ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
អ្នកប្រាជ្ញជិត ៣០០នាក់ ដែលបច្ចុប្បន្ន កំពុងធ្វើការនៅសហរដ្ឋអាម៉េរិក បានដាក់ពាក្យស្នើសុំការងារនៅសាកលវិទ្យាល័យ Aix-Marseille ក្នុងប្រទេសបារាំង ដែលបានប្រកាសពីកម្មវិធីផ្ដល់ជម្រកដល់អ្នកស្រាវជ្រាវ ដែលរងផលប៉ះពាល់ ដោយសារគោលនយោបាយរបស់រដ្ឋបាល លោក ដូណាល់ត្រាំ។
សាកលវិទ្យាល័យ Aix-Marseille បានចាប់ផ្ដើមគំនិតផ្ដួចផ្ដើម «កន្លែងសុវត្ថិភាពសម្រាប់អ្នកវិទ្យាសាស្ត្រ-Safe Place for Science» នៅដើមឆ្នាំនេះ ដោយផ្ដល់មូលនិធិទ្រទ្រង់រយៈពេល ៣ឆ្នាំ សម្រាប់អ្នកស្រាវជ្រាវប្រហែល ២០នាក់។ កម្មវិធីនេះ មានគោលបំណងគាំទ្រ អ្នកប្រាជ្ញ ដែលប្រឈមនឹងការកាត់បន្ថយថវិកាគាំទ្រសម្រាប់ការស្រាវជ្រាវ និងការផ្លាស់ប្ដូរគោលនយោបាយ ដែលបានរំខានដល់ស្ថាប័នសិក្សាស្រាវជ្រាវក្នុងសហរដ្ឋអាម៉េរិក។
សាកលវិទ្យាល័យនេះ បានប្រកាសនៅលើគេហទំព័រផ្ទាល់ខ្លួនរបស់គេថា «នៅពេលដែលសេរីភាពនៃការសិក្សាស្រាវជ្រាវ ស្ថិតនៅក្នុងស្ថានភាពមិនប្រាកដប្រជា សាកលវិទ្យាល័យ Aix-Marseille កំពុងចាប់ផ្ដើមកម្មវិធី កន្លែងសុវត្ថិភាពសម្រាប់អ្នកវិទ្យាសាស្ត្រ-Safe Place for Science ដោយផ្ដល់នូវបរិយាកាសសុវត្ថិភាព និងការលើកទឹកចិត្តដល់អ្នកវិទ្យាសាស្ត្រ ដែលមានបំណងចង់បន្តការស្រាវជ្រាវរបស់ពួកគេ ជាមួយនឹងសេរីភាពពេញលេញ។»
ក្នុងរយៈពេលមួយខែ កម្មវិធីនេះបានទាក់ទាញការដាក់ពាក្យពីសំណាក់អ្នកស្រាវជ្រាវចំនួន ២៩៨នាក់ ដែលក្នុងនោះមាន ២៤២នាក់មានលក្ខណៈសម្បត្តិគ្រប់គ្រាន់ ហើយបេក្ខជនទាំងអស់សុទ្ធសឹងតែមកមកពីគ្រឹះស្ថានអប់រំល្បីៗរបស់អាម៉េរិកដូចជា Yale, Columbia, Stanford, Johns Hopkins និង NASA ជាដើម។
ក្នុងចំណោមអ្នកដែលមានសិទ្ធិទាំងនោះមាន ១៣៥នាក់ ជាពលរដ្ឋអាម៉េរិក, ៤៥នាក់ មានសញ្ជាតិពីរ, ១៧នាក់ មានសញ្ជាតិបារាំង និងមានប្រទេសផ្សេងទៀត ៤៥នាក់, នេះបើយោងតាមសេចក្ដថ្លែងការណ៍ ដែលចេញផ្សាយដោយ Aix-Marseille នៅថ្ងៃទី១៧ មេសាកន្លងទៅ។
