ភ្នំពេញ – សម្រាប់អ្នកម្តាយវ័យក្មេង ឬស្រ្តីមានកូនដំបូង ពាក្យថា “១០០០ថ្ងៃដំបូងរបស់កុមារ” ហាក់ដូចជារឿងថ្មីបន្តិច​ប៉ុន្តែវាជាមូលដ្ឋានចំណេះដឹងទូទៅដ៏សំខាន់​សម្រាប់​ស្ត្រីជាម្តាយ ។ អ្នកជំនាញសុខភាពកុមារបានបង្ហាញថា រយៈពេល ១០០០ថ្ងៃដំបូងជាពេលវេលាដែលជួយដល់ការលូតលាស់ និងអភិវឌ្ឍគ្រប់ជ្រុងជ្រោយ​របស់​កុមារតូច ។ ទន្ទឹមគ្នានេះ ការផ្តល់អាហាររូបត្ថម្ភឱ្យបានត្រឹមត្រូវក្នុងពេល ១០០០ថ្ងៃដំបូងនៃជីវិតរបស់កុមារមានអត្ថប្រយោជន៍ជាច្រើនសម្រាប់សុខភាព និង​អនាគត​របស់ពួកគេ ។

ក្រសួងអប់រំ យុវជន និងកីឡា បានបង្ហាញពីគុណតម្លៃនៃពេលវេលា ១០០០ថ្ងៃដំបូងរបស់កុមារនៅក្នុងឯកសារស្តីពីការចិញ្ចឹមបីបាច់កុមារតូច បានឱ្យដឹងថា ទារក​គ្រប់​រូប អាចទទួលបានការចាប់ផ្ដើមល្អបំផុតនៅក្នុងជីវិតរបស់ពួកគេ ជាពិសេសនៅក្នុងរយៈពេល ២ឆ្នាំដំបូង ចាប់គិតពីពេលបង្កកំណើតរហូតដល់ចុងឆ្នាំទី២ ។ រយៈ​ពេល ១០០០ថ្ងៃដំបូង គឺគិតចាប់ពីទារកចាប់កំណើតក្នុងផ្ទៃម្តាយ ។ ពោលរយៈពេល ១០០០ថ្ងៃដំបូងនេះ រាប់ចាប់ពីពេលបង្កកំណើតក្នុងផ្ទៃម្តាយ ៩ខែ ឬស្មើ ២៧០ថ្ងៃ បូករយៈពេលឆ្នាំទី១ ស្មើនឹង ៣៦៥ថ្ងៃ និងបូករយៈពេលឆ្នាំទី២ ស្មើនឹង ៣៦៥ថ្ងៃ ។

ការស្រាវជ្រាវបានបញ្ជាក់ថា រយៈពេល ១០០០ថ្ងៃដំបូងនេះ គឺជារយៈពេលដ៏សំខាន់បំផុតដែលខួរក្បាលកុមារ​ចាប់ផ្តើមរីកចម្រើនក្នុង​ល្បឿនលឿនជាង​រយៈ​ពេល​ផ្សេង​ទៀត។ ការរីកចម្រើនយ៉ាងឆាប់រហ័សនេះ បន្តមានរហូតដល់កុមារអាយុ ៦ឆ្នាំ ។ ដូច្នេះដើម្បីឱ្យខួរក្បាលអភិវឌ្ឍល្អប្រសើរនៅក្នុងឆ្នាំដំបូងៗនេះ កុមារ​តូច​ត្រូវ​ការបរិយាកាសប្រកបដោយសុវត្ថិភាព ភាពកក់ក្តៅ ភាពទទួលបាននូវក្ដីស្រឡាញ់ គួបផ្សំនឹងការផ្តល់អាហារូបត្ថម្ភត្រឹមត្រូវ និងការភ្លេចពីឪពុកម្តាយ ឬ​អ្នក​ថែ​ទាំ​កុមារ ។

សូមជម្រាបថា រយៈពេល ១០០០ថ្ងៃដំបូងជាឱកាសផ្ដល់មូលដ្ឋានគ្រឹះសម្រាប់សុខភាព សុខុមាលភាព និងការអភិវឌ្ឍន៍គ្រប់ជ្រុងជ្រោយដល់កុមារតូច ដែលអត្ថប្រយោជន៍ទាំងនេះនឹងនៅជាមួយកុមារពេញមួយជីវិត ហើយបន្តសាយភាយដល់មនុស្សជំនាន់ក្រោយទៀតផង ។ ការចុះផ្សាយរបស់ Pregnancy, Birth and Baby មានមូលដ្ឋាននៅអូស្ត្រាលីក៏បានបង្ហាញដែរថា ១០០០ថ្ងៃដំបូងនៃជីវិតកុមារ ពួកគេនឹងទទួលបានបទពិសោធន៍ជីវិតជាច្រើន ដែលមានឥទ្ធិពល ដល់សុខុមាល ភាព ជីវិត (well-being) ពេញមួយជីវិត ៕