ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – ថាវ កិត្យានុគុណ ជាយុវជនស្ម័គ្រចិត្តមួយរូបក្នុងព្រឹត្តិការណ៍ នៃការប្រកួតកីឡាអាស៊ីអាគ្នេយ៍លើកទី៣២ ដែលកម្ពុជាធ្វើជាម្ចាស់ផ្ទះ ។ សម្រាប់ការងារស្ម័គ្រចិត្តនេះ អ្វីដែល នុគុណ រំពឹងទុក គឺចង់ឱ្យប្រទេសដទៃដែលមិនធ្លាប់ស្គាល់កម្ពុជា អាចយល់ដឹង និងទទួលស្គាល់កម្ពុជា។ យុវជនដែលកាន់តួនាទីជាអ្នករៀបចំកាលវិភាគសម្រាប់កីឡា រូបនេះបានបង្ហាញមូលហេតុដែលជំរុញឱ្យខ្លួនសម្រេចចិត្តមកធ្វើជាអ្នកស្ម័គ្រចិត្តនៅក្នុងព្រឹត្តិការណ៍ស៊ីហ្គេម ព្រោះនេះជាលើកដំបូង ដែលកម្ពុជាទទួលបានឱកាសធ្វើជាម្ចាស់ផ្ទះ ដោយចំណាយពេលរង់ចាំអស់ ៦៤ឆ្នាំ ។
យុវជន ថាវ កិត្យានុគុណ
“ក្នុងនាមខ្ញុំជាយុវជន និងជាកូនខ្មែរម្នាក់ ខ្ញុំពិតជាមានសេចក្ដីសោមនស្សរីករាយ ដែលកម្ពុជាមានឱកាស និងទទួលបានពេលវេលាដ៏សក្តិសម ដើម្បីប្រារព្ធព្រឹត្តិការណ៍ដ៏ធំមួយនេះ ក្រោយខកខានយ៉ាងយូរ ដោយសារបញ្ហានយោបាយ និងសេដ្ឋកិច្ច។”
នុគុណ បញ្ជាក់ថា រូបគេពិតជាមានកិត្តិយស ដែលបានក្លាយជាចំណែកមួយដើម្បីជួយកម្ពុជាក្នុងការធ្វើជាម្ចាស់ផ្ទះស៊ីហ្គេម។ ក្រៅពីនេះ គេក៏ទទួលបានបទពិសោធន៍លើការងារដែលគេបានធ្វើយ៉ាងច្រើនដូចគ្នា។ នុគុណ បន្តថា ចំពោះបទពិសោធន៍ដែលខ្លួនទទួលបានគឺមានច្រើន ជាពិសេសគឺយល់អំពីរបៀបធ្វើការងារ និងទំនាក់ទំនងជាក្រុម ទាំងជាមួយយុវជនខ្មែរ និងជាតិសាសន៍ដទៃ។ លើសពីនេះ ការធ្វើការជាអ្នកស្ម័គ្រចិត្តនៅស៊ីហ្គេម ធ្វើឱ្យ នុគុណ យល់ដឹងកាន់តែច្រើនអំពីការដឹកនាំ និងការបែងចែកពេលវេលា។
ជាចុងក្រោយ យុវជន ថាវ កិត្យានុគុណ បានសម្ដែងការថ្លែងអំណរគុណដល់ថ្នាក់ដឹកនាំ ដែលបានខិតខំប្រឹងប្រែង ក្នុងការអភិវឌ្ឍនកម្ពុជាឱ្យក្លាយជាប្រទេសមួយដែលមានលទ្ធភាពគ្រប់គ្រាន់ក្នុងការធ្វើជាម្ចាស់ផ្ទះស៊ីហ្គេមលើកទី៣២នេះ។ នេះគឺសញ្ញាមួយ ដែលបង្ហាញថាប្រទេសរបស់យើងកំពុងតែរីកចម្រើនយ៉ាងឆាប់រហ័ស ហេតុនេះសូមលោកបន្តថែរក្សាសន្តិភាព និងការរីកចម្រើននេះឱ្យបានជារៀងរហូត៕
