ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
អ្នកជំនាញ វិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា បានក្លាយជាកម្លាំងចលករដ៏សំខាន់ក្នុងការអភិវឌ្ឍសេដ្ឋកិច្ចក្នុងយុគសម័យបច្ចុប្បន្ន។ ដោយមើលឃើញពីភាពចាំបាច់នេះ ប្រទេសទូទាំងសកលលោកកំពុងជំរុញការផលិតធនធានមនុស្សលើវិស័យនេះឱ្យបានច្រើនតាមដែលអាចធ្វើទៅបាន តាមរយៈជំរុញឱ្យសិស្សចុះឈ្មោះចូលរៀនជំនាញ STEM ឱ្យបានច្រើនដើម្បីឆ្លើយតបនឹងតម្រូវការ ។
បើយោងតាមទិន្នន័យដែលប្រមូលបានដោយវិទ្យាស្ថានស្ថិតិអង្គការយូណេស្កូបានបង្ហាញថា និស្សិតថ្នាក់ឧត្តមសិក្សានៅប្រទេសម៉ាឡេស៊ី និងទុយនេស៊ី មានភាគរយបញ្ចប់ការសិក្សាលើជំនាញ STEM ច្រើនជាងគេក្នុងពិភពលោក ដោយយ៉ាងហោចណាស់មានភាគរយនិស្សិតចន្លោះពី ៤៣,៥% ទៅ ៤០% បានទទួលសញ្ញាបត្រលើជំនាញនេះ ដែលជាភាគរយមួយដ៏ខ្ពស់បំផុត ក្នុងចំណោមប្រទេសកំពុងលើកម្ពស់ការអប់រំលើជំនាញ STEM ដទៃទៀត។ ទន្ទឹមនឹងនេះ ឥណ្ឌា គឺជាប្រទេសដែលផលិតធនធានមនុស្សផ្នែក STEM បានច្រើនបំផុតក្នុងពិភពលោក ដោយមានភាគរយនិស្សិតចូលរៀនរហូតដល់ ៣៤% នៃចំនួនប្រជាជនរហូតដល់ ១,៤០០លាននាក់។
យ៉ាងណាមិញ យូណេស្កូមិនបានបង្ហាញទិន្នន័យរបស់ប្រទេសចិននោះទេ។ ខណៈក្នុងឆ្នាំ ២០១៦ WE Forum បានឱ្យដឹងថា ប្រទេសនេះបានផលិតនិស្សិតបញ្ចប់ការសិក្សាលើជំនាញ STEM ចំនួន ៤,៧លាននាក់ ដែលមានចំនួនច្រើនជាងឥណ្ឌានាពេលនោះ។ បើយោងតាមស្ថាប័នមូលនិធិវិទ្យាសាស្ត្រជាតិ របស់អាមេរិក បានឱ្យដឹងថា ប្រទេសចិនបានចាត់ទុកការបណ្ដុះបណ្ដាលជំនាញវិស្វកម្ម និងវិទ្យាសាស្ត្រជាជំនាញអាទិភាព។ បើទោះជាមិនមានទិន្នន័យជាក់លាក់អំពីចំនួនអ្នកសិក្សា ប៉ុន្តែគេបានដឹងថា និស្សិតចិនចំនួន ១,៦លាននាក់បានបញ្ចប់ការសិក្សាលើជំនាញទាំងពីរក្នុងឆ្នាំ ២០១៤។
ជាមួយគ្នានេះ ប្រទេសអារ៉ាប់រួម អាល្លឺម៉ង់ បេឡារុស្ស និងកូរ៉េខាងត្បូង សុទ្ធតែជាប្រទេសដែលបានផលិតនិស្សិតបញ្ចប់ការសិក្សាជំនាញ STEM ច្រើនជាង ៣០ភាគរយនៃចំនួននិស្សិតសរុប ។ ខណៈបច្ចុប្បន្ន គេសង្កេតឃើញប្រទេសដែលមាននិស្សិតរៀនជំនាញ STEM ច្រើនជាងគេ ភាគច្រើនស្ថិតនៅតំបន់អារ៉ាប់ អឺរ៉ុបខាងកើត និងអាស៊ីបូព៌ា។ ចំណែក សហរដ្ឋអាមេរិកមានចំនួននិស្សិតដែលចូលរៀនក្នុងជំនាញនេះ ប្រមាណត្រឹមតែ ១៩,៦% ប៉ុណ្ណោះ ដែលស្ថិតក្នុងចំណាត់ថ្នាក់ទី៩លើពិភពលោក ក្នុងនាមជាប្រទេសមានអ្នកសិក្សាជំនាញ STEM ច្រើនជាងគេ។
គួរជម្រាបជូនផងដែរថា STEM គឺជាជំនាញដ៏សំខាន់បំផុតសម្រាប់ការជំរុញឱ្យមានការអភិវឌ្ឍសេដ្ឋកិច្ចជាតិបានឆាប់រហ័ស តាមរយៈការផលិតធនធានមនុស្សដែលមានជំនាញបច្ចេកទេសច្បាស់លាស់ ឱ្យបំពេញការងារនៅក្នុងវិស័យឧស្សាហកម្ម បច្ចេកវិទ្យា ផលិតកម្ម និងវិស្វកម្មជាដើម។ ប្រសិនបើប្រទេសមួយមានធនធានមនុស្សលើជំនាញនេះច្រើន សង្គមរបស់គេក៏មានសក្ដានុពលខ្ពស់ក្នុងការអភិវឌ្ឍ និងពង្រឹងវិស័យសេដ្ឋកិច្ចរបស់ខ្លួនឱ្យបានខ្លាំងក្លាយ៕
ប្រភព៖ https://www.weforum.org/agenda/2023/03/which-countries-students-are-getting-most-involved-in-stem/
