យុវតី រ៉ាត់ យ៉ារ៉ូ សិស្សថ្នាក់ទី១១ នៃវិទ្យាល័យពេជ្រចិន្ដា ខេត្តបាត់ដំបង និងជាប្រធានក្រុមប្រឹក្សាយុវជន បាននិយាយថា ប្រធានក្រុមប្រឹក្សាយុវជនដើរតួនាទីសំខាន់ក្នុងការជួយមិត្តភក្ដិឱ្យកាន់តែមានវិន័យ សីលធម៌ និងការច្នៃប្រឌិត។ ក្នុងនាមជាប្រធានក្រុមប្រឹក្សាយុវជន យុវតី រ៉ាត់ យ៉ារ៉ូ បានចូលរួមការងារស័្មគ្រចិត្តជាច្រើនដែលអាចអភិវឌ្ឍខ្លួនឯងផង និងដឹកនាំយុវជនក្នុងសាលាឱ្យសកម្មភាពផងដែរ។

យ៉ារ៉ូ បានឱ្យដឹងថា ការងារសំខាន់ៗរបស់ក្រុមប្រឹក្សាយុវជន រួមមាន វិន័យ ពលកម្ម គណនេយ្យ បរិស្ថាន និងអនាម័យ ដើម្បីជួយសម្រួលការងាររបស់លោកគ្រូ អ្នកគ្រូ និងនាយកសាលា។ យ៉ារ៉ូ បន្តថា គោលដៅរបស់ក្រុមប្រឹក្សាយុវជន គឺជួយមិត្តភក្ដិឱ្យកាន់តែមានវិន័យ សីលធម៌ គុណធម៌ និងគំនិតច្នៃប្រឌិត។

សិស្សថ្នាក់ទី១១ នៃវិទ្យាល័យពេជ្រចិន្ដា ខេត្តបាត់ដំបង រូបនេះ បន្ថែមថា ក្នុងនាមជាប្រធានក្រុមប្រឹក្សាយុវជន មានតួនាទីគ្រប់គ្រង និងសង្កេតមើលលើផ្នែកវិន័យ ពលកម្ម គណនេយ្យ បរិស្ថាន និងអនាម័យ ព្រមទាំងធ្វើការផ្ទាល់ជាមួយសិស្សដែលជួបបញ្ហាមួយចំនួនដូចជា ការបាក់ទឹកចិត្ត ក្មេងទំនើង សីលធម៌ធ្លាក់ចុះ ឬការសិក្សាចុះខ្សោយ ដើម្បីរកដំណោះស្រាយជូនសិស្សានុសិស្ស។ យ៉ារ៉ូបន្តថា ក្នុងលក្ខខណ្ឌមិនអាចជួយដោះស្រាយបញ្ហារបស់សិស្សានុសិស្សបាន នោះរូបគេនឹងបន្តរកជំនួយពីគ្រូមគ្គុទេសន៍ប្រឹក្សាអាជីព លោកនាយក លោកគ្រូ អ្នកគ្រូ អ៊ុំ/ពូ/មីងក្នុងសហគមន៍ និងអជ្ញាធរមូលដ្ឋានមកជួយដោះស្រាយបញ្ហាយុវជន។

យុវតី យ៉ារ៉ូ បញ្ជាក់ថា ការងារជាប្រធានក្រុមប្រឹក្សាយុវជននេះ គឺជួយបណ្ដុះបណ្ដាលរូបគេ និងយុវជនដទៃទៀតឱ្យមានភាពជាអ្នកដឹកនាំ មានបេះដូងក្នុងការជួយអ្នកដទៃដោយមិនរំពឹងផលត្រឡប់វិញ មានចិត្តមេត្តា និងចេះបត់បែនតាមកាលៈទេសៈ។ លើសពីនេះ ទទួលបានចំណេះដឹងថ្មីៗជាច្រើនពីប្រជាជនក្នុងសហគមន៍ អជ្ញាធរមូលដ្ឋាន ក៏​ដូចជាអង្គការដៃគូ។

