​ក្នុង​ពិធី​បើក​ពិព័រណ៌​សៀវភៅ​កម្ពុជាលើកទី១២ នាព្រឹកថ្ងៃទី១១ ខែធ្នូ ឯកឧត្តម ខៀវ កាញ៉ារីទ្ធ អ្នកតំណាងរាស្រ្ត និង​ជាឧត្តមទីប្រឹក្សាព្រះមហាក្សត្រ លើក​ឡើងថា ការអានសៀវភៅធ្វើឱ្យយើងទទួលបាននូវព័ត៌មាននិងចំណេះដឹងយ៉ាងសម្បូណ៍បែបពីគ្រប់មជ្ឈដ្ឋាន ដើម្បីយកមកពង្រឹងសមត្ថភាពរបស់ខ្លួន និងអាចជួយឱ្យយើងចេះគិតគូរពិចារណារកហេតុរកផលបានត្រឹមត្រូវ។

ឯកឧត្តម ខៀវ កាញ៉ារីទ្ធ មានប្រសាសន៍ថា សៀវភៅ គឺជាធនធានដ៏មហាសាលមួយដែលផ្ទុកនូវមូលធនបញ្ញា គម្ពីរ សាស្រ្តា ក្បួនខ្នាតប្រមូលផ្ដុំនូវចំណេះដឹង និងទស្សនៈនានារាប់ទាំងសង្គម សេដ្ឋកិច្ច វប្បធម៌ នយោបាយ សាសនាជាដើម។ ឯកឧត្តមបន្តថា ការអានសៀវភៅនឹងធ្វើ​ឱ្យខួរក្បាលរីកលូតលាស់ បង្កើនស្មារតីចងចាំ និងបង្កើតបរិយាកាសរីករាយត្បិត “សៀវភៅ ជាឱសថជួយកាត់បន្ថយភាពតានតឹងយ៉ាងមានប្រសិទ្ធភាព”។

ក្នុងនោះ ឯកឧត្តម​បានផ្តល់សារៈសំខាន់ចំពោះសៀវភៅ ដោយថា សៀវភៅមានសារៈសំខាន់ខ្លាំងសម្រាប់មនុស្សទូទៅនៅលើពិភពលោកមិនថាតែសិស្ស និស្សិត ឬគ្រូបង្រៀននោះឡើយ ព្រោះតាមរយៈការអានសៀវភៅធ្វើឱ្យអ្នកអានទទួលបាននូវគុណសម្បត្តិយ៉ាងច្រើន រួមមាន ការកម្សាន្ត ការពន្លឿនផ្លូវចិត្ត និងកាត់បន្ថយភាពតានតឹង, សៀវភៅ​ក៏​ជួយជំរុញសកម្មភាពខួរក្បាលឱ្យមានភាពរហ័សរហួន (រ៉េផ្លិច) បង្កើនចំណេះដឹងលើគ្រប់វិស័យ, មានជំនាញក្នុងការគិត និងវិភាគកិច្ចការបានល្អ, ជួយលើកទឹកចិត្តឱ្យមានសេចក្តីសង្ឃឹម (សុទិដ្ឋិនិយម), ស្គាល់ពីកេរដំណែល និងគុណតម្លៃនៃអក្សរសាស្ត្រជាតិរបស់ខ្លួន, ជួយបង្កើនវាក្យសព្ទក្នុងការនិយាយ ការសរសេរ។ ជាពិសេស​ទៅទៀតនោះ ជួយជំរុញឱ្យអ្នកអានមានសិល្បៈក្នុងទំនាក់ទំនង, យល់ដឹងពីព្រឹត្តិការណ៍ជាតិ អន្តរជាតិទាំងក្នុងតំបន់ និងពិភពលោកទាំងមូល, ដឹកនាំមនុស្សឱ្យមានឥរិយាបថល្អ អត្តចរិតថ្លៃថ្នូរ និងមានគុណធម៌ សីលធម៌ក្នុងសង្គម, ធ្វើឱ្យមានចំណេះដឹងខ្ពង់ខ្ពស់ អាចធ្វើជាម្ចាស់នៃជោគវាសនារបស់ខ្លួនឯង និងម្ចាស់នពិភពលោកទាំងមូល។

