ការប្រឡង​សញ្ញាបត្រ​មធ្យមសិក្សា​ទុតិយភូមិ ឬបាក់ឌុប គ្រោង​នឹង​ប្រព្រឹត្តិទៅ​នៅ​ថ្ងៃទី០៨ ខែតុលា ឆ្នាំ​២០២៤ ដើម្បីចូលរួម​លើក​កម្ពស់​ការ​ថែទាំសុខភាព និង​សុវត្ថិភាព​សម្រាប់​គណៈមេប្រយោគ គណៈកម្មការ​នានា និង​បេក្ខជន កំឡុង​ពេល នៃដំណើរ​ការ​ប្រឡង​ ក្រសួងអប់រំ​បានធ្វើ​ការ​ណែនាំ​ដល់អង្គភាពក្រោម​ឱវាទទាំងអស់ដែល​បានកំណត់ និង​ជ្រើសរើសយកធ្វើជាមណ្ឌលប្រឡង ត្រូវ​អនុវត្ត​តាមគោល​ការណ៍​ណែនាំ​ប្រតិបត្តិ។

បើតាមសេចក្ដីណែនាំ ចំពោះគ្រឹះស្ថានសិក្សាដែលយកធ្វើជាមណ្ឌលប្រឡង ត្រូវធ្វើអនាម័យបោសសម្អាតបន្ទប់ អគារ បរិវេណ និងរៀបចំកន្លែងទុកដាក់សំរាមឱ្យបានត្រឹមត្រូវ។ រម្ងាប់មេរោគលើតុ កៅអី ដៃទ្វារ បង្កាន់ដៃ ផ្ទៃរាបបន្ទប់ប្រឡង និងកន្លែងចាប់កាន់ញឹកញាប់។ ពិនិត្យលទ្ធភាពរៀបចំគំនូសគម្លាតសុវត្ថិភាពនៅក្នុងបរិវេណគ្រឹះស្ថានសិក្សា ព្រមទាំងរៀបចំតុកៅអីសម្រាប់បេក្ខជនក្នុងបន្ទប់ប្រឡងនីមួយៗ ដោយរក្សាគម្លាតសុវត្ថិភាពយ៉ាងតិច ១,៥ម៉ែត្រ។ រៀបចំកន្លែងបិទបញ្ជីឈ្មោះបេក្ខជនឱ្យបានច្រើនទីតាំង ដើម្បីរក្សានូវគម្លាតសុវត្ថិភាពសម្រាប់បេក្ខជនមើលឈ្មោះរបស់ខ្លួន។ រៀបចំកន្លែងលាងសម្អាតដៃ និងបង្គន់អនាម័យដោយមានទឹក និងសាប៊ូប្រើប្រាស់ជាប្រចាំ និងពិនិត្យលទ្ធភាពរៀបចំឧបករណ៍ការពាររន្ទះ នៅតាមមណ្ឌលប្រឡងដែលមានហានិភ័យខ្ពស់។

សម្រាប់មុនពេលចូលបន្ទប់ប្រឡង គណៈមេប្រយោគ និងគណៈកម្មការនានា ត្រូវណែនាំឱ្យបេក្ខជនតម្រង់ជួរ អនុវត្តវិធានការសុខាភិបាល និងស្តង់ដាណែនាំប្រតិបត្តិស្តីពីវិធានការសុខភាព និងសុវត្ថិភាពរបស់ក្រសួងអប់រំ យុវជន និងកីឡាឱ្យបានត្រឹមត្រូវជាប្រចាំនៅក្នុងមណ្ឌលសំណេរ។ លើសពីនេះ ប្រើប្រាស់សម្ភារៈចាំបាច់ស្របតាមលក្ខណ:បច្ចេកទេសសុខាភិបាល ក្នុងការបង្ការទប់ស្កាត់ជំងឺឆ្លងរាតត្បាត ឬគ្រោះថ្នាក់ផ្សេងៗ ចំពោះគណៈមេប្រយោគ គណៈកម្មការនានា និងបេក្ខជនដែលមានជំងឺឆ្លងរាតត្បាតឬគ្រោះថ្នាក់ផ្សេងៗ។ ចំពោះក្នុងពេលដំណើរការប្រឡង ត្រូវអនុវត្តការរក្សាអនាម័យឱ្យបានត្រឹមត្រូវ ពិសេសត្រូវលាងសម្អាតដៃរៀងរាល់ពេលសម្រាកឆ្លងវិញ្ញាសា និងចៀសវាងយកដៃប៉ះលើផ្ទៃមុខ។ លើសពីនេះ ណែនាំឱ្យបេក្ខជនគ្រប់គ្រងអារម្មណ៍ឱ្យបាននឹងន និងមានភាពក្លាហាន ករណីមានបញ្ហាមិនស្រួលខ្លួនត្រូវជួបពិគ្រោះយោបល់ជាមួយមន្ត្រីសុខាភិបាលប្រចាំការនៅតាមមណ្ឌលប្រឡង។ ក្រោយដំណើរការប្រឡង អនុវត្តវិធានការសុខាភិបាល និងស្តង់ដាណែនាំប្រតិបត្តិស្តីពីវិធានការសុខភាពនិងសុវត្ថិភាពរបស់ក្រសួងអប់រំ យុវជន និងកីឡាឱ្យបានត្រឹមត្រូវជាប្រចាំនៅក្នុងមណ្ឌលសំណេរ នៅពេលវេចខ្ចប់ ដុំកិច្ចការបេក្ខជនដែលមានជំងឺឆ្លងរាតត្បាតឬគ្រោះថ្នាក់ផ្សេងៗ។

ចំពោះក្នុងពេលដំណើរការប្រឡង ត្រូវអនុវត្តការរក្សាអនាម័យឱ្យបានត្រឹមត្រូវ ពិសេសត្រូវលាងសម្អាតដៃរៀងរាល់ពេលសម្រាកឆ្លងវិញ្ញាសា និងចៀសវាងយកដៃប៉ះលើផ្ទៃមុខ។ លើសពីនេះ ណែនាំឱ្យបេក្ខជនគ្រប់គ្រងអារម្មណ៍ឱ្យបាននឹងន និងមានភាពក្លាហាន ករណីមានបញ្ហាមិនស្រួលខ្លួនត្រូវជួបពិគ្រោះយោបល់ជាមួយមន្ត្រីសុខាភិបាលប្រចាំការនៅតាមមណ្ឌលប្រឡង។

ក្រោយដំណើរការប្រឡង អនុវត្តវិធានការសុខាភិបាល និងស្តង់ដាណែនាំប្រតិបត្តិស្តីពីវិធានការសុខភាពនិងសុវត្ថិភាពរបស់ក្រសួងអប់រំ យុវជន និងកីឡាឱ្យបានត្រឹមត្រូវជាប្រចាំនៅក្នុងមណ្ឌលសំណេរ នៅពេលវេចខ្ចប់ ដុំកិច្ចការបេក្ខជនដែលមានជំងឺឆ្លងរាតត្បាតឬគ្រោះថ្នាក់ផ្សេងៗ៕