សាកលវិទ្យាល័យ Harvard បានថ្លែងកាលពីថ្ងែព្រហស្បត្តិ៍ ថា ចំណាត់ការរបស់លោកប្រធានាធិបតីអាម៉េរិក ដូណាល់ ត្រាំ ក្នុងការរារាំងជនបរទេស ដែលចង់មកបន្តការសិក្សានៅសាលា Ivy League មិនឱ្យចូលអាម៉េរិក គឺខុសច្បាប់ ហើយស្នើឱ្យចៅក្រមរារាំងភា្លមៗ ដើម្បីរង់ចាំការកាត់ក្ដីបន្ថែមទៀត, នេះបើយោងតាមទីភ្នាក់ងារសារព័ត៌មាន Reuters។

សាកលវិទ្យាល័យ Harvard បានធ្វើវិសោធនកម្មលើបណ្ដឹងមុនដែលខ្លួនបានប្ដឹង ចំពេលមានជម្លោះកាន់តែធំ ជាមួយប្រធានាធិបតីមកពីគណបក្សសាធារណរដ្ឋ ដើម្បីជំទាស់នឹងសេចក្ដីប្រកាស ដែលលោក បានចេញកាលពីថ្ងៃពុធ។

«សេចក្ដីប្រកាសបដិសេធសិស្សានុសិស្សរាប់ពាន់នាក់ នៃសាកលវិទ្យាល័យ Harvard នូវសិទ្ធិមកកាន់សហរដ្ឋអាម៉េរិក ដើម្បីបន្តការសិក្សារបស់ពួកគេ និងការសម្រេចក្ដីសុបិនរបស់ពួកគេ ហើយសេចក្ដីប្រកាសនេះ ក៏ហាមឃាតសាកលវិទ្យាល័យ Harvard មិនឱ្យមានសិទ្ធិបង្រៀនពួកគេផងដែរ។ បើគ្មានវត្តមាននិស្សិតអន្តរជាតិទេ សាកលវិទ្យាល័យ Harvard មិនមែនជាសាកលវិទ្យាល័យ Harvard ទេ។»

អ្នកនាំពាក្យសេតវិមាន Abigail Jackson បានហៅសាលា Harvard ថា ជាកន្លែងក្ដៅនៃអ្នកប្រឆាំងជនជាតិអាម៉េរិក ប្រឆាំងពូជសាសន៍យូដា និងអ្នកបង្កជម្លោះ ដែលគាំទ្រភេរវករ ហើយអះអាងថា សាលានេះ បានបដិសេធ រឿងនេះពីមុនមក។

លោក Jackson បាននិយាយនៅក្នុងសេចក្ដីថ្លែងការណ៍មួយថា អាកប្បកិរិយារបស់ Harvard បានធ្វើឱ្យប៉ះពាល់ដល់សុចរិតភាពរបស់និស្សិត និងប្រព័ន្ធទិដ្ឋាការអ្នកផ្លាស់ប្ដូរទិដ្ឋាការរបស់សហរដ្ឋអាម៉េរិកទាំងមូល និងអាចបង្កហានិភ័យ ដែលប៉ះពាល់ដល់សន្ដិសុខជាតិ។ ហើយឥឡូវនេះ Harvard ត្រូវតែប្រឈមមុខនឹងផលវិបាក ដែលកើតចេញពីសកម្មភាពរបស់ខ្លួន។

លោក ត្រាំ បានលើកឡើងពីការព្រួយបារម្ភផ្នែកសន្តិសុខជាតិ ហើយថា នេះជាហេតុផលសម្រាប់ការរារាំងនិស្សិតអន្តរជាតិ មិនឱ្យចូលសហរដ្ឋអាម៉េរិក ដើម្បីបន្តការសិក្សានៅសាកលវិទ្យាល័យ មានមូលដ្ឋាននៅ Cambridge រដ្ឋ Massachusetts។

ការផ្អាកនេះ នឹងមានរយៈពេល ៦ខែ ប៉ុន្តែអាចបន្ត។ ការប្រកាសរបស់លោក ត្រាំ ក៏បានបញ្ជាឱ្យក្រសួងការបរទេសសហរដ្ឋអាម៉េរិក ឱ្យពិចារណាលុបចោលទិដ្ឋាការសិក្សា ឬផ្លាស់ប្ដូរទិដ្ឋាការរបស់និស្សិតសាកលវិទ្យាល័យ Harvard បច្ចុប្បន្ន ដែលកំពុងមានលក្ខណៈវិនិច្ឆ័យ ដូចទៅនឹងការប្រកាសរបស់គាត់។

ឆ្លើយតបទៅកាន់លោកត្រាំ នៅក្នុងការប្តឹងទៅតុលាការកាលពីថ្ងៃព្រហស្បត្តិ៍ សាកលវិទ្យាល័យ Harvard បានថ្លែងថា លោក ត្រាំ បានបំពានច្បាប់សហព័ន្ធ ហើយសាលាមិនគាំទ្រដាច់ខាតចំពោះអំណះអំណាងលោក ត្រាំ អំពីបញ្ហាសន្តិសុខជាតិ ហើយបានបញ្ជាក់ថា ការចោទប្រកាន់របស់រដ្ឋបាលរបស់លោកត្រាំ មកលើសាលា គឺគ្មានភស្តុតាងច្បាស់លាស់។

Harvard បានបញ្ជាក់ថា សាលាមិនចាត់ទុកការចូលរបស់ជនបរទេស ឬក្រុមជនបរទេស ធ្វើឱ្យប៉ះពាល់ដល់ផលប្រយោជន៍អាម៉េរិកនោះទេ ព្រោះអ្នកគ្មានសញ្ជាតិអាម៉េរិក ដែលរងផលប៉ះពាល់ដោយការប្រកាស នៅតែអាចចូលទឹកដីអាម៉េរិកបាន ដរាបណាពួកគេទៅកន្លែងផ្សេងក្រៅពី សាកលវិទ្យាល័យ Harvard៕