ឱកាសសម្រាប់សិស្ស និស្សិត​កម្ពុជា​ដែល​ចង់បន្តការសិក្សា​នៅ​ចក្រភពអង់គ្លេស ពេលនេះ កម្មវិធី Salford International Excellence Scholarship បានប្រកាសផ្តល់អាហារូបករណ៍ថ្នាក់បរិញ្ញាបត្រ និងបរិញ្ញាបត្រជាន់ខ្ពស់ សម្រាប់ការ​សិក្សា​នៅសាកលវិទ្យាល័យ Salford ឆ្នាំសិក្សា ២០២៥-២០២៦។ អាហារូបករណ៍ផ្ដល់ជូនការគាំទ្រការសិក្សាពេញលេញ និងផ្ដល់​ឱកាសជាច្រើនសម្រាប់និស្សិតក្នុងកំឡុងពេលសិក្សា។

លក្ខខណ្ឌក្នុងការជ្រើសរើស ៖ បេក្ខជនជានិស្សិតអន្តរជាតិគ្រប់ជាតិសាសន៍, មានប្រវត្តិការសិក្សាល្អ និងពាក់ព័ន្ធជាមួយជំនាញដែលបេក្ខជននឹងស្នើទៅសិក្សា។ បេក្ខជន បេក្ខនារី គួរតែពិនិត្យ និងតាមដានព័ត៌មានបន្ថែមឱ្យកាន់តែច្បាស់ចំពោះឯកសារចាំបាច់ដែលអាហារូបករណ៍ត្រូវការ ទៅតាមមុនជំនាញសិក្សា។ ជាមួយគ្នានេះ បេក្ខជនត្រូវមានសញ្ញាបត្រមធ្យមសិក្សាទុតិយភូមិសម្រាប់ថ្នាក់បរិញ្ញាបត្រ និងត្រូវមានសញ្ញាបត្របរិញ្ញាបត្រសម្រាប់ថ្នាក់បរិញ្ញាបត្រជាន់ខ្ពស់។

ដើម្បីធ្វើការដាក់ពាក្យ បេក្ខជនត្រូវឆ្លងកាត់ដំណាក់កាលចំនួន៤ ដោយ ដំណាក់កាលទី១ បេក្ខជនត្រូវធ្វើការស្នើពាក្យទៅកាន់សាកលវិទ្យាល័យ ចំពោះមុខជំនាញដែលចង់សិក្សានៅសាកលវិទ្យាល័យ Salford និងត្រូវប្រាកដថា អ្នកទទួលបានការអនុញ្ញាត្តិការសិក្សាមុនពេលស្នើពាក្យអាហារូបករណ៍។ ដំណាក់កាលទី២ ក្រោយទទួលបានការអនុញ្ញាត្តិពីសាកលវិទ្យាល័យ  បេក្ខជនត្រូវស្នើពាក្យស្នើសុំអាហារូបករណ៍តាមរយៈ Online និងភ្ជាប់ជាមួយនឹងឯកសារចាំបាច់ដែលកម្មវិធីអាហារូបករណ៍ត្រូវការចាំបាច់។ ដំណាក់កាលទី៣ បេក្ខជនត្រូវរៀបចំឯកសារចាំបាច់សម្រាប់កម្មវិធីអាហារូបករណ៍ រួមមាន ច្បាប់ចម្លងនៃលិខិតការសិក្សាពីសាកលវិទ្យា Salford, ភស្តុតាងនៃលក្ខណៈសម្បត្តិសិក្សា (ប្រតិចារិក និងវិញ្ញាបនបត្រ) សេចក្ដីថ្លែងការណ៍ផ្ទាល់ខ្លួន (ពន្យល់ពីមូលហេតុដែលអ្នកគួរតែទទួលបានអាហារូបករណ៍ និងគម្រោងរួមចំណែកដល់សហគមន៍នៃសាកលវិទ្យាល័យ) លិខិតបញ្ជាក់ភាសាអង់គ្លេស (IELTS) និងឯកសារចាំបាច់ផ្សេងទៀតតាមមុខជំនាញសិក្សា។ ក្រោយដាក់ពាក្យ នៅដំណាក់ទី៤ បេក្ខជន បេក្ខនារី ត្រូវរងចាំការជូនដំណឹងពីភាគីអាហារូបករណ៍ និងសាកលវិទ្យាល័យ និងទទួលបានការណែនាំបន្ថែមអំពីរបៀបបន្តការសិក្សា។

សម្រាប់ព័ត៌មានបន្ថែមអាចចូលទៅកាន់ https://www.salford.ac.uk/international/scholarships/global-gold-excellence-scholarship ។ ចាប់ទទួលពាក្យពីថ្ងៃផ្សាយដំណឹងនេះរហូតដល់ថ្ងៃទី១៥ ខែសីហា ឆ្នាំ២០២៥៕