ក្រសួងអប់រំ យុវជន និងកីឡា បានសម្ពោធដាក់ឱ្យដំណើរការជាផ្លូវការអគារមជ្ឈមណ្ឌលជាតិបណ្តុះធុរកិច្ចថ្មីនៃកម្ពុជា (NICC) ដែលមានទីតាំងនៅក្នុងបរិវេណសាកលវិទ្យាល័យភូមិភ្នំពេញ គាំទ្រដោយភ្នាក់ងារសហប្រតិបត្តិការអន្តរជាតិកូរ៉េ (KOICA) ដើម្បីលើកកម្ពស់ការបណ្តុះបណ្តាលធនធានមនុស្សដោយផ្អែកលើបច្ចេកវិទ្យាឌីជីថល។

ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្រ្តីក្រសួងអប់រំ យុវជន និងកីឡា  បានសម្តែងក្តីរំភើបរីករាយ និងថ្លែងអំណរគុណយ៉ាងជ្រាលជ្រៅចំពោះរដ្ឋាភិបាលសាធារណរដ្ឋកូរ៉េ ដែលបានគាំទ្រ និងកសាង “មជ្ឈមណ្ឌលជាតិបណ្តុះធុរកិច្ចថ្មីនៃកម្ពុជា” នេះឡើង សំដៅលើកកម្ពស់ការងារស្រាវជ្រាវ ការងារបង្រៀន និងរៀន និងការបង្កើតបំណិនរកប្រាក់ចំណូលរបស់និស្សិតសម្រាប់ទ្រទ្រង់ការសិក្សា។ ទន្ទឹមគ្នានេះ បង្កើតបាននូវភាពច្នៃប្រឌិតថ្មីៗ សហគ្រិនភាព និងការបណ្តុះភាពក្លាហានដល់និស្សិតក្នុងការបង្កើតក្តីស្រមៃរបស់ខ្លួន និងចូលរួមចំណែកក្នុងការអភិវឌ្ឍសង្គម-សេដ្ឋកិច្ច ប្រកបដោយប្រសិទ្ធភាព និងចីរភាព។

រដ្ឋមន្រ្តីក្រសួងអប់រំ បញ្ជាក់បន្ថែមថា ការចាប់ដៃគូរវាងសាកលវិទ្យាល័យ និងវិស័យឯកជន នឹងផ្តល់ប្រយោជន៍ជាអតិបរិមា ដល់អ្នកផលិត និងអ្នកប្រើប្រាស់ ជាពិសេសការគាំទ្រដល់មូលនិធិស្រាវជ្រាវ ដើម្បីបង្កើតថ្នាលនវានុវត្តន៍ និងកាលានុវត្តន៍ភាពដល់វិស័យឯកជន សំដៅធានាបានឧត្តមភាពប្រកួតប្រជែង និងការពង្រឹងគុណភាពឧត្ដមសិក្សានៅកម្ពុជា។ លើសពីនេះ លើកកម្ពស់ការផ្តល់សេវាអប់រំនៅកម្រិតឧត្តមសិក្សាឱ្យកាន់តែសម្បូរបែប ការផ្សារភ្ជាប់ទ្រឹស្ដីទៅនឹងការអនុវត្តជាក់ស្តែង ឆ្ពោះទៅបង្កើតបាននូវនវានុវត្តន៍ ការប្រកួតប្រជែង សេដ្ឋកិច្ច និងកាលានុវត្តភាពសម្រាប់ការអភិវឌ្ឍសេដ្ឋកិច្ចកម្ពុជា។

ឯកឧត្ដម Chang Won Sam ប្រធានទីភ្នាក់ងារសហប្រតិបត្តិការអន្តរជាតិកូរ៉េ (KOICA) បានលើកឡើងថា មជ្ឈមណ្ឌលជាតិបណ្ដុះធុរកិច្ចថ្មីនៅកម្ពុជាដែលសម្ពោធដាក់ឱ្យប្រើប្រាស់ជាផ្លូវការនេះ គឺជាការឆ្លើយតបនឹងមុំទីមួយនៃយុទ្ធសាស្ត្របញ្ចកោណរបស់រាជរដ្ឋាភិបាលកម្ពុជា ដែលមានគោលដៅ លើកកម្ពស់ការបណ្តុះបណ្តាលធនធានមនុស្សដែលផ្អែកលើបច្ចេកវិទ្យាឌីជីថល សម្របសម្រួលការចាប់ផ្តើមអាជីវកម្ម Startup ការបង្កើតការងារនៅក្នុងប្រទេសកម្ពុជា (មុំទីបីនៃយុទ្ធសាស្ត្របញ្ចកោណ) និង រៀបចំសម្រាប់ការផ្លាស់ប្តូរទៅកាន់ឧស្សាហកម្មបច្ចេកវិទ្យាខ្ពស់ ស្របនឹងគោលនយោបាយអភិវឌ្ឍន៍ឧស្សាហកម្ម ឆ្នាំ២០២៥ និង រួមចំណែកដល់ការអភិវឌ្ឍសេដ្ឋកិច្ច និងសង្គមឌីជីថលនៅកម្ពុជា (មុំទីប្រាំនៃយុទ្ធសាស្ត្របញ្ចកោណ)។

ជាមួយគ្នានេះ ដើម្បីឱ្យមជ្ឈមណ្ឌលជាតិបណ្ដុះធុរកិច្ចថ្មីនៅកម្ពុជា (NICC) អាចបំពេញភារកិច្ចដែលបានកំណត់ដោយជោគជ័យ ឯកឧត្តមប្រធាន KOICA បានស្នើឱ្យបន្តខិតខំប្រឹងប្រែងដើម្បីចែករំលែកបច្ចេកវិទ្យា និងបង្កើតបណ្ដាញទំនាក់ទំនង ដើម្បីជំរុញធ្វើឱ្យប្រព័ន្ធអេកូឡូស៊ីចាប់ផ្តើមដំណើរការរលូន និងមិនអាចខ្វះបានឡើយការចូលរួមគាំទ្រ និងការណែនាំពីក្រសួងអប់រំ យុវជន និងកីឡា និងសាកលវិទ្យាល័យភូមិន្ទភ្នំពេញ។

គួរជម្រាបជូនថា អគារមជ្ឈមណ្ឌលជាតិបណ្តុះធុរកិច្ចថ្មីនៅកម្ពុជា (NICC) នឹងក្លាយជាសក្ខីភាពបន្ថែមថ្មីមួយទៀតនៃចំណងមិត្តភាពដ៏រឹងមាំរវាងកម្ពុជា និងសាធារណរដ្ឋកូរ៉េ។ ក្នុងនោះ ក្រសួងអប់រំ នឹងចូលរួមសហការជាមួយសាកលវិទ្យាល័យភូមិន្ទភ្នំពេញ ដើម្បីបម្រើផលប្រយោជន៍ដល់យុវជន និស្សិត និងសង្គមជាតិនៃប្រទេសទាំង ដើម្បីជំរុញកិច្ចសហប្រតិបត្តិការលើការផ្ទេរ និងចាប់យកបច្ចេកវិទ្យាឌីជីថលថ្មីៗ សម្រាប់បម្រើធុរកិច្ចក្នុងយុគសម័យសង្គមឌីជីថល ឆ្លើយតបទៅនឹងក្របខ័ណ្ឌគោលនយោបាយសេដ្ឋកិច្ច និងសង្គមឌីជីថល បរិវត្តកម្មឌីជីថល និងចក្ខុវិស័យអភិវឌ្ឍជាតិកម្ពុជា៕