ចំពោះ​ការបើកសម្ពោធពិព័រណ៍សៀវភៅកម្ពុជា លើកទី១២ នេះ ឯកឧត្តមយល់ថា វាគឺជាព្រឹត្តិការណ៍ប្រចាំឆ្នាំមួយយ៉ាងសំខាន់មានសារៈប្រយោជន៍ និងមានប្រជាប្រិយភាពដែលមានអ្នកចូលរួមច្រើនបំផុត ពីព្រោះជាវេទិកាជួបជុំរវាងអ្នកនិពន្ធ អ្នកអាន អ្នកបោះពុម្ពផ្សាយ អង្គការសមាគមដែលធ្វើការពាក់ព័ន្ធជាមួយសៀវភៅ បណ្ណារក្ស អ្នកស្រាវជ្រាវ សិស្សនិស្សិត បញ្ញវន្ត និងសាធារណជនទូទៅ។ តាមរយៈកិច្ចជួបជុំនេះ គឺជួយឱ្យពួកគេបានជជែកពិភាក្សាដកស្រង់យកនូវបទពិសោធ និងស្វែងយល់ពីគ្នាទៅវិញទៅមកនូវចំណុចល្អ ចំណុចខ្វះខាត តម្រូវការ និងផលវិបាកទាំងភាគីអ្នកអាន និងអ្នកនិពន្ធ ព្រមទាំងជាកម្លាំងថាមពលដ៏សំខាន់ដើម្បីជួយជំរុញនិងបណ្ដុះទឹកចិត្តកូនខ្មែរឱ្យមានទម្លាប់ស្រឡាញ់ចូលចិត្តការអាន និងការសរសេរ។

លោក ម៉ុង ម៉ានិត ទូតសុច្ឆន្ទៈនៃពិព័រណ៍សៀវភៅថ្នាក់ជាតិលើកទី១២ មានប្រសាសន៍ថា ក្នុងនាមជាអ្នកនិពន្ធមួយរូប បេសកកម្ម​ជីវិតផ្ទាល់ខ្លួនរបស់លោក គឺរៀនសូត្រ ថែរក្សា និងនាំយកភាពរីកចម្រើននៃអក្សរសិល្ប៍ខ្មែរភ្ជាប់ជាមួយភាពយន្ត និងតន្រ្តី។ លោក ម៉ានិត បន្តថា អ្នកអាន និងពិព័រណ៍សៀវភៅកម្ពុជា បានអនុញ្ញាតិឱ្យលោក និងអ្នកនិពន្ធជាច្រើនរូបអាចបញ្ចេញសមត្ថភាព និងបង្ហាញភាពខ្លាំងក្នុងជំនាញរបស់ខ្លួន និងធ្វើឱ្យការស្រមើស្រមៃលើសន្លឹកក្រដាស់ក្លាយជាការពិត។

ឯកឧត្តម ហុក សុទ្ធិ ប្រធានសមាគមបណ្ណារក្សកម្ពុជា និងជានាយកអង្គការស៊ីប៉ា ប្រសាសន៍​ថា ជោគជ័យនៃអ្នកចូលរួមទស្សនា ពិព័រណ៍សៀវភៅកម្ពុជាដ៏ច្រើនកន្លងមក គឺជាការបញ្ជាក់ពីការចាប់ផ្ដើម នៃឧស្សាហកម្មសៀវភៅនៅកម្ពុជា។ ឯកឧត្តមសង្ឃឹមថា វិស័យតែងនិពន្ធ និងបោះពុម្ពផ្សាយសៀវភៅ នឹងចាប់ផ្ដើមមានទីផ្សារ និងអាចពង្រីកនិរន្តរភាពនាពេលខាងមុខ។

គួរជំរាបជូនថា ពិព័រណ៍សៀវភៅកម្ពុជា លើកទី១២ ត្រូវ​បានធ្វើឡើងក្រោមប្រធានបទ «សៀវភៅជាជំនួយបញ្ញា ជាអាហារគំនិត» ដោយប្រព្រឹត្តទៅ​ចាប់ពីថ្ងៃទី១១ ដល់ថ្ងៃទី១៤ ខែធ្នូ ឆ្នាំ២០២៥ នៅមជ្ឈមណ្ឌលសន្និបាត និងពិព័រណ៍កោះពេជ្រ (បរិវេណ Elysée) ដោយមានស្តង់សៀវភៅសរុបចំនួន ៣០០ស្តង់ និងរំពឹងថា មានអ្នកចូលរួមទស្សនាលើសពី ១០ម៉ឺននាក់៕