សេតវិមានបានថ្លែងកាលពីថ្ងៃពុធថា ប្រធានាធិបតីអាម៉េរិក លោក ដូណាល់ ត្រាំ នឹងចុះហត្ថលេខាលើបញ្ជាប្រតិបត្តិ បិទនាយករដ្ឋានអប់រំអាម៉េរិក នៅថ្ងៃនេះ (ព្រហស្បត្តិ៍ ២០ មីនា), នេះបើយោងតាម សារព័ត៌មាន​ CNA ។

ចំណាត់ការនេះ ត្រូវបានជំទាស់រួចហើយ ពីក្រុមអគ្គមេធាវីរដ្ឋប្រជាធិបតេយ្យ ដោយបានដាក់ពាក្យបណ្ដឹងកាលពីសប្តាហ៍មុន ដើម្បីរារាំងរដ្ឋបាលលោកត្រាំ ក្នុងដំណើរការរុះរើនាយកដ្ឋាន និងបញ្ឈប់ការបណ្ដេញបុគ្គលិកជិតពាក់កណ្ដាល។

បទបញ្ជានេះ បានបញ្ជាដោយផ្ទាល់ទៅកាន់លេខាធិការអប់រំ លោកស្រី Linda McMahon ឱ្យចាត់វិធានការចាំបាច់ទាំងអស់ ដើម្បីបិទនាយករដ្ឋានអប់រំ និងប្រគល់សិទ្ធិអំណាចអប់រំដល់រដ្ឋនីមួយៗគ្រប់គ្រងវិញ ហើយត្រូវតែបន្តការធានាចំពោះការផ្ដល់ សេវា កម្មវិធី និងអត្ថប្រយោជន៍ ដល់ប្រជាជនអាម៉េរិក ប្រកបដោយប្រសិទ្ធភាព និងគ្មានការរំខាន។

លោក ត្រាំ បានអំពាវនាវម្តងហើយម្ដងទៀត ឱ្យលុបបំបាត់នាយកដ្ឋានអប់រំ ដោយហៅកិច្ចការនេះថា «ការងារធំ» ខណៈលោកបានស្នើឱ្យបិទនាយកដ្ឋាននេះ តាំងពីអាណត្តិដំបូងរបស់លោក ក្នុងនាមជាប្រធានាធិបតីមកម្ល៉េះ ប៉ុន្តែសភាមិនធ្វើសកម្មភាពនៅពេលនោះ។ ស្របពេលដែលសមាជិកគណបក្សសាធារណរដ្ឋរបស់លោក បានព្យាយាមជាយូរមកហើយ ក្នុងការកាត់បន្ថយឥទ្ធិពល និងការផ្ដល់មូលនិធិ ដល់នាយករដ្ឋានអប់រំ។

លោកស្រី McMahon ដែលជាសហស្ថាបនិក និងជាអតីតនាយកប្រតិបត្តិ កីឡាកាស (WWE) បានបង្ហាញពីជំហរការពារផែនការរបស់លោកត្រាំ ក្នុងការលុបចោលនាយករដ្ឋាននេះ ប៉ុន្តែលោកស្រីបានសន្យាថា ការផ្ដល់មូលនិធិសម្រាប់សាលាសហព័ន្ធ នឹងនៅតែបន្ត ដើម្បីជួយដល់សិស្ស និងសាលារៀន ដែលមានប្រាក់ចំណូលទាប។ រីឯ កម្ចីនិស្សិត និងសេវាកម្មសម្រាប់កុមារមានពិការភាពត្រូវបានកំណត់ដោយច្បាប់ នឹងនៅតែបន្ត។

គួរជម្រាបថា នាយកដ្ឋានអប់រំអាម៉េរិក គឺជាស្ថាប័នដែលត្រួតពិនិត្យសាលារដ្ឋចំនួន ១០ម៉ឺនកន្លែង និងសាលាឯកជនចំនួន ៣ម៉ឺន ៤ពាន់កន្លែង។ បើទោះបីជា ច្រើនជាង ៨៥ភាគរយ នៃថវិកាទ្រទ្រង់សាលារដ្ឋ គឺបានមកពីរដ្ឋាភិបាលរដ្ឋ និងរដ្ឋបាលមូលដ្ឋានក៏ដោយ។

នាយកដ្ឋាននេះ ផ្ដល់ជំនួយរបស់សហព័ន្ធសម្រាប់សាលារៀន និងកម្មវិធីដែលខ្វះខាត រួមទាំងប្រាក់ខែ សម្រាប់គ្រូបង្រៀនកុមារ ដែលមានតម្រូវការពិសេស មូលនិធិកម្មវិធីសិល្បៈ និងជំនួយលើការកែសម្រួលហេដ្ឋារចនាសម្ព័ន្ធ ដែលហួសសម័យ។​ ស្ថាប័ននេះ ក៏ត្រួតពិនិត្យផងដែរ លើប្រាក់កម្ចីនិស្សិតជនជាតិអាម៉េរិកចំនួន ១,៦ទ្រីលានដុល្លារអាម៉េរិក ដែលមិនមានលទ្ធភាពចំណាយសម្រាប់ការសិក្សានៅសាកលវិទ្យាល័យ៕