ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្នុងកិច្ចប្រជុំអនឡាញស្តីពី ការត្រៀមអនុវត្តកម្មវិធីអន្តរជាតិស្តីពីរង្វាយតម្លៃការសិក្សារបស់សិស្ស ឆ្នាំ២០២៥ (PISA 2025) កាលពីពេលកន្លងទៅថ្មីៗនេះ ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា បានផ្ដល់អនុសាសន៍ចំនួន៣ចំណុចដល់ភាគីពាក់ព័ន្ធក្នុងការរៀបចំយន្តការប្រឡងតេស្ត PISA ឆ្នាំ២០២៥ នាពេលខាងមុខនេះ។
ដើម្បីទទួលបានលទ្ធផលល្អប្រសើរនៅក្នុង PISA ២០២៥ ខាងមុខ ឯកឧត្តមបណ្ឌិតសភាចារ្យ ហង់ជួន ណារ៉ុន បានផ្តល់អនុសាសន៍ និងណែនាំពីយន្តការមួយចំនួនរួមមាន៖
ទី១. ការត្រៀមអនុវត្តកម្មវិធីអន្តរជាតិស្តីពីរង្វាយតម្លៃការសិក្សារបស់សិស្សឆ្នាំ២០២៥ (PISA 2025)៖ ថ្នាក់ដឹកនាំក្រសួង និងមន្ទីរអប់រំ យុវជន និងកីឡា រាជធានី ខេត្តទាំងអស់ត្រូវចាត់ទុកកិច្ចការងារតេស្តអន្តរជាតិ PISA ជាកិច្ចការងារអាទិភាពរបស់ក្រសួង និងរាជរដ្ឋាភិបាលទាំងមូល, រៀបចំក្រុមការងារ (មានសមាសភាពមកពីគ្រប់អង្គភាពជំនាញពាក់ព័ន្ធ) ព្រមទាំងរៀបចំកម្មវិធីការងារចុះជួយគាំទ្របំប៉នគ្រូ និងហ្វឹកហាត់សំណួរតេស្តអន្តរជាតិ PISA ដល់សិស្សអាយុ ១៥ឆ្នាំ ឱ្យបានគ្រប់ ១៨៦សាលារៀនសំណាក, នាយកដ្ឋានជំនាញពាក់ព័ន្ធទាំងអស់ ជាពិសេសគម្រោងនានា ត្រូវសម្របសម្រួលផែនការសកម្មភាពរបស់ខ្លួន ដើម្បីរួមសហការក្នុងការចុះជួយសាលារៀនឆ្លើយតបនឹងតេស្តអន្តរជាតិ PISA-2025។
ទី២. ការរៀបចំផែនការសកម្មភាពបំប៉នសិស្សនៅតាមសាលារៀន ដែលត្រូវបានជ្រើសរើសជាសាលារៀនសំណាក ៖ មន្ទីរអប់រំ យុវជន និងកីឡា រាជធានីខេត្ត ទាំងអស់ត្រូវយកគំរូលំហាត់តេស្ត PISA ដែលនាយកដ្ឋានអធិការកិច្ចគុណភាពអប់រំ បានផ្តល់ជូន និងបង្ហោះនៅក្នុងបណ្តាញសង្គម និងតេលេក្រាម ឱ្យដល់សាលារៀនសំណាក ដើម្បីយកទៅបំប៉នសិស្សបន្ត និងចុះជួយសាលារៀនសំណាករៀងៗខ្លួន ដើម្បីឱ្យសាលារៀនសំណាកទទួលបានពិន្ទុ PISA 2025 ខ្ពស់។ លទ្ធផលរបស់សាលារៀនសំណាក នឹងត្រូវប្រើប្រាស់ដើម្បីវាយតម្លៃប្រសិទ្ធភាពការងាររបស់ប្រធានមន្ទីរ និងការលើកទឹកចិត្តផ្តល់ពានជ័យលាភីជាប្រធានមន្ទីរគំរូ។
ទី៣. ការរៀបចំយន្តការគាំទ្រ និងពិនិត្យតាមដាន ការអនុវត្តគំរូសំណួរតេស្ត PISA ៖ នាយកដ្ឋានអធិការកិច្ចគុណភាពអប់រំ នាយកដ្ឋានមធ្យមសិក្សា និងមន្ទីរអប់រំ យុវជន និងកីឡា រាជធានីខេត្ត ត្រូវរៀបចំក្រុមការងារចុះជួយដល់សាលារៀនដែលបានជ្រើសរើស និងលើកទឹកចិត្តឱ្យ គ្រូបង្រៀនល្អ នៅតាមរាជធានីខេត្តនីមួយៗ ដើម្បីចូលរួមជួយក្នុងការហ្វឹកហាត់ឆ្លើយសំណួរតេស្ត PISA។ នាយកដ្ឋានអធិការកិច្ចគុណភាពអប់រំ នាយកដ្ឋានមធ្យមសិក្សា និងមន្ទីរអប់រំ យុវជន និងកីឡា រាជធានីខេត្ត ត្រូវស្រង់ស្ថិតិជាប្រចាំ (តាមសប្តាហ៍) អំពីចំនួនសាលារៀន គ្រូបង្រៀន និងសិស្សានុសិស្ស ដែលបានចូលរួមអនុវត្តការបំប៉នសិស្ស និងហ្វឹកហាត់សំណួរតេស្ត PISA។
សូមជំរាបជូនថា កម្មវិធីអន្តរជាតិស្តីពីរង្វាយតម្លៃលទ្ធផលសិក្សារបស់សិស្ស (PISA) គឺជាការវាស់វែងលើសមត្ថភាពរបស់សិស្សអាយុ ១៥ឆ្នាំ លើមុខវិជ្ជាអំណាន គណិតវិទ្យា និងវិទ្យាសាស្រ្ត ដែលនៅកម្ពុជា សិស្សអាយុ ១៥ឆ្នាំកំពុងសិក្សានៅមធ្យមសិក្សាបឋមភូមិ ពីថ្នាក់ទី៧ ដល់ទី១០។ តេស្តរង្វាយតម្លៃអន្តរជាតិ PISA នេះ វាស់វែងលើសមត្ថភាព ៦កម្រិត ដែលផ្តោតលើសមត្ថភាពយល់ដឹងការស្វែងរកព័ត៌មាន ការចេះគិតពិចារណា និងអាចធ្វើទំនាក់ទំនងរវាងព័ត៌មានក្នុងការសិក្សាជាមួយនឹងចំណេះដឹងប្រចាំថ្ងៃ។
ប្រទេសកម្ពុជាធ្លាប់បានចូលរួមកម្មវិធីនេះចំនួន២លើករួចមកហើយ ដោយលើកទី១ គឺកម្រិតសាកល្បងសម្រាប់ប្រទេសកំពុងអភិវឌ្ឍន៍ នៅឆ្នាំ២០១៧ (PISA-D) និង លើកទី២ នៅឆ្នាំ២០២២។ ដោយនៅឆ្នាំ២០២៥នេះ គឺជាការចូលរួមរបស់កម្ពុជាលើកទី៣ ដែលគ្រោងនឹងធ្វើឡើងនៅសប្តាហ៍ទី៤ ខែមិថុនា ឆ្នាំ២០២៥ ខាងមុខ៕