សម្រាប់សមិទ្ធផលដែលទទួលបានពីការងារជាប្រធានក្រុមប្រឹក្សាយុវជន គឺនៅឆ្នាំ២០២៣កន្លងទៅ យ៉ារ៉ូ  ទទួលបានឱកាសតំណាងឱ្យសំឡេងកុមារកម្ពុជានៅអង្គការសហប្រជាជាតិ ទាក់ទងនឹងបញ្ហាអំពើហិង្សាលើកុមារ ដើម្បីស្វែងរកដំណោះស្រាយ។ លើសពីនេះ មានឱកាសចូលរួមប្រកួតវគ្គផ្ដាច់ព្រ័ត្រនៅក្នុងកម្មវិធី JENESYS នៅប្រទេសជប៉ុន ទាក់ទងការបង្កើតខ្សែភាពយន្តខ្លី ស្ដីពី «បញ្ហាអំពើហិង្សាលើកុមារ» ដោយទទួលបានជ័យលាភីលខ១។ ចំណែកនៅឆ្នាំ២០២៤ រូបគេក៏ទទួលបានឱកាសពីអង្គការទស្សនៈពិភពលោក ធ្វើជាតំណាងសំឡេងយុវជន និងកុមារនៅប្រទេសម៉ាឡេស៊ីដើម្បីនិយាយស្នើសុំបន្តមូលនិធិគាំទ្រពីម្ចាស់ជំនួយសម្រាប់កុមារកម្ពុជា ក៏ដូចជាកុមារទូទាំងពិភាពលោក។ ជាពិសេស ឱកាសចូលរួមប្រកួតនិយាយជាសាធារណៈ លើប្រធានបទ «សេនាដៃស្ដាំ» ក្នុងកម្មវិធីជជែកដេញដោលយុវជនថ្នាក់ជាតិ ២០២៤​ ដោយទទួលបានមេដាយមាស។

ដោយឡែកសម្រាប់ការបែងចែកពេលវេលា យ៉ារ៉ូ និយាយថា ខ្លួនធ្វើការបែងចែកយ៉ាងឱ្យការសិក្សា និងការងារស្ម័គ្រចិត្តដើរទន្ទឹមគ្នា ហើយ​វាក៏ជាបញ្ហាប្រឈមក្នុងការធ្វើជាប្រធានក្រុមប្រឹក្សាយុវជន ប៉ុន្តែក្រោយបានធ្វើការងារនេះបន្តមក និងទទួលបានការបណ្ដុះបណ្ដាលពីអង្គការដៃគូ និងដំបូន្មានល្អៗពីលោកគ្រូ អ្នកគ្រូ នាយកសាលា ទើបអាចជួយឱ្យដោះស្រាយបញ្ហាទាំងនោះបាន ហើយទាំងការសិក្សា និងការងារស្ម័គ្រចិត្តក៏ដំណើរការទន្ទឹមគ្នាបានល្អ៕

បើតាមឯកសារការគ្រប់គ្រងសាលារៀនផ្អែកលើលទ្ធផល ក្រុមប្រឹក្សាយុវជននិងកុមារ សម្រាប់បឋមសិក្សា ឆ្នាំ២០១៧ បង្ហាញថា ក្រុមប្រឹក្សាយុវជននិងកុមារ ជាផ្នែកមួយនៃការពន្លឿនការងាររបស់សាលារៀនមួយចំនួនដូចជាការសិក្សា ការងារបណ្ណាល័យ ការងារសង្គម ការងាររដ្ឋបាល ការងារហិរញ្ញវត្ថុ ការផ្សព្វផ្សាយ ការងារសិល្បៈ កីឡា វប្បធម៌ការងារសុខភាព អនាម័យ បរិស្ថាន បំណិនជីវិត និងក្លឹបសិក្សាតាមផ្ទះ និងភូមិ ព្រមទាំងជួយរួមចំណែកអភិវឌ្ឍន៍សាលារៀនជួយខ្លួនឯងផ្ទាល់ឱ្យក្លាយជាសិស្សល្អ មិត្តល្អ កូនល្អ និងពលរដ្ឋល្អ សម្រាប់សាលារៀន និងសង្គមជាតិ៕