ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
រាជធានីភ្នំពេញ — កាលពីសប្តាហ៍កន្លងទៅនេះ ក្រសួងសុខាភិបាលកម្ពុជា បានប្រកាសដាក់ឱ្យប្រើប្រាស់ “កម្មវិធីផ្ដល់ប្រឹក្សាឌីជីថលស្ដីពីអាហារូបត្ថម្ភ” ដែលគេជឿថា នឹងជួយជំរុញការយល់ដឹងអំពីបរិយាកាសសុវត្ថិភាពចំពោះមាតា និងទារក។
លោកជំទាវវេជ្ជបណ្ឌិត ប្រាក់ សោភ័ណនារី រដ្ឋលេខាធិការក្រសួងសុខាភិបាល មានប្រសាសន៍ថា កម្មវិធីផ្តល់ប្រឹក្សាឌីជីថលស្តីពីអាហារូបត្ថម្ភ គឺជាកម្មវិធីទំនើបសម្រាប់គាំទ្រការប្រឹក្សាអាហារូបត្ថម្ភ ដើម្បីត្រួតពិនិត្យការលូតលាស់ដោយអ្នកជំនាញសុខភាព និងផ្តល់នូវការយល់ដឹងកាន់តែច្បាស់អំពីបរិយាកាសសុវត្ថិភាពចំពោះមាតា និងទារក។
បើតាមការលើកឡើងរបស់លោកជំទាវវេជ្ជបណ្ឌិត ប្រាក់ សោភ័ណនារី ខេត្តកំពង់ធំ បានក្លាយជាខេត្តទី១ ដែលក្រសួងសុខាភិបាល ជ្រើសរើសយកជាទីតាំងអនុវត្តកម្មវិធីឌីជីថលនេះដំបូងគេ និងមានមណ្ឌលសុខភាពមួយចំនួនទៀតនៅក្នុងខេត្តកំពតផងដែរ។
រដ្ឋលេខាធិការក្រសួងសុខាភិបាល ក៏បានក្រើនរំលឹកឱ្យបុគ្គលិកសុខាភិបាលគប្បីយកចិត្តទុកដាក់ខ្ពស់ក្នុងការអនុវត្តនូវកម្មវិធីថ្មីនេះ ដើម្បីបង្កើនភាពងាយស្រួលដល់ប្រជាពលរដ្ឋ ពិសេសគឺស្រី្តជាមាតា និងទារក ដែលអញ្ជើញមកប្រឹក្សាយោបល់នៅមណ្ឌលសុខភាព។
ជាមួយគ្នានេះ លោក Jose Kadel ឯកអគ្គរដ្ឋទូតស្តីទីសាធារណរដ្ឋសហព័ន្ធអាល្លឺម៉ង់ មានប្រសាសន៍ថា អាល្លឺម៉ង់មានមោទនភាពចំពោះកម្ពុជា ក្នុងការបង្កើតកម្មវិធីផ្តល់ប្រឹក្សាជាលក្ខណៈឌីជីថលបែបនេះ ដែលកម្មវិធីនេះនឹងផ្តល់នូវអត្ថប្រយោជន៍យ៉ាងសម្បូរបែបដល់ប្រជាពលរដ្ឋ ពិសេសគឺស្រ្តីជាមាតា និងកុមារ ដែលមកពិនិត្យព្យាបាល និងប្រឹក្សាយោបល់នៅមណ្ឌលសុខភាព។
ឯកអគ្គរដ្ឋទូតស្តីទីសាធារណរដ្ឋសហព័ន្ធអាល្លឺម៉ង់ បញ្ជាក់ថា អាល្លឺម៉ង់ នឹងបន្តគាំទ្រចំពោះកិច្ចការងារសុខាភិបាលជាមួយកម្ពុជា ដើម្បីលើកកម្ពស់សុខមាលភាពរបស់ប្រជាពលរដ្ឋកម្ពុជាទូទាំងប្រទេស។
គួរជំរាបជូនថា ក្រោមគំនិតផ្តួចផ្តើមរបស់ក្រសួងសុខាភិបាល, មជ្ឈមណ្ឌលជាតិគាំពារមាតា និងទារក ដោយមានការឧបត្ថម្ភគាំទ្រពីគម្រោងពហុវិស័យ សន្តិសុខស្បៀង និងអាហារូបត្ថម្ភ (GIZ Musefo) «កម្មវិធីផ្តល់ប្រឹក្សាឌីជីថលស្តីពីអាហារូបត្ថម្ភ» ត្រូវបានបង្កើតឡើង ក្នុងគោលបំណងដើម្បីផ្តល់នូវធាតុចូល និងចំណេះដឹងអំពីរបបអាហារដែលមានសុខភាពល្អសម្រាប់ស្ត្រីមានផ្ទៃពោះ និងបំបៅដោះកូន និងកុមារអាយុក្រោម ២ ឆ្នាំ ដើម្បីបង្កើតឥទ្ធិពលវិជ្ជមានលើអាកប្បកិរិយា និងការអនុវត្តរបស់គ្រួសារឆ្ពោះទៅរករបបអាហារមានតុល្យភាព, បង្កើត និងលើកកម្ពស់គុណភាពនៃការប្រឹក្សាសេវាអាហារូបត្ថម្ភរបស់បុគ្គលិកសុខាភិបាល៕
