ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្នុងសិក្ខាសាលាបណ្ដុះបណ្ដាលបច្ចេកទេសស្ដីពី “ការអប់រំបរិស្ថានសម្រាប់សាលាមតេ្តយ្យសិក្សា” នៅមន្ទីរអប់រំយុវជន និងកីឡាខេត្តព្រះសីហនុ កាលពីពេលថ្មីៗនេះ លោកជំទាវ គឹម សេដ្ឋានី រដ្ឋលេខាធិការ ក្រសួងអប់រំ យុវជន និងកីឡា មានប្រសាសន៍ថា ការអប់រំបរិស្ថានក្នុងកម្រិតមតេ្តយ្យសិក្សា នឹងជួយបណ្ដុះឥរិយាបថកុមារពេញមួយជីវិត។
លោកជំទាវ គឹម សេដ្ឋានី បញ្ជាក់បន្ថែមថា ការអប់រំពីបរិស្ថាន ចាំបាច់ត្រូវមាននៅក្នុងកម្រិតមតេ្តយ្យសិក្សា ព្រោះថា ក្មេងនៅក្នុងកម្រិតមតេ្តយ្យ គឺចង់ដឹង ចង់ឮ ចង់ចេះ ចង់ស្វែងយល់ ចង់រៀនសូត្រ ដូចនេះហើយនៅពេលដែលយើងបង្រៀនគាត់អំពីអ្វីមួយនឹងឆាប់ទទួលបានលឿន។ លោកជំទាវបន្តថា ក្មេងប្រៀបបានទៅនឹងក្រដាសស នៅពេលដែលពួកគេបានសិក្សាស្វែងយល់មានបទពិសោធន៍ផ្ទាល់ទៅលើបញ្ហាអ្វីមួយ គឺដិតដាមជាប់នៅក្នុងចិត្ត និងជាការបណ្ដុះនូវបំណិននៅផ្នត់គំនិត និងឥរិយាបថតាំងពីក្មេងរហូតពេញមួយជីវិត។
រដ្ឋលេខាធិការ ក្រសួងអប់រំ យុវជន និងកីឡា បន្ថែមថា ការអប់រំបរិស្ថានក្នុងកម្រិតមតេ្តយ្យសិក្សា គឺជាអ្វីដែលអ្នកអប់រំទូទាំងពិភពលោកបាននឹងកំពុងយកចិត្តទុកដាក់ ហើយការបណ្ដុះដល់កុមារ គឺក្នុងគោលបំណងឱ្យពួកគេបានយល់ដឹងអំពីបរិស្ថាន បម្រែបម្រួលអាកាសធាតុ ដើម្បីឱ្យកុមារមានភាពធន់ក្នុងការការពារខ្លួននៅពេលប្រឈមទៅនឹងបរិស្ថានផ្សេងៗដែលកើតចេញពីបម្រែបម្រួលអាកាសធាតុ។
“ការផ្ដល់ឱកាសដល់ក្មេងសិក្សាស្វែងយល់ ប្រឡូកផ្ទាល់ នៅក្នុងការងារអប់រំបរិស្ថាននេះ គឺជារឿងមួយដ៏មានសារៈសំខាន់ក្នុងបរិបទដែលពិភពលោកកំពុងយកចិត្តទុកដាក់ទៅលើបញ្ហាបរិស្ថាន ដែលពិភពលោកកំពុងប្រឈមមុខខ្ពស់នឹងគ្រោះមហន្តរាយនៃបម្រែបម្រួលអាកាសធាតុ”
លោកស្រី IWAMA Miyoko ប្រធានអង្គការ Nature Center Risen បានលើកឡើងដែរថា កុមារតូច គឺជាទ្រព្យសម្បត្តិរបស់សង្គម ហើយការងារបរិស្ថាន គឺជាបញ្ហាសាំញ៉ាំ។ ដូចនេះ ដើម្បីអប់រំកុមារតូចឱ្យបានល្អអាស្រ័យទៅលើអ្នកអប់រំ លោកគ្រូ អ្នកគ្រូ អប់រំនៅតាមសាលាផ្សារភ្ជាប់និងការអប់រំនៅតាមផ្ទះ ដើម្បីឱ្យកុមារចេះស្រឡាញ់បរិស្ថាន ស្រឡាញ់ស្រុកភូមិ តាំងពីកុមារភាព។
គួរជម្រាបជូនថា សិក្ខាសាលាបណ្ដុះបណ្ដាលបច្ចេកទេសស្ដីពី “ការអប់រំបរិស្ថានសម្រាប់សាលាមតេ្តយ្យសិក្សា” បានធ្វើឡើងរយៈពេល៨ថ្ងៃ ដោយបានបញ្ជ្រាបវិធីសាស្ត្រនៅក្នុងការបណ្ដុះបណ្ដាលដល់គ្រូបង្រៀនមត្តេយ្យអំពីចំណេះដឹងទូទៅ ពីបរិស្ថាន ដើម្បីឱ្យក្មេងផ្សារភ្ជាប់ទៅនឹងបរិស្ថាន ចេះស្រឡាញ់បរិស្ថាន ចូលរួមការពារបរិស្ថាន ទាំងនៅក្នុងសាលា នៅតាមផ្ទះ។ ជាពិសេស តាមរយៈអាណាព្យាបាលរបស់សិស្សចូលរួមអប់រំបន្ថែម ដើម្បីឱ្យកុមារតូចបានយល់ច្បាស់ទាំងការសិក្សានៅសាលា និងការអនុវត្តរស់នៅជាក់ស្ដែងនៅក្នុងសហគមន៍ផង៕
