ក្រុមសិស្សានុសិស្សមកពី វិទ្យាល័យប៊ុន រ៉ានី បាទី ខេត្តតាកែវ ដណ្ដើមបានជ័យលាភីលេខ១ ក្នុងការប្រកួតប្រជែងកម្មវិធី «សាលារៀនទឹកភ្លៀង» (Rainwater School) ជុំទី២ ប្រចាំឆ្នាំ២០២៦ ក្រោមប្រធានបទ «សមាហរណកម្មវិទ្យាសាស្ត្រ បច្ចេកវិទ្យា និងសិល្បៈ សម្រាប់ភាពធន់នឹងអាកាសធាតុ»។

កម្មវិធីប្រកួតប្រជែង «សាលារៀនទឹកភ្លៀង» រៀបចំឡើងដោយមជ្ឈមណ្ឌលបណ្តុះបណ្តាល និងស្រាវជ្រាវទឹកភ្លៀង (RTRC) នៃរាជបណ្ឌិត្យសភាកម្ពុជា (RAC) ដោយ​មាន​ការ​គាំទ្រពី MKCF-8 និងត្រូវបានអនុវត្តរួមគ្នាជាមួយក្រសួងអប់រំ យុវជន និងកីឡា (MoEYS) និងសាកលវិទ្យាល័យជាតិសេអ៊ូល (SNU) ប្រទេសកូរ៉េខាងត្បូង។

លោកបណ្ឌិត ម៉ម សារិត ប្រធានមជ្ឈមណ្ឌលបណ្ដុះបណ្ដាលនិងស្រាវជ្រាវទឹកភ្លៀង (RTRC) នៃរាជបណ្ឌិត្យ​សភាកម្ពុជា មានប្រសាសន៍ថា ការប្រកួតប្រជែងកម្មវិធីសាលារៀនទឹកភ្លៀងនេះ គឺជាចលករមួយដែលបង្ហាញថា សាលារៀនអាចជាមជ្ឈមណ្ឌល នៃភាពធន់នឹងអាកាសធាតុ ហើយក្រៅពីសៀវភៅសិក្សា ប្អូនៗយុវជនក៏អាចរៀនបន្ថែមពីប្រព័ន្ធរស់នៅមួយដែលភ្ជាប់ខ្លួនទៅនឹងធម្មជាតិ និងមានការទទួលខុសត្រូវ។

«ពានរង្វាន់នេះ មិនត្រឹមតែជានិមិត្តរូបប៉ុណ្ណោះទេ ប៉ុន្តែវាជារង្វាន់មួយដែលពង្រឹងសមត្ថភាពរបស់សាលារៀននៅក្នុងការប្រមូលទឹកភ្លៀង រក្សាទឹកភ្លៀងដើម្បីទុកក្នុងការប្រើប្រាស់ និងជួយកាត់បន្ថយការចំណាយរបស់សាលារៀន»

លោក មូយ៉ុង ហាន ស្ថាបនិក Rain for All និងជាសាស្ត្រាចារ្យមកពីសាកលវិទ្យាល័យ សេអ៊ូល សាធារណរដ្ឋកូរ៉េ មានប្រសាសន៍ថា សិស្សានុសិស្សមិនត្រឹមតែរៀនអំពីទឹកទេ ប៉ុន្តែគាត់នឹងក្លាយជាគ្រូបង្រៀនដែលយល់អំពីទឹកភ្លៀង។ ស្ថាបនិក Rain for All រូបនេះ បានបន្ថែមថា នៅពេលអតីតកាលយើងតែងតែរងចាំទឹកភ្លៀង ប៉ុន្តែ នៅពេលនេះយើងយល់ពីទឹកភ្លៀង ហើយថ្ងៃស្អែកយើងចាប់ផ្តើមគ្រប់គ្រងទឹកភ្លៀងទាំងអស់គ្នា។ យើងរៀនពីទឹកភ្លៀង យើងផ្តល់អំណាចដល់មនុស្សដែលរៀនពីទឹកភ្លៀង ហើយយើងកសាងអនាគតទាំងអស់គ្នា។

សូមជំរាបជូនថា ការប្រកួតប្រជែងប្រព័ន្ធទឹកភ្លៀងសម្រាប់ផឹក (RFD) មានគោលបំណងសំខាន់ ក្នុងការលើកកម្ពស់ការអប់រំពីការគ្រប់គ្រងទឹកប្រកបដោយចីរភាព ក្នុងចំណោមសិស្សថ្នាក់វិទ្យាល័យ តាមរយៈវិធីសាស្ត្ររៀនសូត្រតាមបែបចូលរួមនិងដោយភាពច្នៃប្រឌិត, បង្កើនលទ្ធភាពទទួលបានទឹកស្អាត និងសុវត្ថិភាព សម្រាប់ផឹកនៅតាមសាលារៀន តាមរយៈការដំឡើងប្រព័ន្ធប្រមូលទឹកភ្លៀង, លើកទឹកចិត្តដល់ភាពច្នៃប្រឌិត និងការចូលរួមរបស់សិស្ស តាមរយៈការរួមបញ្ចូលសិល្បៈវប្បធម៌ និងការយល់ដឹងផ្នែកវិទ្យាសាស្ត្រទាក់ទងនឹងនិរន្តរភាពទឹក និងពង្រីកគំរូសាលាទឹកភ្លៀងដោយភ្ជាប់សកម្មភាពអប់រំជាមួយនឹងការអភិវឌ្ឍហេដ្ឋារចនាសម្ព័ន្ធជាក់ស្តែង នៅក្នុងសាលារៀន និងសហគមន៍ជុំវិញ៕