សង្ឃឹមថា គណៈគ្រប់គ្រងសាកលវិទ្យាល័យវិទ្យាសាស្រ្តសុខាភិបាលនឹងបន្តគ្រប់គ្រងឱ្យបានល្អជាមួយក្រុមប្រឹក្សាភិបាលដែលនឹងធ្វើឱ្យសាលានេះក្លាយទៅជាសាលាមូលដ្ឋានសម្រាប់វិស័យសុខាភិបាល។

ជាមួយគ្នានេះ លោក សម្បត្តិ បុរី ជានិស្សិតបញ្ចប់សញ្ញាបត្រថ្នាក់បរិយាបត្ររងផ្នែកមន្ទីរពិសោធន៍ ពីសាកលវិទ្យាល័យវិទ្យាសាស្ត្រសុខាភិបាល និងមានពិការភាពដើរពុំរួចតាំងពីកំណើត បាននិយាយថា កើតមកមិនមានកាយសម្បទារគ្រប់គ្រាន់ដូចមនុស្សដទៃទៀតពិតជាជួបការលំបាកច្រើន ប៉ុន្តែទោះជាបែបនេះក្ដីក៏លោកមិនចុះចាញ់ និងខិតខំធ្វើយ៉ាងណាឱ្យអាចមើលថែខ្លួនឯងបានព្រោះឪពុកម្ដាយមិនអាចមើលថែយើងរហូតបានទេ។

លោក សម្បត្តិ បុរី បញ្ជាក់បន្ថែមថា បច្ចុប្បន្នលោកបម្រើការងារនៅក្នុងមន្ទីរពេទ្យមិត្តភាពកម្ពុជា-ចិន ត្បូងឃ្មុំ។ លោកបន្តថា ការធ្វើការងារផ្នែកនេះ បើគិតថាលំបាកគឺពិតជាលំបាកក្នុងនាមលោកជាជនមានពិការភាព ប៉ុន្តែលោកខំប្រឹងសម្របខ្លួនរហូតធ្វើការងារនេះបាន។

លោក សម្បត្តិ បុរី

“ខ្ញុំសូមអរគុណសម្ដេចដែលបានគិតគូរដល់ជនមានពិការភាព ផ្ដល់ឱកាសក្នុងការសិក្សា និងវិស័យការងារមានអទិភាពច្រើន”

លោក សម្បត្តិ បុរី ក៏បានលើកទឹកចិត្តដល់បងៗជាជនមានពិការភាពទាំងអស់ សូមកុំគិតថាខ្លួនយើងពិការមិនអាចធ្វើអ្វីបាន សំខាន់លើទឹកចិត្តជំនះលើឧបសគ្គទាំងអស់។ ទន្ទឹមគ្នានេះ យើងត្រូវគិតថាបើយើងពិការហើយ យើងទោរទន់ទៅតាមពិការភាពរបស់យើងទៀតគឺពិបាក។ បើយើងគិតថាថ្ងៃនេះយើងពិបាកប៉ុណ្ណឹង យើងមិនខិតខំជំនះទេ នោះថ្ងៃក្រោយយើងនឹងពិបាកជាងពេលនេះទៀតនៅពេលយើងចាស់ទៅ។ 

គួរជម្រាបជូនថា និស្សិតពេទ្យដែលបញ្ចប់ការសិក្សាពីសាកលវិទ្យាល័យវិទ្យាសាស្ត្រសុខាភិបាលចំនួន ១,៣៩៦នាក់ ក្នុងម្នាក់ទទួលបានថវិកា ៥ម៉ឺនរៀល។ សាស្រ្តាចារ្យ និងបុគ្គលិកចំនួន ២៣៨៤នាក់ ក្នុងម្នាក់ៗទទួលបានថវិកា ១០ម៉ឺនរៀល។ សាកលវិទ្យាល័យវិទ្យាសាស្រ្តសុខាភិបាលទទួលបានថវិកា ១០លានរៀល និងជូនក្រុមគ្រូពេទ្រប្រចាំការក្នុងអង្គពិធីចំនួន ៣លានរៀល៕