ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – ការវិនិយោគនៅឆ្នាំដំបូងនៃជីវិតរបស់កុមារបានចាត់ទុកជាការវិនិយោគដ៏ឆ្លាតវៃបំផុត ដែលផ្តល់ផលប្រយោជន៍យ៉ាងធំធេងដល់ការរីកម្រើនកោសិកាខួរក្បាលរបស់កុមារតូច សមត្ថភាពការសិក្សា សុខភាព អកប្បកិរិយា និងផ្តល់ឱកាសជោគជ័យពេញមួយជីវិតរបស់ពួកគេ ដែលទាំងនេះយើងអាចធ្វើបានតាមរយៈកិច្ច គាំទ្របែបពហុវិស័យ។ នេះជាការលើកឡើងរបស់ ឯកឧត្តម ប្រាក់ កុសល ប្រធាននាយកដ្ឋានអប់រំកុមារតូច នៃក្រសួងអប់រំ យុវជន និងកីឡា ។
នៅក្នុងសន្និបាតបូកសរុបការងារអប់រំ យុវជន និងកីឡាឆ្នាំសិក្សា ២០២១-២០២២ និងទិសដៅបន្តក្រោមប្រធានបទ “បរិវត្តកម្មនៃវិស័យអប់រំ” ឯកឧត្តម ប្រាក់ កុសល ប្រធាននាយកដ្ឋានអប់រំកុមារតូច មានប្រសាសន៍ថា ការវិនិយោគនៅឆ្នាំដំបូងនៃជីវិតរបស់កុមារបានចាត់ទុកជាការវិនិយោគដ៏ឆ្លាតវៃបំផុត ដែលម្តាយឪពុក និងអ្នកអាណាព្យាបាលគ្រប់រូប និងអ្នកពាក់ព័ន្ធត្រូវយកចិត្តទុកដាក់ ។
ឯកឧត្តម ប្រាក់ កុសល ប្រធាននាយកដ្ឋានអប់រំកុមារតូច បានលើកឡើងបន្តថា ការស្រាវជ្រាវវេជ្ជសាស្ត្របង្ហាញថា កុមារអភិវឌ្ឍប្រព័ន្ធប្រសាទយ៉ាងឆាប់រហ័សបំផុតក្នុងរយៈពេល ១០០០ថ្ងៃដំបូងនៃជីវិត ។ ចាប់ពីថ្ងៃកកំណើតរហូតដល់អាយុក្រោម ៣ឆ្នាំ គឺជាអំឡុងពេលដែលមាតាបិតាត្រូវផ្ដល់អាហារូបត្ថម្ភឱ្យបានគ្រប់គ្រាន់ ដើម្បីឱ្យកោសិកាខួរក្បាលមានការលូតលាស់បានល្អ ។ ដំណាក់កាលដំបូងនេះ កោសិកាខួរក្បាលកុមារមានការលូតលាស់យ៉ាងលឿនរហូតដល់ ៧០% ។
ឯកឧត្តម ប្រាក់ កុសល មានប្រសាសន៍បញ្ជាក់បន្ថែមថា ៖
“កុមារអាយុ ៣ឆ្នាំ កោសិកាខួរក្បាលមានការរីកចម្រើនរហូតដល់ ៨០% នៃខួរក្បាលរបស់មនុស្សធំ និងរហូតដល់ ៩០% នៅអាយុ ៥ ឆ្នាំ ដែលជាកត្តាកំណត់ដល់ការអភិវឌ្ឍពុទ្ធិបញ្ញា និងការបណ្តុះបំណិនផ្សេងទៀត ដូចជា បំណិនសង្គម ភាពក្លាហាន ភាពអំណត់ បំណិនទំនាក់ទំនងជាដើម ដែលដើរតួនាទីយ៉ាងសំខាន់សម្រាប់ការធានាជោគជ័យក្នុងជីវិតរបស់កុមារ។”
ទន្ទឹមនឹងភាពប្រសើរឡើងតាមរយៈរូបភាពវិនិយោគលើកុមារតូចនេះ មានកត្តាមួយចំនួនដែលរាំងស្ទះដល់ការអភិវឌ្ឍន៍សមត្ថភាពកុមារ នោះគឺការប្រែប្រួលអាកាសធាតុ ។ អ្នកជំនាញកុមារតូចរូបនេះបានឱ្យដឹងបន្តថា បច្ចុប្បន្នបម្រែបម្រួលអាសធាតុជាវិបត្តិមួយដែលនាំឱ្យប៉ះពាល់ដល់សិទ្ធិរបស់កុមារ ដូចជា ជាតិពុលក្នុងបរិយាកាសបានប៉ះពាល់យ៉ាងធ្ងន់ធ្ងរដល់សុខភាព និងការអភិវឌ្ឍកោសិកាខួរក្បាលរបស់កុមារ ដែលទាមទារត្រូវមានវិធានការ និងសកម្មភាពទប់ស្កាត់វិបត្តិនេះជាបន្ទាន់តាមរយៈកិច្ចអន្តរាគមន៍បែបពហុវិស័យ ដើម្បីកាត់បន្ថយនូវផលប៉ះពាល់ទៅលើការអភិវឌ្ឍកុមារតូច ។
សូមជម្រាបថា គោលនយោយជាតិស្តីពីការគាំពារ និងអភិវឌ្ឍកុមារតូច បានកំណត់ចក្ខុវិស័យកុមារតូចទាំងអស់ចាប់ពីកកំណើតរហូតដល់អាយុក្រោម ៦ឆ្នាំ ត្រូវទទួលបានសេវាគាំពារ និងអភិវឌ្ឍ ជាពិសេសកុមារតូចរងគ្រោះ កុមារតូចងាយរងគ្រោះ និងក្រខ្សត់ ស្របតាមរដ្ឋធម្មនុញ្ញនៃព្រះរាជាណាចក្រកម្ពុជា ។ ការយកចិត្តទុកដាក់ និងអន្តរាគមន៍ទាន់ពេលវេលាដល់កុមារក្នុងវ័យដំបូងតាមរយៈកម្មវិធីគាំពារ និងអភិវឌ្ឍកុមារតូច បានកាត់បន្ថយចរិតមជ្ឈត្តនិយម (egocentrism) របស់កុមារ ដូចជា (១) ខ្លួនឯងជាមនុស្សសំខាន់ជាងគេ (២) អ្វីៗទាំងអស់ជារបស់ខ្លួន (៣) អ្នកដែលនៅជុំវិញខ្លួនត្រូវតែយកចិត្តទុកដាក់ទៅលើខ្លួន (៤) មិនយកចិត្តទុកដាក់ ឬផ្តល់តម្លៃដល់អ្នកដទៃ (៥) មិនសូវស្តាប់បង្គាប់និងរឹងរូសជាដើម ៕
