អ្នកជំនាញសេដ្ឋកិច្ចមើលឃើញថា ជំនាញលើវិស័យទាំង១០ ដែលមានក្នុងការបណ្តុះបណ្តាលជំនាញវិជ្ជាជីវៈ និងបច្ចេកទេស ទៅដល់យុវជន​ចំនួន ១លាន៥សែននាក់ របស់រាជរដ្ឋាភិបាល គឺសុទ្ធសឹងតែជាជំនាញស្ថិតក្នុងទីផ្សារការងារខ្ពស់ ហើយជាជំនាញដែលស្ថិតក្នុងចំណាប់អារម្មណ៏យុវជនក្នុងសង្គមកម្ពុជានាពេលបច្ចុប្បន្ននេះ ។ 

ក្រសួងការងារ និងបណ្តុះបណ្តាលវិជ្ជាជីវៈ បានជ្រើសយកវិស័យចំនួន១០មានដូចជា វិស័យធុរកិច្ចនិងព័ត៌មានវិទ្យា មេការនិចទូទៅ/មេកានិចរថយន្ត បរិក្ខាត្រជាក់ និងកម្តៅ សំណង់ ទេសចរណ៍ សេវកម្ម កសិកម្ម និងកសិឧស្សាហកម្ម អគ្គិសនី និងថាមពល អេឡិចត្រនិច និងកម្មន្តសាល សម្រាប់ដាក់បញ្ចូលជាមុខវិជ្ជាក្នុងការបណ្តុះបណ្តាលជំនាញវិជ្ជាជីវៈ ១លាន៥សែននាក់ របស់រាជរដ្ឋាភិបាលអាណត្តិទី៧នេះ ។ 

លោកបណ្ឌិត ឆេង គឹមឡុង នាយកនៃមជ្ឈមណ្ឌលនវានុវត្តន៍ផ្នែកអភិបាលកិច្ច និងប្រជាធិបតេយ្យនៃវិទ្យាស្ថានចក្ខុវិស័យអាស៊ី មានប្រសាសន៍ថា ជំនាញទាំងអស់ខាងលើនេះ គឺស្ថិតនៅក្នុងចំណោមជំនាញដែលមានតម្រូវការទីផ្សារខ្ពស់នៅប្រទេសកម្ពុជាក្នុងរយៈពេលប្រមាណជិត២០ឆ្នាំមកនេះ ។ ជាពិសេសនាពេលបច្ចុប្បន្ន មានតម្រូវការខាងសំណង់ សម្ភារៈពាណិជ្ជកម្ម និងអាជីវកម្មផ្នែកព័ត៌មានវិទ្យា ផ្នែកឌីជីថល មេកានិចទូទៅ រថយន្ត បរិក្ខាម៉ាស៊ីនត្រជាក់ និងតម្រូវការក្នុងអាគារជាច្រើននាពេលបច្ចុប្បន្នក្នុងសង្គមកម្ពុជា។ 

លោកបណ្ឌិតបន្ថែមថា ជំនាញនីមួយៗទាំងអស់ដែលបានដាក់ចេញដោយរាជរដ្ឋាភិបាលលើការបណ្តុះបណ្តាលជំនាញវិជ្ជាជីវៈ និងបច្ចេកទេស ១លាន៥សែននាក់នេះ សុទ្ធសឹងតែអាចផ្លាស់ប្តូជីវភាពរបស់បងប្អូនប្រជាពលរដ្ឋបាន ពីព្រោះនៅពេលពលរដ្ឋមានជំនាញវិជ្ជាជីវៈច្បាស់លាស់ពួកគេអាចបើកការរកស៊ីដោយខ្លួនឯងផ្ទាល់ ក៏ដូចជាឱកាសការងារនៅតាមបណ្តាក្រុមហ៊ុនឯកជនមួយចំនួនផងដែរ ។ 

