ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
តាមការគ្រោងទុកនាវាបណ្ណាល័យចល័ត Doulos Hope ផ្ទុកសៀវភៅចំណេះដឹងទូទៅចម្រុះប្រមាណជា ៥ពាន់ចំណងជើងនឹងធ្វើដំណើរមកដល់កំពង់ផែខេត្តព្រះសីហនុនៅថ្ងៃទី១៥ ខែធ្នូនេះហើយ ។ នាវាបណ្ណាល័យនឹងបើកទទួលសាធារណជនចូលទស្សនា និងអានសៀវភៅនានាចាប់ពីថ្ងៃចូលចត រហូតដល់ថ្ងៃទី១២ ខែមករា ឆ្នាំ២០២៤ ។ គោលបំណងសំខាន់របស់នាវា Doulos Hope គឺមកបំពេញបេសកកម្មលើកកម្ពស់អក្ខរកម្មឱ្យកាន់តែស្រស់បំព្រងនៅតំបន់អាស៊ី និងលើកកម្ពស់អក្ខរកម្មឱ្យកាន់តែប្រសើរឡើង ។ នេះបើតាមព័ត៌មានរបស់អង្គការសប្បុរសធម៌អាឡឺម៉ង់ GBA Ships ដែលគ្រប់គ្រងលើប្រព័ន្ធប្រតិបត្តិការនាវា ។
អង្គការសប្បុរសធម៌អាឡឺម៉ង់ GBA Ships បានយកឈ្មោះមកពីពាក្យពេញពីភាសាអាឡឺម៉ង់ថា Gute Bücher für Alle ប្រែជាភាសាអង់គ្លេសថា Good Books for All ឬមានន័យជាភាសាខ្មែរថា “សៀវភៅល្អសម្រាប់ទាំងអស់គ្នា” ។ អង្គការគាំទ្រលើកកម្ពស់សកម្មភាពអប់រំនេះមានមូលដ្ឋាននៅទីក្រុង Mosbach នៃសាធារណរដ្ឋអាឡឺម៉ង់ ។
អង្គការ GBA Ships មានគោលដៅជំរុញការអានឱ្យកាន់តែទូលំទូលាយសម្រាប់មនុស្សគ្រប់រូប ស្របនឹងពាក្យស្លោកថា “បង្កើនចំណេះដឹង ផ្តល់ជំនួយ និងក្តីសង្ឃឹម”។ នាវាបណ្ណាល័យចល័ត Doulos Hope របស់ GBA Ships មានផ្ទុកសៀវភៅអានច្រើនប្រភេទ និងមានបែងចែកទៅតាមផ្នែកសៀវភៅនីមួយៗ ដោយលក្ខណៈវិទ្យាសាស្ត្រ ព្រមទាំងមានសកម្មភាពជាច្រើនគាំទ្រដល់សកម្មភាពអំណាន ។
ប្រសិនបើសាធារណជនមានបំណងចូលអានសៀវភៅនៅក្នុងនាវា Doulos Hope នោះនឹងជួបសៀវភៅអានជាច្រើន ដែលសៀវភៅទាំងនោះជាប្រភេទសៀវភៅទើបចេញថ្មី ហើយមួយផ្នែកជាប្រភេទសៀវភៅទទួលបានពីសកម្មភាពបរិច្ឆាគរបស់អ្នកអាន ។ មិនតម្រូវឱ្យបង់ប្រាក់ឡើយសម្រាប់អ្នកអាន ផ្ទុយទៅវិញបណ្ណារក្សនៅក្នុងបណ្ណាល័យនានានឹងជួយសម្របសម្រួលព័ត៌មានផ្សេងៗដល់អ្នកអាន ។ ទន្ទឹមគ្នានេះ អ្នកទស្សនាពិភពអំណានក៏អាចជាវសៀវភៅណាមួយដែលខ្លួនពេញចិត្តពីនាវាបណ្ណាល័យចល័ត Doulos Hope បានផងដែរ ។
នាវាបណ្ណាល័យចល័ត Doulos Hope បានអភិវឌ្ឍន៍ឡើងចាប់តាំងពីឆ្នាំ១៩៧០ និងបានចូលចតនៅតាមកំពង់ផែជាង ៤៨០កន្លែងនៅប្រទេសជាង ១៥០ ព្រមទាំងមានអ្នកចូលទស្សនាសរុបជាង ៤៨លាននាក់ ។ នេះបើតាមព័ត៌មាននៅឆ្នាំ២០២៣ របស់នាវា Doulos Hope ។ បន្ថែមលើនេះ នាវា Doulos Hope នាវិកអន្តរជាតិ និងបុគ្គលិកអ្នកស្ម័គ្រចិត្តមកពី ៦០ប្រទេសជុំវិញពិភពលោក ។ តាមរយៈការងារស្ម័គ្រចិត្តលើនាវា អ្នកទស្សនាក៏មានឱកាសទូលំទូលាយលើកកម្ពស់អក្ខរកម្ម និងការអប់រំ, បង្កើនកិច្ចសហប្រតិបត្តិការអន្តរវប្បធម៌, និងលើកកម្ពស់ការយល់ដឹងពីសង្គម, ព្រមទាំងលើកទឹកចិត្តឱ្យមនុស្សកសាងសេចក្តីល្អដល់គ្នាទៅវិញទៅមក ។
គួរបញ្ជាក់ថា នាវាចល័ត Doulos Hope មានប្រវែង ៨៥,៥ម៉ែត្រ និងទទឹង ១៤ម៉ែត្រ ផ្ទុកចំណុះទម្ងន់ ៣,៣៧០តោន ។ នាវា Doulos Hope គឺជានាវាទីប្រាំនៅក្នុងកងនាវា GBA Ships របស់អាល្លឺម៉ង់ បេសកកម្មស្នូល “លើកកម្ពស់អក្ខរកម្ម ការអប់រំ និងបង្កើតកិច្ចសហប្រតិបត្តិការឆ្លងវប្បធម៌នៅទូទាំងអាស៊ីអាគ្នេយ៍” ។
មុននឹងមកដល់កម្ពុជា នាវាចល័ត Doulos Hope កំពុងចតនៅកំពង់ផែប្រទេសថៃ ហើយមុនពេលចូលដល់ប្រទេសថៃ នាវាចល័ត Doulos Hope បានចូលចតនៅកំពង់ផែប្រទេសម៉ាឡេស៊ី ។ នាវា Doulos Hope និងនាវា Logos Hope មានបេសកកម្មដូចគ្នា ប្រៀបដូចបងប្អូនជាបងប្អូនបង្កើត ខណៈនាវា Doulos Hope កំពុងបំពេញការងារនៅប្រទេសថៃ នាវាបណ្ណាល័យចល័ត Logos Hope កំពុងបំពេញការងារនៅប្រទេសសិង្ហបុរី ៕
