ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ពេលវេលានៃការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) កាន់តែជិតខិតមកដល់ ដែលទាមទារឱ្យសិស្សានុសិស្សដែលជាបេក្ខជនប្រឡង ត្រូវត្រៀមខ្លួនទាំងចំណេះដឹង កម្លាំងកាយចិត្ត និងសុខភាព ដើម្បីបញ្ចេញសមត្ថភាពដែលខ្លួនបានសិក្សារៀនសូត្រអស់រយៈពេល១២ឆ្នាំ។
យុវតី ឡៅលុន លីម៉ីម៉ី ជាអតីតសិស្សនិទ្ទេសA ឆ្នាំ២០២៤ នៃវិទ្យាល័យព្រះមុន្នីវង្ស ខេត្តបាត់ដំបង, បច្ចុប្បន្នជានិស្សិតឆ្នាំទី១ ដេប៉ាតឺម៉ង់ភាសាបារាំង នៃវិទ្យាស្ថានភាសាបរទេស បានចែករំលែកបទពិសោធន៍របស់ខ្លួន ក្នុងត្រៀមខ្លួនមួយខែមុនប្រឡងបាក់ឌុប ដើម្បីសិស្សានុសិស្សអាចយកមកអនុវត្តដើម្បីឱ្យការប្រឡងទទួលបានលទ្ធផលល្អ។
យុវតី ឡៅលុន លីម៉ីម៉ី និយាយថា ការប្រឡងបាក់ឌុបពិតជាសំខាន់ខ្លាំង ព្រោះមិនត្រឹមតែជាការប្រឡងតេស្តសមត្ថភាពប៉ុណ្ណោះទេ តែជាដំណាក់កាលមួយដែលជីវិតជាសិស្សវិទ្យាល័យបានបញ្ចប់ ហើយឈានទៅរកជីវិតនៅសាកលវិទ្យាល័យ។
អតីតសិស្សនិទ្ទេស A ឆ្នាំ២០២៤ រូបនេះ បន្ថែមថា អ្នកណាក៏អាចប្រឡងបាក់ឌុបជាប់ដែរ ឱ្យតែដាក់ចិត្តខំប្រឹងរៀន។ លីម៉ីម៉ី បន្តថា និទ្ទេស A ងាយស្រួលយកសម្រាប់អ្នករៀនពូកែ ហើយក៏អាចពិបាកដែរសម្រាប់សិស្សធម្មតា តែវាក៏អាស្រ័យលើការខិតខំដែរ។
«និទ្ទេសA មិនងាយស្រួលយក ហើយក៏មិនពិបាកយកដែរ ប្រសិនបើយើងខំប្រឹងរៀនតាំងពីដើមឆ្នាំ»
យុវតី ឡៅលុន លីម៉ីម៉ី បន្ថែមថា សម្រាប់រយៈពេលមួយខែមុនពេលប្រឡងបាក់ឌុប គឺជាពេលវេលាមួយសំខាន់ ហើយមានសកម្មភាពប្រចាំថ្ងៃមួយចំនួនដែលបេក្ខជនត្រៀមប្រឡងគួរធ្វើ រួមមាន៖
ទី១. ត្រូវគេងឱ្យបានគ្រប់គ្រាន់ ៖ កុំរៀនដល់យប់ជ្រៅពេក ត្រូវឆាប់ចូលគេង ដើម្បីងាយស្រួលសម្របខ្លួន ចូលគេងលឿន ក្រោកពីគេងលឿន។ ជាក់ស្ដែង សិស្សខ្លះ ចូលចិត្តរៀននៅពេលយប់ ហើយអ្នកខ្លះទៀតចូលចិត្តរៀនពេលព្រឹក ដូច្នេះ នៅពេលជិតប្រឡង អ្នកចូលចិត្តរៀនពេលយប់ ក៏ត្រូវឆាប់ចូលគេងឱ្យបានលឿន និងក្រោកឱ្យបានលឿន ដើម្បីត្រៀមខ្លួនទៅប្រឡងឱ្យទាន់ពេលវេលា។
ទី២. កុំបញ្ឈប់ការរៀនគួរ ៖ អ្នកខ្លះមួយខែជិតប្រឡងតែងឈប់រៀនគួរ ហើយរៀនដោយខ្លួនឯងនៅផ្ទះ ប៉ុន្តែសម្រាប់ លីម៉ីម៉ី រៀនដល់សល់មួយថ្ងៃប្រឡងតែម្ដង ដើម្បីកុំឱ្យភ្លេច។
ទី៣. របបអាហារ ៖ គួរកាត់បន្ថយការញ៉ាំហិរ ដែលអាចធ្វើឱ្យឈឺ ហើយកុំចង់ថែគីឡូ ឬថែរាងខ្លាំងពេក។
