ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
“ការរៀនឥឡូវនេះ គឺខុសគ្នាខ្លាំងពីពេលដែលខ្ញុំនៅរៀនបឋមសិក្សា។ កាលនោះ មិនមានការបង្រៀនអន្តរកម្ម ឬសកម្មភាពក្នុងថ្នាក់ទេ ហើយខ្ញុំតែងតែចង់ក្លាយជាគ្រូដើម្បីកែលម្អការអប់រំសម្រាប់ចែករំលែកជាមួយសិស្ស”។ នេះជាការរំលឹកឡើងរបស់អ្នកគ្រូ ហ៊ាង ធារី ដែលបច្ចុប្បន្នជាគ្រូបង្រៀនថ្នាក់ទី១ នៃសាលាបឋមសិក្សាព្រៃទទឹង ខេត្តកំពង់ចាម។
អ្នកគ្រូ ហ៊ាង ធារី មានប្រសាសន៍ថា កុមារគឺប្រៀបបីដូចជាក្រដាសសមួយសន្លឹក។ ក្នុងនាមជាគ្រូបង្រៀនម្នាក់ អ្នកគ្រូបានអប់រំ និងបង្ហាត់បង្រៀនសិស្សឱ្យមានចំណេះដឹង និងធ្វើនូវទង្វើល្អៗ ដូច្នេះពេលសិស្សធំឡើងនឹងក្លាយទៅជាមនុស្សដែលមានសក្ដានុពលល្អ។
ជាមួយកញ្ចប់សម្ភារៈអំណានដំបូង ជាពិសេសជំនួយរៀនសូត្រ ដូចជា កាតរូបភាព ឃើញថា សិស្សនៅពេលនេះ បានចូលរួមច្រើនជាងមុន ហើយពួកគេរៀនសូត្របានលឿនជាងមុន ជាមួយនឹងវិធីសាស្ត្របង្រៀនដ៏មានប្រសិទ្ធភាព និងមាតិកាដែលពាក់ព័ន្ធនឹងបរិបទ និងជីវិតប្រចាំថ្ងៃរបស់ពួកគេ។ នេះជាការបញ្ជាក់របស់អ្នកគ្រូ ហ៊ាង ធារី។
តាមរយៈកម្មវិធីពង្រឹងការអប់រំគ្រូបង្រៀននៅកម្ពុជា (STEPCam) ដែលមានទឹកប្រាក់ចំនួន ១២,៦២ លានដុល្លារអាមេរិក ផ្តល់ហិរញ្ញប្បទានដោយភាពជាដៃគូសកលសម្រាប់ការអប់រំ អង្គការយូណេស្កូ និងក្រសួងអប់រំ យុវជន និងកីឡា កំពុងពង្រីកកម្មវិធីជាតិ ស្តីពីការបង្រៀន និងរៀនថ្នាក់ដំបូង ដែលគាំទ្រដល់គ្រូបង្រៀនដូចជា អ្នកគ្រូ ហ៊ាង ធារី នៅខេត្តកំពង់ចាម ដើម្បីកសាងបំណិនមូលដ្ឋានគ្រឹះរឹងមាំផ្នែកភាសាខ្មែរ និងគណិតវិទ្យាដល់កុមារ។
ដោយមានការគាំទ្រពីកម្មវិធី STEPCam អ្នកគ្រូធារី ទទួលបានចំណេះដឹងផ្នែកខ្លឹមសារ និងវិធីសាស្ត្របង្រៀនថ្មីៗ ពីវគ្គបណ្តុះបណ្តាល និងឯកសារណែនាំគ្រូបង្រៀនដ៏ពិស្តារ ដើម្បីឱ្យការបង្រៀនរបស់គាត់មានភាពរស់រវើក និងចូលរួមសកម្មពីសិស្ស។ ឥឡូវនេះ គាត់គឺជាទីប្រឹក្សាប្រចាំសាលារៀន ដើម្បីផ្តល់ការគាំទ្រវិជ្ជាជីវៈដល់គ្រូបង្រៀនដទៃទៀត។
