ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្រោយចំណាយពេលប្រកួតប្រជែងអស់រយៈពេល៤ខែ ដោយមានការចូលរួមពីនិស្សិតកម្ពុជា ក៏ដូចជានិស្សិតចិនផងនោះ ទីបំផុតគេបានរកឃើញយុវជនឆ្នើមកម្ពុជាចំនួន៣ក្រុម ដែលបានឈ្នះពានពីកម្មវិធីប្រកួតប្រជែងស្នាដៃរចនាសហគមន៍ឆ្នាំ២០២៤ ក្រោមប្រធានបទ “ភូមិ១ សហគមន៍១”។
យុវជនឆ្នើមទាំង៣ក្រុម ដែលបានឈ្នះការប្រកួតនេះ រួមមាន ក្រុមទី១ ឈ្មោះ ក្រុម OTHER008 បានជ្រើសរើសទីតាំងបណ្ណាល័យជាតិ ជានិស្សិតទើបបញ្ចប់ការសិក្សាផ្នែកស្ថាបត្យកម្ម នៃសាកលវិទ្យាល័យអន្តរជាតិផារ៉ាហ្គន មានសមាជិក ៦នាក់, ក្រុមទី២ ឈ្មោះ ក្រុម ICT003 ទីតាំងសួនច្បារផ្សារចាស់ ជានិស្សិតឆ្នាំទី៥ មកពីវិទ្យាស្ថានបច្ចេកវិទ្យាកម្ពុជា មានសមាជិក ៥នាក់ និង ក្រុមទី៣ ឈ្មោះ ក្រុម OTHER011 ទីតាំងផ្សារកណ្ដាល ជាស្ថាបត្យករ មកពីវេទិកាអនាគត មានសមាជិក ៧នាក់។
ឯកឧត្ដម ឡៅ ទិព្វសីហា រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ មានប្រសាសន៍ដោយបានថ្លែងអំណរគុណដល់សមាគមអ្នកវិនិយោគ អ្នកសាងសង់ និងស្ថាបត្យករកម្ពុជា (CICAA) និងសមាគមសណ្ឋាគារកម្ពុជា (CHA) ដែលបានរៀបចំការប្រកួតប្រជែងស្នាដៃរចនាសហគមន៍ដ៏មានសារៈសំខាន់នេះឡើង ដើម្បីផ្ដល់ឱកាសដល់ប្អូនៗនិស្សិតជំនាញស្ថាបត្យករ នគរូបនីយកម្ម និងសំណង់ បានបញ្ចេញស្នាដៃ និងគំនិតច្នៃប្រឌិតចូលរួមផ្ដល់ជាយោបល់ និងការកែលម្អសង្គមក្នុងទីក្រុង និងប្រជុំជន, ការគិតគូររៀបចំ ជួសជុល និងថែរក្សាសំណង់បេតិកភណ្ឌប្រវត្តិសាស្ត្រ, ការរៀបចំកែលម្អសួនច្បារសាធារណៈឱ្យមានភាពរស់រវើក ភាពទាក់ទាញ ដើម្បីការរស់នៅប្រកបដោយផាសុកភាព ភាពសុខសាន្ត និងភាពស្និទ្ធស្នាលក្នុងសហគមន៍។
រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ មានប្រសាសន៍ថា តាមរយៈសកម្មភាព «ភូមិ១ សហគមន៍១» នេះ បានប្រែក្លាយជាធាតុមួយថ្មីបន្ថែម ក្នុងការទាក់ទាញទឹកចិត្តអ្នកសិក្សាគំរូប្លង់ អ្នកសាងសង់ អ្នកវិនិយោគក្នុងស្រុក និងបរទេស ខិតខំប្រឹងប្រែងពង្រឹងគុណភាព និងសមត្ថភាពរបស់ខ្លួន ដើម្បីទទួលបានស្នាដៃល្អ បង្កើនឱកាសទីផ្សារការងារ ប្រាក់ចំណូល និងសកម្មភាពប្រកួតប្រជែងរបស់ខ្លួនបន្តទៀត។ ពិសេសសម្រាប់ប្អូនៗនិស្សិតផ្នែកស្ថាបត្យកម្ម នគរូបនីយកម្ម និងវិស្វកម្ម ចូលរួមប្រកួតស្នាដៃ បានបង្ហាញពីសមត្ថភាពចំណេះជឹង ភាពប៉ិនប្រសព្វ ភាពច្នៃប្រឌិតក្នុងការគិតគូរប្រែក្លាយតំបន់ដែលគ្មានទីផ្សារសេដ្ឋកិច្ច ឱ្យក្លាយជាតំបន់មួយដែលមានសក្ដានុពលផ្នែកសេដ្ឋកិច្ចរស់រវើក។ ម៉្យាងទៀត ការចូលរួមនេះ ធ្វើឱ្យប្អូនៗសិស្សានុសិស្សទទួលបានចំណេះដឹង បទពិសោធន៍ល្អៗពីសាស្ត្រាចារ្យ គណៈកម្មការ ថ្នាក់ដឹកនាំជាតិ អ្នកវិនិយោគទុនជាតិ និងអន្តរជាតិ។