ទី៤. រំលឹកមេរៀន ៖ មានវិធី៤យ៉ាងជួយឱ្យឆាប់ចាំមេរៀន គឺ ១. បង្កើតបណ្ណសួរ-ឆ្លើយ និងបណ្ណសួរ-ឆ្លើយបែបឌីជីថល ដោយយកក្រដាស់មកសរសេរសំណួរនៅផ្នែកខាងមុខ និងសរសេរចម្លើយនៅផ្នែកខាងក្រោយ ហើយដាក់ចូលក្នុងប្រអប់ រួចក្រឡុក បន្ទាប់មកចាប់យកមកឆ្លើយ។ ប្រសិនបើឆ្លើយបានទុកមួយកន្លែង ហើយសំណួរណាឆ្លើយមិនបាន ដាក់ចូលប្រអប់វិញ រួចក្រឡុកចាប់ម្ដងទៀត។ ចំណែក បណ្ណសួរ-ឆ្លើយបែបឌីជីថល អាចប្រើជាកម្មវិធី App វាមានលក្ខណៈដូចបណ្ណសួរ-ឆ្លើយបែបក្រដាសដែលយើងសរសេរដែរ គ្រាន់តែវាមានរយៈពេលកំណត់ពេលឆ្លើយរួច ទើបអាចបន្តទៅសំណួរបន្ទាប់ទៀត។ ២. យកមុខវិជ្ជាមួយមកអាន រួចសរសេរចម្លើយ ឧទាហរណ៍ យើងយកចំណុចណាមួយក្នុងមុខវិជ្ជាជីវវិទ្យាមកអានឱ្យយល់ ដោយកំណត់រយៈពេល៣០នាទី បន្ទាប់មកបិទសៀវភៅ ហើយយកក្រដាស ស មួយមកសរសេរបញ្ចូលអ្វីដែលចេះ ដូចជា និយមន័យ ថ្ងៃខែឆ្នាំ លេខ និងចំណុចសំខាន់ៗ។ បន្ទាប់ពីសរសេរអស់ចិត្តហើយ ចាប់ផ្ដើមបើកសៀវភៅឡើងវិញ ដើម្បីប្រៀបធៀបចម្លើយដែលបានសរសេរ ថា ត្រូវបានប៉ុន្មានភាគរយ ឬខ្វះចន្លោះចំណុចណាខ្លះ។ ៣. រំលឹកមេរៀនជាមួយមិត្តភក្ដិ៖ យើងអាចសួរសំណួរជាមួយមិត្តភក្ដិនៅសាលា ឬសួរគ្នាតាមទូរស័ព្ទទៅវិញទៅមក ព្រោះអាចជួយជំរុញឱ្យការរំលឹកមេរៀនឆាប់ចាំ និងមានភាពសប្បាយរីករាយ។ ៤. បង្រៀនមេរៀនទៅអ្នកដទៃ ដើម្បីដឹងថា យើងចេះមេរៀនកម្រិតណា? ជាពិសេស យើងអាចកត់រូបមន្តតាមមុខវិជ្ជាសំខាន់ៗ ដូចជា គណិតវិទ្យា រូបវិទ្យា គីមីវិទ្យា សំណួរប្រវត្តិវិទ្យា មកបិទនៅកន្លែងដែលអាចមើលឃើញ មិនថាកន្លែងតុរៀន លើជញ្ជាំង ឬក្នុងបន្ទប់ទឹក។
អតីតសិស្សនិទ្ទេសA រូបនេះ បញ្ជាក់ថា មួយខែមុនប្រឡងបាក់ឌុប បេក្ខជនប្រឡមិនគួរចេញទៅដើរលេងខាងក្រៅឆ្ងាយពេកទេ ដើម្បីបង្ការគ្រោះថ្នាក់ជាយថាហេតុ។ លើសពីនេះ ត្រូវថែរក្សាសុខភាព កុំឱ្យធ្លាក់ខ្លួនឈឺ ព្រោះយើងខំរៀនតាំងពីថ្នាក់មត្តេយ្យ ដល់ថ្ងៃប្រឡងបើឈឺមិនអាចទៅប្រឡងបាន គឺនឹងនាំឱ្យខាតពេលវេលា។ នៅពេលស្រ្តេស អាចស្ដាប់តន្រ្តីដែលខ្លួនចូលចិត្ត ដើម្បីបន្ធូរអារម្មណ៍តានតឹង។
យុវតី ឡៅលុន លីម៉ីម៉ី លើកឡើងទៀតថា អំឡុងពេលប្រឡង ប្អូនៗជាបេក្ខជនត្រូវធ្វើតាមការណែនាំរបស់អនុរក្សទាំងស្រុង។ សម្រាប់មុខវិជ្ជាវិទ្យាសាស្រ្ត ឬមុខវិជ្ជាឆ្លើយសំណួរ ដើម្បីយកពិន្ទុល្អ ត្រូវដោះស្រាយលំហាត់ ឬឆ្លើយសំណួរឱ្យបានគ្រប់សំណួរ ដោយមិនទុកក្រដាសឱ្យនៅទទេឡើយ។
អតីតសិស្សនិទ្ទេសA ឆ្នាំ២០២៤ ក៏បានលើកទឹកចិត្តដល់សិស្សប្អូនដែលត្រៀមប្រឡងបាក់ឌុបទាំងអស់ ត្រូវខិតខំប្រឹងប្រែងរៀនសូត្រ ព្រោះមិនមែនដើម្បីគ្រាន់តែប្រឡងឱ្យជាប់នោះទេ តែរៀនដើម្បីស្គាល់ថា យើងជានរណា? អាចធ្វើអ្វីបានខ្លះ? ហើយថ្ងៃអនាគតចង់ក្លាយជាអ្វី? ឧទាហរណ៍ គ្រូពេទ្យ វិស្វករ…។ ដូច្នេះ ភាពជោគជ័យក្នុងជីវិត មិនកំណត់ដោយសារនិទ្ទេសបាក់ឌុបនោះឡើយ តែកំណត់ពីការខំប្រឹង ភាពក្លាហានរបស់យើង។ ប្រសិនគេអាចធ្វើបាន ត្រូវជឿថា យើងក៏អាចធ្វើបាន!៕