ចាប់តាំងពីរាជរដ្ឋាភិបាលបើកឱ្យយុវជនចុះឈ្មោះចូលរៀនជំនាញវិជ្ជាជីវៈនៅទូទាំងប្រទេសមក ក្រសួងការងារ និងបណ្តុះបណ្តាលវិជ្ជាជីវៈបានទទួលសិស្សចុះឈ្មោះចូលរៀនច្រើនជាងគេលើមុខជំនាញក្នុងវិស័យចំនួន៤ ដូចជា ធុរកិច្ច និងព័ត៌មានវិទ្យា មេការនិចទូទៅ/មេកានិចរថយន្ត បរិក្ខាត្រជាក់ និងកម្តៅ សំណង់ ។ 

លោកបណ្ឌិត គី សេរីវឌ្ឍន៍ ប្រធានវិទ្យាស្ថានសិក្សាចិននៃរាជ្យបណ្ឌិត្យសភាកម្ពុជាមើលឃើញថា ជំនាញក្នុងវិស័យទាំង៤ បើទោះបីជាយុវជនមិនចង់បម្រើការងារនៅក្រុមហ៊ុន ឬរោងចក្រឯកជន ក៏ពួកគេអាចប្រកបរបរដោយខ្លួនឯងបានដែរ ។ ក្នុងនោះបច្ចេកវិទ្យាព័ត៌មាន ទាក់ទងនិងកម្មវិធីទូរស័ព្ទ គ្រប់គ្រងអាជីវកម្ម មេកានិច គឺគាត់អាចបើកជាជាងរថយន្ត ហើយបរិក្ខាត្រជាក់គាត់អាចធ្វើម៉ាស៊ីនត្រជាក់ និងជួសជុលរថយន្តជាដើម ។ ដូច្នេះហើយទើបយុវជនមានការចាប់អារម្មណ៍ច្រើនលើជំនាញទាំងនេះ ។ 

បើយោងតាមទិន្នន័យរបស់ក្រសួងការងារ និង​បណ្តុះបណ្តាលវិជ្ជាជីវៈ គិត​ត្រឹម​ថ្ងៃទី២៤ ខែធ្នូ ឆ្នាំ២០២៣ យុវជនដែលមក​ពីគ្រួសារក្រីក្រ និង​ងាយរងហានិភ័យ ចំនួន ១៧ ២៦៧នាក់ (ស្រី ៥ ៩៣៨នាក់) បានចុះឈ្មោះចូលរៀនជំនាញបច្ចេកទេស និង​វិជ្ជាជីវៈ នៅតាមវិទ្យាស្ថានបណ្តុះបណ្តាលបច្ចេកទេស និង​វិជ្ជាជីវៈទូទាំងប្រទេស។ ក្នុងនោះវិស័យមេកានិចទូទៅ/មេកានិចរថយន្ត មានចំនួនច្រើនជាងគេ គឺ ២៥៨៩នាក់ (ស្រី ១១៣នាក់), សំណង់ចំនួន ២ ៥២៥នាក់ (ស្រី ៣៣០នាក់), អគ្គិសនី និងថាមពល ៥៥៧នាក់ (ស្រី ៦២នាក់), អេឡិចត្រូនិក ៤២០នាក់ (ស្រី ៦១នាក់), កម្មន្តសាល ១២០នាក់ (ស្រី ៧នាក់), ធុរកិច្ច និងព័ត៌មានវិទ្យា ៥ ៦៣៨នាក់ (ស្រី ២ ៩៩៧នាក់) , សេវាកម្ម ៩៩៤នាក់ (ស្រី ៨៥៩នាក់), បរិក្ខារត្រជាក់ និងកម្តៅ ២ ៥៦២នាក់ (ស្រី ៩៩នាក់), ទេសចរណ៍ ១ ០០០នាក់ (ស្រី ៧៤៣នាក់), និងកសិកម្ម និងកសិ-ឧស្សាហកម្ម ៨៦២នាក់ (ស្រី ៦៦៧នាក់)៕