លោក សេង ប៊ុនវីរៈ ប្រធាន CICAA មានប្រសាសន៍ថា ការប្រកួតប្រជែងស្នាដៃរចនាសហគមន៍ឆ្នាំ២០២៤ បង្កើតឡើងក្នុងគោលបំណងធំៗចំនួន៥ រួមមាន ទី១. ការពង្រឹង និងពង្រីកសហគមន៍ ៖ រួមចំណែកឱ្យប្រជាពលរដ្ឋទទួលខុសត្រូវភាពជាម្ចាស់ក្នុងតំបន់របស់ពួកគេ និងលើកកម្ពស់ស្មារតីក្នុងការចូលរួមឱ្យកាន់តែច្រើន, ទី២.ទំនាក់ទំនងសង្គម ៖ ពង្រឹងចំណងមិត្តភាពកាន់តែរឹងមាំក្នុងចំណោមសមាជិកសហគមន៍ ការទំនាក់ទំនង និងសកម្មភាពសហការ, ទី៣. ការអភិវឌ្ឍសេដ្ឋកិច្ចសហគមន៍ ៖ គាំទ្រអាជីវកម្មក្នុងតំបន់ និងគាំទ្រគំនិតផ្ដួចផ្ដើម ផ្ដល់ឱកាសការងារ និងលើកកម្ពស់វិបុលភាពសេដ្ឋកិច្ចនៅក្នុងសហគមន៍, ទី៤. និរន្តរភាព ៖ លើកកម្ពស់ការអភិវឌ្ឍន៍ដែលមិនប៉ះពាល់ដល់បរិស្ថាន និងការកែលម្អហេដ្ឋារចនាសម្ព័ន្ធ ដើម្បីធានានូវសុខុមាលភាពយូរអង្វែងក្នុងសង្គម និង ទី៥. តាមរយៈការប្រកួតប្រជែងនេះ នឹងអាចផលិតឯកសារជាធាតុចូលសម្រាប់រដ្ឋបាលរាជធានីភ្នំពេញ ក៏ដូចជារាជរដ្ឋាភិបាលប្រើប្រាស់ក្នុងភាពជាក់ស្ដែង។
ប្រធាន CICAA បញ្ជាក់បន្ថែមថា កម្មវិធីប្រកួតប្រជែងស្នាដៃរចនាសហគមន៍ឆ្នាំ២០២៤ បានជ្រើសរើសទីតាំងចំនួន៣ ក្នុងរាជធានីភ្នំពេញសម្រាប់ការប្រកួត រួមមាន សួនច្បារផ្សារចាស់, ផ្សារកណ្ដាល និងបណ្ណាល័យជាតិ។ លោក សេង ប៊ុនវីរៈ បន្តថា កម្មវិធីនេះ ត្រូវបានរៀបចំការប្រកួតជា២វគ្គ ដោយវគ្គទី១ ជម្រុះយក ១២ក្រុម និងវគ្គផ្ដាច់ព្រ័ត្រ ជម្រុះយកជ័យលាភីឯកចំនួន ៣ក្រុម ដោយមួយទីតាំងយកជ័យលាភីឆ្នើមតែមួយប៉ុណ្ណោះ។
បើតាមលោក សេង ប៊ុនវីរៈ កម្មវិធីប្រកួតប្រជែងស្នាដៃរចនាសហគមន៍ឆ្នាំ២០២៤នេះ មានរយៈ៤ខែ ដោយមានការចូលរួមពីនិស្សិតកម្ពុជាផ្នែកស្ថាបត្យកម្ម នគរូបនីយកម្ម វិស្វកម្ម និងផ្នែកផ្សេងៗចាប់ពីឆ្នាំទី៣ ដល់ឆ្នាំទី៥ ព្រមទាំងមាននិស្សិតមកពីប្រទេសចិនចូលរួមប្រកួតប្រជែងផងដែរ។ លោកបន្តថា ក្នុងការប្រកួតនេះដែរ កម្មវិធីក៏បានផ្ដល់ការបណ្ដុះបណ្ដាលពិសេសដល់បេក្ខជនចំនួន ៤មុខវិជ្ជាដែលពាក់ព័ន្ធនឹងការរចនាសហគមន៍ និងការគិតពីសេដ្ឋកិច្ចសហគមន៍ ដោយគ្រូឧទ្ទេសដែលមានចំណេះវិជ្ជាជ្រៅជ្រះលើជំនាញរបស់ខ្លួន និងមានគណៈកម្មការចំនួន៦រូបចូលរួមវាយតម្លៃ និងដាក់ពិន្ទុ។
គួរជម្រាបជូនថា ក្រុមជ័យលាភីឯកទាំង៣ក្រុម ទទួលបានពានរង្វាន់១ លិខិតសរសើរ និងទឹកប្រាក់ចំនួន ១០លានរៀល ក្នុងមួយក្រុមៗ៕
