​អ្នកជំនាញ​វិស័យ​អប់រំ​បាន​អំពាវនាវ​ឱ្យ​គ្រឹះស្ថាន​សិក្សា​នៅ​កម្ពុជា​ផ្លាស់ប្តូរ​ពី​ការ​រៀន​ផ្អែក​លើ​ការ​ទន្ទេញ​ ​ទៅជា​ការ​រៀន​បែប​ «​ការ​គិត​ឆ្លុះបញ្ចាំង​» ​(​Reflective​ ​Thinking​) ​ដើម្បី​ជួយ​សិស្ស​អភិវឌ្ឍ​សមត្ថភាព​គិត​វិភាគ​ ​យល់ដឹង​កាន់តែ​ស៊ីជម្រៅ​ ​ចងចាំ​បាន​យូរ​ ​និង​ត្រៀមខ្លួន​សម្រាប់​ការ​រៀន​ពេញ​មួយ​ជីវិត។​

​ការ​លើកឡើង​នេះ​ធ្វើឡើង​ក្នុង​សិក្ខាសាលា​ក្រោម​ប្រធានបទ​ «​ជំហាន​ទាំង​៧​ ​ដែល​ធ្វើឱ្យ​សិស្ស​រៀន​ឆាប់​ចេះ​បំផុត​៖​ ​ការ​ឆ្លុះបញ្ចាំង​អាច​ផ្លាស់ប្តូរ​លទ្ធផល​រៀនសូត្រ​គ្រប់​យ៉ាង​» ​ដែល​រៀបចំ​ដោយ​សមាគម​សហប្រតិបត្តិការ​ដើម្បី​ជំរុញ​ការ​អប់រំ​ កម្ពុជា​-​អាស៊ាន​-​ចិន ​(​CACE​) ​សហការ​ជាមួយ​សាលា​ភ្នំពេញ​ម៉ុន​តែ​សសូរី​អន្តរជាតិ​ ​នៅ​រាជ​បណ្ឌិត្យ​សភា​កម្ពុជា​ ​កាលពី​ថ្ងៃទី​១៦​ ​ខែកក្កដា។​

​លោក​បណ្ឌិត​ សរ ​រិទ្ធី​ ​ប្រធាន​ ​CACE​ ​មានប្រសាសន៍​ថា​ វិធីសាស្ត្រ​បង្រៀន​បែប​ប្រពៃណី​ដែល​ផ្តោត​លើ​ការ​ចងចាំ​មេរៀន​ ​មិន​អាច​ឆ្លើយតប​បាន​ពេញលេញ​ទៅនឹង​តម្រូវការ​នៃ​សម័យ​ឌីជីថល ​ដែល​ទាមទារ​ឱ្យ​អ្នក​សិក្សា​មាន​សមត្ថភាព​គិត​វិភាគ ​ច្នៃប្រឌិត​ ​និង​ដោះស្រាយ​បញ្ហា​បាន​ឡើយ។​

​លោក​បាន​ពន្យល់​ថា​ «​ការ​គិត​ឆ្លុះបញ្ចាំង​» ​គឺជា​ដំណើរការ​ដែល​អ្នកសិក្សា​ពិនិត្យ​ ​ពិចារណា​ ​និង​វិភាគ​បទពិសោធន៍​របស់​ខ្លួន​ ​ដើម្បី​ស្វែងយល់​ពី​អ្វី​ដែល​បាន​រៀន​ ​កែលម្អ​វិធី​សិក្សា​ ​និង​អនុវត្ត​ចំណេះដឹង​ឱ្យ​មាន​ប្រសិទ្ធភាព​ជាង​មុន។​

​លោក​បន្ត​ថា​ ​វិធីសាស្ត្រ​នេះ​មិន​ត្រឹមតែ​ផ្តល់​ចំណេះដឹង​ដល់​សិស្ស​ប៉ុណ្ណោះ​ទេ​ ​ប៉ុន្តែ​ថែមទាំង​ជួយ​ឱ្យ​ពួកគេ​ស្គាល់​ពី​ដំណើរការ​គិត​របស់​ខ្លួន​ អភិវឌ្ឍ​ជំនាញ​ដោះស្រាយ​បញ្ហា​ ​និង​បង្កើត​ទម្លាប់​រៀន​ដោយ​ខ្លួនឯង។​

​លោក​ ​គូន ​ចំរើន​ ស្ថាបនិក​ ​UCGE​ ​និង​ជា​នាយក​សាលា​ភ្នំពេញ​ម៉ុន​តែ​សសូរី​អន្តរជាតិ​ ​បាន​ឱ្យដឹង​ថា​ ​ការ​នាំយក​កម្មវិធី​ ​Upschool​ ​Australia​ ​ដែល​ដឹកនាំ​ដោយ​លោក​ ​Gavin​ ​McCormack​ ​មក​អនុវត្ត​នៅ​កម្ពុជា​ ​គឺ​ដោយសារ​សាលា​មើលឃើញ​សារៈសំខាន់​ ​នៃ​វិធីសាស្ត្រ​អប់រំ​ទំនើប​ ដែល​ផ្តោត​លើ​ការ​អភិវឌ្ឍ​សមត្ថភាព​គិត​របស់​សិស្ស។​

