ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
កញ្ញា ហឿន គន្ធា បច្ចុប្បន្នគឺជាគ្រូបណ្ដុះបណ្ដាលជំនាញកាត់តនៅស្ថាបនអង្គការមួយកន្លែង។ មុននឹងក្លាយជាគ្រូបណ្តុះបណ្តាលនេះ កញ្ញាបានឆ្លងកាត់ការងារ និងបទពិសោធន៍ជាច្រើនដូចជាជំនួយការអ្នកគ្រប់គ្រងទូទៅក្នុងផលិតកម្ម ផ្នែកភាពយន្តរឿងភាគសម្រាប់ទូរទស្សន៍ និងរឿងដុំសម្រាប់ចាក់បញ្ចាំងនៅរោងកុនអស់រយៈពេលជាច្រើនឆ្នាំ។
ត្រឡប់ទៅកាន់រយៈពេលប៉ុន្មានឆ្នាំមុន កញ្ញា ហឿន គន្ធា គឺជាសិស្ស ដែលសិក្សាជំនាញផ្នែកកាត់ត នៅសាលាភាពយន្ត នៃវិទ្យាស្ថាន ប៉េ អេស អឺ (PSE)។ គន្ធា និយាយថា នៅសាលាភាពយន្ត PSE មានជំនាញសិក្សាពីរគឺ ផ្នែកកាត់តភាពយន្ត និងផ្នែកថតភាពយន្ត ដោយសាលាផ្ដល់ឱកាសឱ្យសិស្សដែលមានជីវភាពក្រីក្រ មានឱកាសបានរៀនជំនាញវិជ្ជាជីវៈមួយច្បាស់លាស់។ ចំណែកកញ្ញា ហឿន គន្ធា បានចាប់ជំនាញផ្នែកកាត់តភាពយន្ត ដែលមានរយៈពេលសិក្សា២ឆ្នាំកន្លះ។
បើតាម គន្ធា ត្បិតសិក្សាផ្នែកកាត់ត ប៉ុន្តែសិស្សត្រូវស្វែងយល់ និងសិក្សាអំពីមូលដ្ឋានគ្រឹះនៃជំនាញទាំងពីរ ពោលគឺសិក្សាអំពីការផលិតរឿង សរសេររឿង ការប្រើប្រាស់កម្មវិធីកាត់ និងការកែពណ៌នៃវីដេអូ។ ជាក់ស្ដែង ជំនាញទាំងពីរនេះ គឺសិក្សាទ្រឹស្ដី និងអនុវត្តន៍ដែលដើរទន្ទឹមគ្នា ហើយក្រោយពេលបញ្ចប់ថ្នាក់ទ្រឹស្ដី សិស្សនឹងត្រូវបែងចែងជាក្រុមដើម្បីផលិតជារឿងខ្លី ឬក៏ផលិតផលអ្វីមួយ និងត្រូវអនុវត្តន៍កាត់តដើម្បីបានជាវីដេអូសម្រេច។ ដូច្នេះក្នុងការសិក្សាទ្រឹស្ដី និងពេលអនុវត្តន៍ផ្ទាល់ សិស្សអាចដឹងពីដំណាក់កាលនីមួយៗនៃការផលិតវីដេអូ តាំងពីមុនពេលផលិត ពេលផលិត និងក្រោយពេលផលិត។
“ដំណាក់កាលនៃការផលិតវីដេអូឯកសារ ឬវីដេអូ ត្រូវឆ្លងកាត់ជំហានផ្សេងៗដែលអ្នកផលិតត្រូវស្វែងយល់អំពីដំណើរការថត ការកាត់ និងការកែពណ៌នៃវីដេអូជាដើម”
កញ្ញា ហឿន គន្ធា
កញ្ញា គន្ធា បន្ថែមថា ក្រោយបញ្ចប់ការសិក្សា សិស្សរៀនជំនាញទាំងពីរនេះអាចស្វែងរកការងារធ្វើក្នុងវិស័យនេះបានជាច្រើនដូចជា ផលិតករ ជំនួយការផលិតករ អ្នកដឹកនាំរឿង ជំនួយការអ្នកដឹកនាំ និងឱកាសការងារនៅក្នុងស្ថានីយទូរទស្សន៍ ផលិតកម្ម ភ្នាក់ងារលក់សេវាផលិតកម្ម ឬការងារតាមស្ថាប័ននានាដែលមានតម្រូវការអ្នកផលិត និងកាត់តវីដេអូ។
រយៈកាលចុងក្រោយនេះ គេសង្កេតឃើញថា វិស័យផលិតវីដេអូ ក៏ដូចជាភាពយន្តនៅកម្ពុជា បាននិងកំពុងវិវត្តទៅមុខប្រកបដោយភាពវិជ្ជមាន ដែលទាមទារនិងត្រូវការធនធានមនុស្សដែលមានជំនាញ សមត្ថភាព និងភាពច្នៃប្រឌិតកាន់តែច្រើន ដើម្បីផលិតចេញនូវស្នាដៃថ្មីៗ ជាមួយភាពរស់រវើក និងភាពទាក់ទាញ។
យ៉ាងណាក៏ដោយ កញ្ញា គន្ធា ក៏សូមលើកទឹកចិត្តដល់អ្នកដែលស្រលាញ់ក្នុងវិស័យនេះ ឬជំនាញណាមួយ ត្រូវយកចិត្តទុកដាក់ក្នុងការសិក្សា និងជ្រើសរើសជំនាញដែលខ្លួនឯងស្រឡាញ់ ព្រោះអនាគតការងារដែលខ្លួនស្រឡាញ់ នោះសាម៉ីខ្លួននឹងធ្វើដោយក្ដីស្រឡាញ់អស់ពីចិត្ត។ «គ្រប់ជំនាញសិក្សាទាំងអស់មិនអាចយកភេទប្រុស ឬស្រីមកកំណត់ឡើយ ឱ្យតែមានការតាំងចិត្តជំនាញណាក៏សិស្សប្រុសស្រីអាចរៀនបានដូចគ្នា»៕
