ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
សហភាពអឺរ៉ុបបានប្រកាសថា នឹងផ្តល់ជំនួយជាទឹកប្រាក់ចំនួន ៧០ ម៉ឺនអឺរ៉ូ ឬប្រមាណ ៨១៦,០០០ ដុល្លារសហរដ្ឋអាមេរិក ដើម្បីគាំទ្រដល់ជំនួយមនុស្សធម៌ជាបន្ទាន់មួយជូនចំពោះជនភៀសសឹកដែលទទួលរងផលប៉ពាល់ដោយសារការកើនឡើងនៃជម្លោះប្រដាប់អាវុធតាមបណ្តោយព្រំដែនកម្ពុជា-ថៃ។
បើតាមសេចក្តីប្រកាសព័ត៌មានរបស់សហភាពអឺរ៉ុប ជំនួយមនុស្សធម៌នេះ នឹងត្រូវបានប្រើប្រាស់ដើម្បីជួយគាំទ្រសហគមន៍នានាដែលរងផលប៉ះពាល់ខ្លាំងបំផុតដោយសារជម្លោះដែលបានបណ្តាលឱ្យមានការជម្លៀសខ្លួន និងផ្លាស់ទីលំនៅ។ អាទិភាពបន្ទាន់នៃជំនួយរបស់សហភាពអឺរ៉ុបនឹងផ្ដោតលើការឧត្ថម្ភថវិកាសម្រាប់ពហុបំណង ការគាំទ្រផ្នែកស្មារតីនិងសុខភាពផ្លូវចិត្ត ព្រមទាំងការអង្កេតតាមដានការផ្លាស់ទីលំនៅសំរាប់រយៈពេល៦ខែ។
សម្រាប់ជំនួយមនុស្សធម៌របស់សហភាពអឺរ៉ុបនេះ ឯកឧត្តម នង សាកល អនុរដ្ឋលេខាធិការក្រសួងការបរទេសកម្ពុជា តាមរយៈសេចក្តីថ្លែងព័ត៌មានប្រចាំថ្ងៃ បានសម្តែងអំណរគុណយ៉ាងជ្រាលជ្រៅចំពោះជំនួយទាន់ពេលវេលារបស់សហភាពអឺរ៉ុបនេះ ដោយថា សហភាពអឺរ៉ុបជាដៃគូអភិវឌ្ឍដ៏សំខាន់មួយរបស់កម្ពុជា និងជាដៃគូយុទ្ធសាស្រ្តរបស់អាស៊ានផងដែរ
បើតាម ឯកឧត្តម នង សាកល ជំនួយមនុស្សធម៌របស់សហភាពអឺរ៉ុបចំពោះជនភៀសសឹកនៅពេលនេះ នឹងអនុវត្តតាមរយៈអង្គការ IOM។
សូមបញ្ជាក់ដែរថា កន្លងមកប្រទេសកម្ពុជា ក៏បានទទួលវិភាគទានមនុស្សធម៌ពីប្រទេសជាមិត្តនានា ដូចជាប្រទេសចិន តាមរយៈស្ថានទូតចិននៅភ្នំពេញ, ពីរាជរដ្ឋាភិបាលជប៉ុន តាមរយៈស្ថានទូតជប៉ុននៅភ្នំពេញ និងសហភាពអឺរ៉ុបនៅពេលនេះ៕
