ផលិតផលទៀនក្រអូប ដែលមានក្លិនចម្រុះ ត្រូវ​បានសិស្សមួយក្រុមមក​ពីវិទ្យាល័យព្រែកលៀប សាលារៀនជំនាន់ថ្មី រួមគ្នាបង្កើត ដោយ​ប្រើប្រាស់​រូបមន្តគីមីវិទ្យា​ដែលពួកគេបានរៀន។ ផលិតផលនេះ បានបង្ហាញពីភាពច្នៃប្រឌិត របស់យុវជនដែល​កំពុង​រៀន​នៅវិទ្យាល័យ តែអាចបង្កើតស្នាដៃថ្មី ​ចេញពីចំណេះដឹងដែលពួកគេ​បានរៀន​នៅ​សាលា។

យុវជន ងិន ចាន់គ្រឹះស្នា ដែលមានវ័យ​ ១៣ឆ្នាំ ជាប្រធានក្រុមផលិតទៀនក្រអូប (សមាជិកប្រាំនាក់) និងបច្ចុប្បន្នកំពុងបន្តការសិក្សាថ្នាក់ទី០៨ នៃវិទ្យាល័យព្រែកលៀប ភ្នំពេញ, គ្រឹះស្នា និយាយថា គម្រោងក្នុងការផលិតទៀនក្រអូបនេះ គឺបានលេចរូបរាងកាលពីចុងឆ្នាំ២០២៣ ក្រោយពួកគេទទួលបានការសិក្សាអំពីជំនាញគីមីវិទ្យា។

កត្តាចម្បងដែលជំរុញឱ្យ គ្រឹះស្នា និងក្រុម ផលិតទៀនក្រអូប គឺ ជាការ​ចង់សាកល្បងចំណេះដឹងគីមីវិទ្យាដែលក្រុមខ្លួនបានរៀនពីសាលា ក៏​ដូចជា​ចង់ដកបទពិសោធន៍ក្នុងការផលិតផ្ទាល់។ ហើយ​មួយ​វិញទៀត ក៏​ចង់ឱ្យអ្នដែលមិនធ្លាប់ចាប់អារម្មណ៍អំពីអត្ថប្រយោជន៍របស់ទៀនក្រអូប បានដឹងអំពីគុណតម្លៃនៃទៀនក្រអូប ក្នុងការបង្កើនផលិតភាពទៅកាន់របៀបនៃប្រើប្រាស់ជីវិតប្រចាំថ្ងៃ។

 ទៀនក្រអូប មានសារៈប្រយោជន៍ច្រើនដូចជា បង្កើនការចងចាំ បង្កើនអារម្មណ៍ល្អ និងធ្វើឱ្យបន្ទប់មានផាសុកភាពល្អ  តាមរយៈការផលិតទៀនក្រអូបទៀតសោធ បានជួយទៅដល់ការប្រើប្រាស់សម្ភារៈផ្សេងៗដែលមាននៅក្នុងស្រុកស្រាប់ក្នុងតំបន់យើង ដូចជា ក្រមួន សណ្តែក រួមទាំងប្រភេទក្លិនដែលចម្រាញ់មកពីធម្មជាតិផងដែរ។

ងិន ចាន់គ្រឹះស្នា ប្រធានក្រុមផលិតទៀនក្រអូប

ប្រធានគម្រោងផលិតទៀនក្រអូបវ័យ១៣ឆ្នាំ បន្តថា កំឡុងប្រត្តិប​ត្តិកិច្ចការផលិតទៀនក្រអូបនេះ ក្រុមខ្លួនបានជួបនឹងបញ្ហាប្រឈមមួយចំនួនដូចជា ខ្វែងគំនិតគ្នាក្នុង​ការ​ពិភាក្សា មានបញ្ហា​នៅពេលធ្វើការពិសោធន៍ និង​សាកល្បងដំបូងជាដើម, តែយ៉ាងណា ដោយ​គិត​ទៅដល់គោលដៅរួម និងការប្តេជ្ញាចិត្ត ក្រុមខ្លួន​នៅ​តែអាចបន្តស​កម្មភាពទៅបានដោយរលូន។

ដោយសារមានចំណេះជំនាញ ការខិតខំ និងភាពជឿជាក់ យុវជន ងិន ចាន់គ្រឹះស្នា បានបង្ហាញមហិច្ឆតា ចង់នាំយកផលិតផលទៀនក្រអូបរបស់ក្រុមខ្លួន ចូលទៅ​កាន់ទីផ្សារក្នុងស្រុក៕