អ្នកគ្រូ ហ៊ាង ធារី មានបទពិសោធន៍បង្រៀនរយៈពេល៥ឆ្នាំ។ ហើយបន្ទប់រៀនមានភាពរស់រវើក ជាមួយនឹងសំឡេងនៃការពិភាក្សា ការទះដៃ ការសើច បណ្ណរូបភាពជាឧបករណ៍សម្រាប់សិស្សមើលឃើញ លើកទឹកចិត្តសិស្សបង្កើតបរិយាកាសសិក្សាដែលមានអន្តរកម្ម និងរីករាយ។ សិស្សានុសិស្សក្នុងថ្នាក់ បានទទួលកញ្ចប់សៀវភៅជំនួយចម្រុះពណ៌ និងបណ្ណបង្ហាញ ដែលមានឧទាហរណ៍ប្រចាំថ្ងៃ ដើម្បីជួយសម្រួលដល់ការរៀនពាក្យ និងលេខជាភាសាខ្មែរ។
គួរបញ្ជាក់ជូនថា ក្រសួងអប់រំ យុវជន និងកីឡា រួមជាមួយអង្គការយូណេស្កូ បានអនុវត្តកម្មវិធីពង្រឹងការអប់រំគ្រូបង្រៀននៅកម្ពុជា (STEPCam) ចាប់តាំងពីឆ្នាំ២០១៨ ដើម្បីធានាថា គ្រូបង្រៀនមានសមត្ថភាព និងទទួលបានការគាំទ្រដែលចាំបាច់សម្រាប់ជួយសិស្សអភិវឌ្ឍបំណិនមូលដ្ឋានគ្រឹះដ៏រឹងមាំ និងអាចបន្តការសិក្សានៅកម្រិតថ្នាក់បន្តបន្ទាប់ទៀតប្រកបដោយជោគជ័យ។ ក្នុងនោះ ការអនុវត្តកម្មវិធី STEPCam ដំណាក់កាលទី១ ចាប់ពីឆ្នាំ២០១៨ ដល់ឆ្នាំ២០២២ ទទួលបានសមិទ្ធផលចម្បងគួរឱ្យកត់សម្គាល់ដូចជា អនុម័តក្របខណ្ឌ និងប្រព័ន្ធអភិវឌ្ឍវិជ្ជាជីវៈជាប្រចាំ, ការបណ្តុះបណ្តាលគ្រូបង្រៀននិងមន្រ្តីជំនាញអំពីកញ្ចប់អំណានថ្នាក់ដំបូងជាង ៤,០០០ នាក់ និងគណិតវិទ្យាថ្នាក់ដំបូងជាង ៣,០០០ នាក់ និង សាលាគរុកោសល្យខេត្តចំនួន១១ បានជួសជុលកែលម្អ និងបំពាក់សម្ភារបរិក្ខារ។
ដោយឡែកកម្មវិធីពង្រឹងការអប់រំគ្រូបង្រៀននៅកម្ពុជាដំណាក់កាលទី២ (STEPCam II) គឺផ្តើមកាលពីឆ្នាំ២០២៤ ដល់ឆ្នាំ២០២៦ ដោយផ្ដោតលើសមាសភាគ៤ រួមមាន ១) ការអប់រំគ្រូបង្រៀន, ២) ការអភិវឌ្ឍវិជ្ជាជីវៈជាប្រចាំសម្រាប់គ្រូបង្រៀន, ៣) ការបណ្តុះបណ្តាលកញ្ចប់អំណាន និងគណិតវិទ្យាថ្នាក់ដំបូង រួមទាំងការវាយតម្លៃ និងការពង្រីកប្រព័ន្ធកត់ត្រាទិន្នន័យសិស្ស និង ៤) បរិវត្តន៍កម្មឌីជីថលសម្រាប់ការអប់រំគ្រូបង្រៀន ដែលពិតជាមានសារៈសំខាន់ ដើម្បីបន្តគាំទ្រដល់ការអប់រំគ្រូបង្រៀន៕
