ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – ក្នុងជំនួបជាមួយឯកឧត្តម អ៊ិត សំហេង រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ កាលពីរសៀលថ្ងៃពុធ (២៦ មេសា) ឯកឧត្តម ដូមីនិក វីល្លៀម (Dominic Williams) ឯកអគ្គរាជទូតចក្រភពអង់គ្លេសប្រចាំព្រះរាជាណាចក្រកម្ពុជា បានបង្ហើបពីគម្រោងសម្រាប់អភិវឌ្ឍន៍កម្ពុជា ក្នុងការបណ្តុះបណ្តាលជំនាញអេឡិចត្រូនិកជាន់ខ្ពស់។
បើតាមប្រសាសន៍របស់ ឯកឧត្តម ដូមីនិក វីល្លៀម នៅចក្រភពអង់គ្លេស គឺសម្បូរអ្នកជំនាញអេឡិចត្រូនិចជាន់ខ្ពស់ ហើយផលិតផលរបស់អង់គ្លេសដែលនាំចេញភាគច្រើនមានដូចជា រថយន្ត គ្រឿងម៉ាស៊ីន គ្រឿងអគ្គិសនី និងគ្រឿងអេឡិចត្រូនិកជាដើម។
ជាមួយគ្នានេះដែរ ឯកអគ្គរាជទូតអង់គ្លេស ក៏បានបញ្ជាក់ដែរថា ចក្រភពអង់គ្លេសនឹងបន្តជំរុញឱ្យមានការបណ្តុះបណ្តាល TVET បន្ថែមទៀតនៅកម្ពុជា និងក៏បានផ្តល់យោបល់ឱ្យកម្ពុជាបង្កើតបណ្តាញ TVET ក្នុងឱកាសវេទិកាអប់រំពិភពលោកលើកទី១៩ ដែលគ្រោងនឹងប្រព្រឹត្តទៅពីថ្ងៃទី៧-១០ ខែឧសភា ឆ្នាំ២០២៣ នៅមជ្ឈមណ្ឌលអេលីហ្សាប៊ែតទី២ ទីក្រុងឡុងដ៍ ចក្រភពអង់គ្លេស។ ហើយជាមួយគ្នានេះ ឯកឧត្តមឯកអគ្គរាជទូត ក៏បានបង្ហាញបំណងចង់ទាក់ទាញអ្នកជំនាញអង់គ្លេសមកបណ្តុះបណ្តាលនៅកម្ពុជាផងដែរ។
ជាការឆ្លើយតប ឯកឧត្តម អ៊ិត សំហេង រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ ក៏បានបញ្ជាក់ដល់ឯកឧត្តមអគ្គរាជទូតអង់គ្លេសថា ក្រសួងអាចផ្តល់បណ្ណការងារ និងកូតាសម្រាប់បុគ្គលិកជនជាតិអង់គ្លេសដែលមកបម្រើការងារនៅក្នុងប្រទេសកម្ពុជា ហើយទន្ទឹមនឹងនេះ ក្រសួងក៏នឹងផ្តល់អាទិភាពសម្របសម្រួលអ្នកជំនាញជាន់ខ្ពស់ជូនភាគីចក្រភពអង់គ្លេសផងដែរ។
សម្រាប់ការបណ្តុះបណ្តាលបច្ចេកទេស និងវិជ្ជាជីវៈនៅកម្ពុជា ឯកឧត្តមរដ្ឋមន្រ្តីបានមានប្រសាសន៍ថា កម្ពុជាខិតខំបណ្តុះបណ្តាលឱ្យទាន់តម្រូវការ ដោយបច្ចុប្បន្នកម្ពុជាកំពុងខ្វះខាតកម្លាំងពលកម្មជំនាញ ដូច្នេះហើយរាជរដ្ឋាភិបាលកម្ពុជា មានកម្មវិធីបណ្តុះបណ្តាលពិសេសរយៈពេល៤ខែ លើសញ្ញាបត្របច្ចេកទេស និងវិជ្ជាជីវៈ (C1) ដល់យុវជនក្រីក្រចំនួន ១,៥លាននាក់ ដោយចាប់អនុវត្តពីឆ្នាំ២០២៣នេះ៕
