ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្នុងពិធីសំណេះសំណាលជាមួយសិស្សនិទ្ទេស A នៃការប្រឡងសញ្ញាបត្រមធ្យមសិក្សាទុតិយភូមិ និងការប្រឡងសញ្ញាបត្របច្ចេកទេស និងវិជ្ជាជីវៈកម្រិត៣ នាព្រឹកថ្ងៃទី២៣ ខែធ្នូ ឆ្នាំ២០២៤ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា លើកឡើងថា ការពង្រឹងសមត្ថភាព និងឥរិយាបទសិស្ស គឺចាំបាច់ត្រូវធ្វើចាប់តាំងពីក្មេង ពោលគឺថ្នាក់បឋមសិក្សាដល់ថ្នាក់ទី១២។
សម្តេចមហាបវរធិបតី ហ៊ុន ម៉ាណែត មានប្រសាសន៍ថា ការពង្រឹងគណិតវិទ្យា និងភាសាខ្មែរ គឺត្រូវធ្វើចាប់តាំងពីបឋមសិក្សា ដោយត្រូវបន្ថែមម៉ោងបង្រៀនឱ្យបានច្រើន ដើម្បីពង្រឹងមូលដ្ឋានភាសាជាតិឱ្យបានច្រើន ពោលគឺកុំឱ្យសិស្សរៀនចប់ថ្នាក់ទី១២ ប៉ុន្តែសរសេរអក្សរខ្មែរមិនត្រូវជួរ។ សម្តេចធិបតីបន្តថា ការពង្រឹងទាំងសមត្ថភាព ចំណេះដឹង និងឥរិយាបទសិស្ស គឺជារឿងសំខាន់ ដែលជួយឱ្យសិស្សក្រោយរៀនចប់ថ្នាក់ទី១២ អាចមានលទ្ធភាពចេញទៅធ្វើការមានសមត្ថភាពពិតប្រាកដ ល្អទាំងកន្លែងការងារ ល្អទាំងស្ថាប័ន មិនថាជាស្ថាប័នរដ្ឋ ឬឯកជន តែងចង់យកអ្នកពូកែមកធ្វើការជាមួយ។
បើតាមសម្តេចនាយករដ្ឋមន្រ្តី កន្លងមកក្រសួងអប់រំ ក៏មានរៀបចំសាលាគំរូ សាលាជំនាន់ថ្មី ហើយបច្ចុប្បន្នកំពុងរៀបចំគណៈកម្មការពង្រឹងមួយទៀត ដែលសាកល្បង៤២សាលា ក្នុងគោលដៅពង្រឹងមូលដ្ឋានអប់រំតាំងពីក្មេង ពោលគឺធ្វើយ៉ាងណាពង្រឹងឥរិយាបទសិស្សនៅថ្នាក់បឋមសិក្សាឱ្យរឹងមាំ ទាំងមូលដ្ឋានគណិតវិទ្យា ភាសាខ្មែរ ជំនាញសំខាន់ៗ ភាសាបរទេសខ្លះ និងឥរិយាបទ។
សម្តេចមហាបវរធិបតី ហ៊ុន ម៉ាណែត លើកឡើងទៀតថា ប្រសិនអប់រំឥរិយាបទកុមារបានរឹងមាំក្នុងរយៈពេល ៦ឆ្នាំនៃបឋមសិក្សា គឺជារឿងល្អ ព្រោះជួយកាត់បន្ថយការពិបាកគ្រប់គ្រងឥរិយាបទសិស្សនៅអនុវិទ្យាល័យ ហើយប្រសិនបើរយៈពេល ១២ឆ្នាំ មិនពិបាកគ្រប់គ្រងឥរិយាបទសិស្ស នោះនឹងទទួលបានធនធានមនុស្សដែលមានឥរិយាបទល្អរួចជាស្រេច ដែលអាចគិតគូរជួយសង្គមជាតិឱ្យល្អប្រសើរ។
គួរជម្រាបជូនថា ក្រសួងអប់រំ យុវជន និងកីឡា បានដាក់ឱ្យសាកល្បងនូវកម្មវិធីក្រៅម៉ោងសិក្សា នៅតាមគ្រឹះស្ថានសិក្សាសាធារណៈគំរូ ទាំងបឋមសិក្សា និងមធ្យមសិក្សា ដោយបន្ថែមម៉ោងសិក្សាយ៉ាងហោចណាស់ ២ម៉ោងបន្ថែមទៀត លើម៉ោងសិក្សាបច្ចុប្បន្ន ។ យោងតាមសេចក្តីណែនាំរបស់ក្រសួងអប់រំ យុវជន និងកីឡា សកម្មភាពក្រៅម៉ោងសិក្សា ត្រូវរៀបចំឱ្យស្របទៅតាមតម្រូវការរបស់សាលារៀនក្នុងការអនុវត្តកម្មវិធីសិក្សាឱ្យបានពេញលេញ និងដើម្បីពង្រឹងចំណេះដឹង វិន័យ សីលធម៌ ចរិយាធម៌ និងឥរិយាបទ របស់សិស្ស ព្រមទាំងការតម្រង់ទិសវិជ្ជាជីវៈ ដោយអនុវត្តការផ្តល់ពិន្ទុ ៨០% លើចំណេះដឹង ១០%លើបំណិន និង ១០%លើសីលធម៌ និងចរិយាធម៌៕
