កម្មវិធីអាហារូបករណ៍រដ្ឋាភិបាលអូស្ត្រាលីឆ្នាំសិក្សា២០២៦ ចាប់បើកទទួលពាក្យសម្រាប់សិស្ស និសិ្សត និងសាធារណជនកម្ពុជាហើយ។ អាហារូបករណ៍ផ្ដល់ជូនការសិក្សាថ្នាក់បរិញ្ញាបត្រជាន់ខ្ពស់ និងថ្នាក់បណ្ឌិត នៅសាកលវិទ្យាល័យជាច្រើនក្នុងប្រទេសអូស្ដ្រាលី។

លក្ខខណ្ឌក្នុងការជ្រើសរើស ៖ បេក្ខជនទាំងពីរភេទត្រូវមានសញ្ជាតិខ្មែរ ចំពោះ ស្ត្រី ជនមានពិការភាព មនុស្សដែលរស់នៅ និងធ្វើការក្រៅរាជធានីភ្នំពេញ ជនជាតិដើមភាគតិច និងជនជាតិដើមភាគតិច LGBTQIA+ និងក្រុមដែលខ្វះខាតផ្សេងទៀតត្រូវបានលើកទឹកចិត្តឱ្យដាក់ពាក្យអាហារូបករណ៍អូស្ត្រាលី។ ជាមួយគ្នានេះ បេក្ខជនបានស្នាក់នៅយ៉ាងតិច២ឆ្នាំក្នុងប្រទេសកម្ពុជា(មុនថ្ងៃបិទទទួលពាក្យអាហារូបករណ៍) មានបទពិសោធន៍ការងារពេញម៉ោងយ៉ាងតិច២ឆ្នាំ ឬសមមូល។ សម្រាប់អ្នកស្នើពាក្យថ្នាក់បរិញ្ញាបត្រជាន់ខ្ពស់ត្រូវមានសញ្ញាបត្រថ្នាក់បរិញ្ញាបត្រ មានពិន្ទុ IELTS ៦.០ឡើងទៅ , សម្រាប់អ្នកស្នើថ្នាក់បណ្ឌិតត្រូវមានសញ្ញាបត្រថ្នាក់បរិញ្ញាបត្រជាន់ខ្ពស់ មាន IELTS ៦.៥ឡើងទៅ។

បេក្ខជន បេក្ខនារីអាចស្នើពាក្យទៅសិក្សាជំនាញដែលអាហារូបករណ៍ផ្ដល់ឱ្យជាច្រើនជំនាញដែលអាស្រ័យលើបញ្ហាប្រឈមនៃការអភិវឌ្ឍន៍នៅគ្រប់វិស័យនៃប្រទេសកម្ពុជា លើកលែងតែជំនាញមួយចំនួនដែលអាហារូបករណ៍មិនមានផ្ដល់ជូនដូចជា បរិញ្ញាបត្រជាន់ខ្ពស់ប្រតិបត្តិ បរិញ្ញាបត្រជាន់ខ្ពស់អន្តរជាតិ បរិញ្ញាបត្រជាន់ខ្ពស់គ្រប់គ្រងពាណិជ្ជកម្មអន្តរជាតិ បរិញ្ញាបត្រជាន់ខ្ពស់គ្រប់គ្រងពាណិជ្ជកម្ម បរិញ្ញាបត្រជាន់ខ្ពស់ពាណិជ្ជកម្ម បរិញ្ញាបត្រជាន់ខ្ពស់ពាណិជ្ជកម្មកម្រិតខ្ពស់ បរិញ្ញាបត្រជាន់ខ្ពស់ពាណិជ្ជកម្ម (ឯកទេស) បរិញ្ញាបត្រជាន់ខ្ពស់នៃការវិភាគអាជីវកម្ម បរិញ្ញាបត្រជាន់ខ្ពស់សេដ្ឋកិច្ចពាណិជ្ជកម្ម បរិញ្ញាបត្រជាន់ខ្ពស់ព័ត៌មានធុរកិច្ច បរិញ្ញាបត្រជាន់ខ្ពស់គ្រប់គ្រងអាជីវកម្ម បរិញ្ញាបត្រជាន់ខ្ពស់គ្រប់គ្រងដំណើរការអាជីវកម្ម។

អត្ថប្រយោជន៍ដែលបេក្ខភាពជ័យលាភីអាហារូបករណ៍ទទួលបានពីកម្មវិធីអាហារូបករណ៍អូស្ត្រាលី រួមមាន សំបុត្រយន្តហោះ (ទៅមក កម្ពុជា-អូស្ត្រាលី) ថ្លៃសិក្សាពេញលេញ ការចំណាយលើការរស់នៅ ការបណ្ដុះបណ្ដាលភាសាអង់គ្លេស និងកម្មវិធីសិក្សាត្រៀម ធានារ៉ាប់រងសុខភាព ជំនួយបន្ថែមលើផ្នែកសិក្សា និងប្រាក់ឧបត្ថម្ភការងារ (សម្រាប់និស្សិតស្រាវជ្រាវ)។

បេក្ខជន បេក្ខនារីដែលមានចំណាប់អារម្មណ៍លើការដាក់ពាក្យអាហារូបករណ៍ អាចចូលទៅកាន់ https://oasis.dfat.gov.au/ ។ សម្រាប់ព័ត៌មានបន្ថែមអាចចូលទៅកាន់ https://www.australiaawardscambodia.org/scholarships/ ។

ចាប់ទទួលពាក្យពីថ្ងៃផ្សាយដំណឹងរហូតដល់ថ្ងៃទី៣០ ខែមេសា ឆ្នាំ២០២៥៕