ធនាគារ អភិវឌ្ឍន៍អាស៊ី (ADB) សហការជាមួយរដ្ឋាភិបាលនៃសាធារណរដ្ឋកូរ៉េ បានផ្តល់នូវកម្មវិធីអាហារូបករណ៍ ADB-Korea Fellowship Program (KFP) សម្រាប់ឆ្នាំសិក្សា២០២៦ ដែលមានគោលបំណង ពង្រឹងសមត្ថភាពមន្ត្រីរាជការមកពីបណ្តាប្រទេសកំពុងអភិវឌ្ឍន៍ជាសមាជិករបស់ ADB លើជំនាញ គោល នយោបាយសាធារណៈ អភិបាលកិច្ច និងការសិក្សាអន្តរជាតិ។

លក្ខខណ្ឌជ្រើសរើសបេក្ខជន
-ជាមន្ត្រីរាជការដែលកំពុងបម្រើការងារក្នុងក្រសួង
-មានបទពិសោធន៍ការងារពេញម៉ោងយ៉ាងតិច ០៣ ឆ្នាំ (ក្រោយទទួលបានសញ្ញាបត្របរិញ្ញាបត្រ)
-មានសញ្ញាបត្របរិញ្ញាបត្រ ឬសមមូល ដែលមានលទ្ធផលសិក្សាល្អប្រសើរ
-មានកម្រិតសមត្ថភាពភាសាអង់គ្លេសស្ទាត់ជំនាញ (ទាំងនិយាយ និងសរសេរ)
-មានអាយុមិនលើសពី ៣៥ ឆ្នាំ គិតត្រឹមថ្ងៃដាក់ពាក្យ
-មានសុខភាពល្អ និងមានការប្តេជ្ញាចិត្តត្រឡប់មកបម្រើការងារនៅប្រទេសកំណើតវិញយ៉ាងតិច ០២ ឆ្នាំ ក្រោយបញ្ចប់ការសិក្សា។

គ្រឹះស្ថានសិក្សានិងជំនាញសិក្សា
បេក្ខជនអាចជ្រើសរើសជំនាញសិក្សានៅសាកលវិទ្យាល័យដៃគូណាមួយដូចខាងក្រោម៖
-Graduate School of Public Administration (GSPA), Seoul National University: ជំនាញ Global Master of Public Administration
-Graduate School of International Studies (GSIS), Seoul National University: ជំនាញ International Development
-KDI School of Public Policy and Management: ជំនាញ Public Policy, Development Policy និង Public Management

អត្ថប្រយោជន៍នៃអាហារូបករណ៍
បេក្ខជនដែលត្រូវបានជ្រើសរើសនឹងទទួលបានអាហារូបករណ៍ពេញដែលរួមមាន៖
-ការបង់ថ្លៃសិក្សា ១០០% សម្រាប់ថ្នាក់បរិញ្ញាបត្រជាន់ខ្ពស់ (រយៈពេលអតិបរមា ២ឆ្នាំ)
-ប្រាក់ឧបត្ថម្ភប្រចាំខែ (សម្រាប់ថ្លៃស្នាក់នៅ ហូបចុក សៀវភៅ និងការសិក្សា)
-ថ្លៃស្នាក់នៅក្នុងអន្តេវាសិកដ្ឋាន
-ការធានារ៉ាប់រងសុខភាព
-សំបុត្រយន្តហោះទៅ-មក។

នីតិវិធីនៃការដាក់ពាក្យ
បេក្ខជនត្រូវដាក់ពាក្យសុំចូលរៀនទៅកាន់សាកលវិទ្យាល័យដៃគូណាមួយខាងលើដោយផ្ទាល់
-បេក្ខជនត្រូវបញ្ជាក់ក្នុងពាក្យសុំឱ្យបានច្បាស់ថា ខ្លួនមានបំណងស្នើសុំអាហារូបករណ៍ ADB-KFP
-កាលបរិច្ឆេទឈប់ទទួលពាក្យ៖ ការជ្រើសរើសនឹងប្រព្រឹត្តទៅចាប់ពីខែមីនា រហូតដល់ ខែមិថុនា ឆ្នាំ២០២៦។

សម្រាប់ព័ត៌មានលម្អិតបន្ថែម សូមចូលទៅកាន់គេហទំព័ររបស់ សាកលវិទ្យាល័យនីមួយៗ ឬទាក់ទងមកកាន់ក្រុមការងារកម្មវិធីតាមរយៈអ៊ីមែល៖ kfellowship@adb.org ៕