លោក Eric Berton នាយកសាកលវិទ្យាល័យ Aix-Marseille បានលើកឡើងថា សំណើរស្នើសុំជាច្រើនបានដាក់មកសាកលវិទ្យាល័យ ដែលជារឿយៗអមដោយគណនី ដែលលើកឡើងពីការជ្រៀតជ្រែកផ្នែកនយោបាយ និងការគាបសង្កត់ក្រោមការគ្រប់គ្រងរបស់ រដ្ឋបាលលោកត្រាំ។
ខ្ញុំមានសេចក្ដីសោមនស្សរីករាយ ដែលសំណើរនេះបង្ហាញស្ថានភាពនៃជនភៀសខ្លួនវិទ្យាសាស្ត្រ ដែលបានទទួលការយកចិត្តទុកដាក់ទាំងប្រព័ន្ធផ្សព្វផ្សាយ និងនយោបាយ ហើយក្លាយជាកម្មវត្ថុនៃច្បាប់ដែលបានស្នើឡើង។ យើងជឿជាក់ថា នៅសាកលវិទ្យាល័យ Aix-Marseille ការប្រមូលផ្ដុំដើម្បីឆ្លើយតបទៅនឹងបញ្ហាប្រឈមសម្រាប់ការស្រាវជ្រាវវិទ្យាសាស្ត្រ ត្រូវតែធ្វើឡើងដោយមានការសហការណ៍ទាំងនៅក្នុងប្រទេសបារាំង និងអឺរ៉ុប។
បេក្ខជន ដែលបានដាក់ពាក្យនេះ មកពីវិស័យជាច្រើន រួមមាន វិស័យសង្គមសាស្ត្រ វិទ្យាសាស្ត្រជីវិត និងវិទ្យាសាស្ត្របរិស្ថាន។ គណៈកម្មាធិការជ្រើសរើសបានជួបប្រជុំគ្នានៅថ្ងៃទី២៣ ខែមេសា ដើម្បីកំណត់បេក្ខជនពី ៣០ ទៅ៤០នាក់ សម្រាប់ការសម្ភាសន៍ពីចម្ងាយនៅខែឧសភា។ សាកលវិទ្យាល័យ Aix-Marseille គ្រោងនឹងស្វាគមន៍ អ្នកប្រាជ្ញប្រហែល ២០នាក់ ដែលជាក្រុមទី១ នឹងមកដល់នៅដើមខែមិថុនា។
បច្ចុប្បន្ន ក្រៅពីប្រទេសបារាំង ប្រទេសអាល្លឺម៉ង់ និងអេស្ប៉ាញ ក៏ស្ថិតក្នុងចំណោមប្រទេស ដែលជំរុញឱ្យមានគណៈកម្មការអឺរ៉ុប ដើម្បីទាក់ទាញ អ្នកមានទេពកោសល្យកំពូលៗពីសហរដ្ឋអាម៉េរិក។ កាលពីខែមីនា យ៉ាងហោចណាស់ ប្រទេសក្នុងទ្វីបអឺរ៉ុបចំនួន ១៣ បានចុះហត្ថលេខាលើលិខិតអំពាវនាវឱ្យចាត់វិធានការឱ្យបានឆាប់រហ័សលើកិច្ចការនេះ។
ទីភ្នាក់ងារព័ត៌មាន Reuters បានរាយការណ៍កាលពីថ្ងៃទី១២ ខែមេសា ថា ក្រុមប្រឹក្សាស្រាវជ្រាវអឺរ៉ុបបានប្រកាសពីផែនការបង្កើនថវិកាសម្រាប់ការផ្លាស់ប្តូរទីតាំងរបស់ក្រុមអ្នកប្រាជ្ញទ្វេដង ដើម្បីទទួលអ្នកស្រាវជ្រាវដែលមានបំណងផ្លាស់ទៅសហភាពអឺរ៉ុប៕