​លោក​បញ្ជាក់​ថា​ ​កម្មវិធី​នេះ​ត្រូវបាន​អនុវត្ត​រយៈពេល​១២​ខែ ​និង​ទទួលបាន​លទ្ធផល​វិជ្ជមាន​ ​ដោយ​ជួយ​ឱ្យ​សិស្ស​ផ្លាស់ប្តូរ​ពី​ការ​រៀន​ដោយ​ទន្ទេញ​ ​ទៅជា​ការ​រៀន​ដើម្បី​យល់​ ​អនុវត្ត​ ​និង​ដោះស្រាយ​បញ្ហា​ជាក់ស្តែង។​

​លោក​បន្ថែម​ថា​ ​កម្មវិធី​នេះ​ក៏​បាន​ជួយ​លើកទឹកចិត្ត​ឱ្យ​សិស្ស​ហ៊ាន​សួរ​សំណួរ​ ​បញ្ចេញមតិ ​និង​ចូលរួម​យ៉ាង​សកម្ម​ក្នុង​ដំណើរការ​សិក្សា។​

​ឯកឧត្តម​បណ្ឌិត​ ​ប្រាក់​ កុសល ​អគ្គ​លេខាធិការ​រង​នៃ​គណៈកម្មាធិការ​ជាតិ​គាំពារ​ និង​អភិវឌ្ឍ​កុមារ​តូច​ នៃ​ក្រសួង​អប់រំ ​យុវជន​ និង​កីឡា ​បាន​គាំទ្រ​គំនិត​ផ្តួចផ្តើម​នេះ​ ​ដោយ​ចាត់ទុក​ថា​ ​វា​ស្រប​តាម​ចក្ខុវិស័យ​កម្ពុជា​ឆ្នាំ​២០៣០​ ​និង​ឆ្នាំ​២០៥០​ ​ក្នុង​ការ​អភិវឌ្ឍ​ធនធាន​មនុស្ស​ដែល​មាន​គុណភាព​ ​និង​សមត្ថភាព​ប្រកួតប្រជែង។​

​ឯកឧត្តម​បណ្ឌិត​ ​យង់ ​ពៅ ​អគ្គ​លេខាធិការ​រាជ​បណ្ឌិត្យ​សភា​កម្ពុជា​ ​បាន​លើកឡើង​ថា​ ​ការ​គិត​ឆ្លុះបញ្ចាំង​ជា​ជំនាញ​ចាំបាច់​សម្រាប់​ធនធាន​មនុស្ស​ក្នុង​សម័យ​ឌីជីថល ​ដែល​ត្រូវការ​សមត្ថភាព​គិត​ដោយ​ឯករាជ្យ ​រៀន​ពី​បទពិសោធន៍​ ​និង​សម្រប​ខ្លួន​ទៅនឹង​ការ​ផ្លាស់ប្តូរ​យ៉ាង​ឆាប់រហ័ស។

​សិក្ខាសាលា​នេះ​មាន​ការ​ចូលរួម​ពី​ថ្នាក់ដឹកនាំ​គ្រឹះស្ថាន​ឧត្តម​សិក្សា​ ​និង​សាលា​អន្តរជាតិ​ចំនួន​២៣​ស្ថាប័ន​ ព្រមទាំង​និស្សិត​ពី​រាជ​បណ្ឌិត្យ​សភា​កម្ពុជា​ ​និង​សាកលវិទ្យាល័យ​បូណាម៉ារី ​(​BMU​) ​សរុប​ប្រមាណ​១៧០​នាក់។​

​ក្នុង​ឱកាស​នោះ​ ​CACE​ ​និង​មជ្ឈមណ្ឌល​អប់រំ​សាក​ល ​អាប់​ស្គូល​ ​កម្ពុជា​ ​(​Upschool​-​Cambodia​ ​for​ ​Global​ ​Education​ ​-​ ​UCGE​) ​បាន​ចុះ​អនុស្សរណៈ​នៃ​ការ​យោគយល់​គ្នា​ ​(​MoU​) ​ជាមួយ​ស្ថាប័ន​អប់រំ​ចំនួន​៨​ ​ដើម្បី​ពង្រឹង​កិច្ចសហប្រតិបត្តិការ​ ការ​ចែករំលែក​ចំណេះដឹង​ ​និង​ការ​លើកកម្ពស់​ន​វានុវត្តន៍​ក្នុង​វិស័យ​អប់រំ​នៅ​កម្ពុជា។​

​តាមរយៈ​កិច្ចសហប្រតិបត្តិការ​នេះ​ ​UCGE​ ​បាន​ចុះ​ ​MoU​ ​ជាមួយ​ស្ថាប័ន​អប់រំ​រួមមាន​ ​The​ ​Brainiac​ ​Factory​, ​Ed​ ​First​ ​School​, ​Step​ ​Forward​ ​International​ ​School​, ​Vision​ ​Bridge​ ​International​ ​Academy​, ​True​ ​Vision​ ​International​ ​School​, ​សាលា​ទី​១​ ​អន្តរជាតិ​ ​កម្ពុជា​ ​អាមេរិកាំង​ ​និង​សាលា ​CCIIS​ ​អន្តរជាតិ​ ​ខណៈ​ ​CACE​ ​និង​ ​UCGE​ ​ក៏​បាន​ចុះ​ ​MoU​ ​រួមគ្នា​ ​ដើម្បី​ពង្រឹង​បណ្តាញ​សហប្រតិបត្តិការ​អប់រំ​ផងដែរ៕