ក្នុងកិច្ចសម្ភាសន៍ នាឱកាសខួប១០ឆ្នាំ នៃស្ថាប័ន Expertise France នៅទីក្រុងប៉ារីស ប្រទេសបារាំង កាលពីពេលថ្មីៗនេះ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី រដ្ឋមន្រ្តីក្រសួងអប់រំ យុវជន និងកីឡា មានប្រសាសន៍ថា សន្ទុះកំណើននៃបច្ចេកវិទ្យាឌីជីថល ជាពិសេសបញ្ញាសិប្បនិម្មិត (AI) នឹងធ្វើឱ្យមានការផ្លាស់ប្តូរទីផ្សារការងារ ទាំងទម្រង់ការងារដែលមានស្រាប់ ក៏ដូចជាជំនាញដែលត្រូវការ។ ក្នុងន័យនេះ ប្រព័ន្ធអប់រំត្រូវតែវិវឌ្ឍឱ្យឆ្លើយតបទៅនឹងតម្រូវការផ្លាស់ប្ដូរទាំងនោះ។

ពាក់ព័ន្ធនឹងប្រធានបទ «ចក្ខុវិស័យស្តីពីការអប់រំឆ្ពោះទៅកាន់អនាគតដោយផ្តោតលើនវានុវត្តន៍ និងនិរន្តរភាព» ឯកឧត្តមបណ្ឌិតសភាចារ្យ ហង់ជួន ណារ៉ុន បានលើកឡើងថា ការណ៍នេះត្រូវរៀបចំយុវជនជំនាន់ក្រោយ ត្រៀមខ្លួនឱ្យបានរួចរាល់សម្រាប់អាជីពទៅថ្ងៃខាងមុខ ដើម្បីជម្នះរាល់ឧបសគ្គនានាក្នុងពិភពលោកប្រកបដោយការប្រកួតប្រជែង និងការវិវត្តន៍មិនឈប់ឈរ។

រដ្ឋមន្រ្តីក្រសួងអប់រំ បន្ថែមថា សមាសធាតុចាំបាច់ដែលត្រូវមានដើម្បីធ្វើឱ្យប្រព័ន្ធអប់រំវិវឌ្ឍឆ្លើយតបទៅនឹងតម្រូវការប្ដូរជំនាញ និងទីផ្សារការងារ រួមមាន ទី១.ជំនាញសតវត្សទី២១ ៖ ការគិតកម្រិតខ្ពស់ (សង្កប្ប) ការច្នៃប្រឌិត ការសហការ ការទំនាក់ទំនង ភាពជាសហគ្រិន, ទី២. ជំនាញផ្នែកបញ្ញាសិប្បនិម្មិត៖ (ក) ជំនាញបច្ចេកទេស ៖ ការរៀនដោយស្វ័យប្រវត្តិ (Machine learning) ក្បួនដោះស្រាយ វិភាគលើដំណើរការភាសាធម្មជាតិ ការសរសេរកម្មវិធី ស្ថិតិនិងគណិតវិទ្យា (ខ) ជំនាញគ្រប់គ្រងទិន្នន័យ ៖ ការវិភាគទិន្នន័យ ការគ្រប់គ្រងមូលដ្ឋានទិន្នន័យ ទិន្នន័យធំ (គ) កម្មវិធីវិស្វកម្ម ៖ ការយល់ដឹងអំពីក្រមសីលធម៌ និងបទប្បញ្ញត្តិ។

ទី៣. ការរួមបញ្ចូលគ្នានៃបច្ចេកវិទ្យា ៖ បញ្ញាសិប្បនិម្មិត វេទិកាសិក្សាអនឡាញ និងធនធានឌីជីថល, ទី៤. ការកែលម្អជាប់ជាប្រចាំនៃការប្រតិបត្តិគរុកោសល្យ ៖ គ្រឹះស្ថានសាធារណៈឧស្សាហកម្ម និងពាណិជ្ជកម្ម EPIC ការរៀនសូត្រផ្សារភ្ជាប់នឹងការធ្វើពិសោធន៍ ការចូលរួម ការស្រមើលស្រមៃ ការតភ្ជាប់ការសិក្សាផ្អែកលើគម្រោង និងការដោះស្រាយបញ្ហាជាក់ស្តែង, ទី៥. ការយល់ដឹងជាសកល៖ ការប្រែប្រួលអាកាសធាតុ សមធម៌ បញ្ហាពិភពលោកបច្ចុប្បន្ន និងទី៦. ការអប់រំបន្ត និងការសិក្សាពេញមួយជីវិត។

ក្នុងគោលដៅជំរុញការអភិវឌ្ឍជំនាញខាងលើដល់យុវជន ឯកឧត្តមបណ្ឌិតសភាចារ្យ ហង់ជួន ណារ៉ុន មានប្រសាសន៍ថា កំណែទម្រង់សាលារៀន គឺជាកិច្ចការចម្បងមួយដែលត្រូវអនុវត្ត ដោយក្នុងនោះរួមមាន ទី១.ការបង្កើតសាលាជំនាន់ថ្មី និងសាលាគំរូ ដើម្បីលើកកម្ពស់ការអប់រំបែបឌីជីថល ការរួមបញ្ចូលមុខវិជ្ជា STEM, បញ្ញាសិប្បនិម្មិត និងប្រើប្រាស់គំរូគរុកោសល្យប្រកបដោយភាពច្នៃប្រឌិត, ទី២. ការបង្កើតប៉ូលបច្ចេកវិទ្យា ការបង្កើតវេទិកាផ្តោតលើការស្រាវជ្រាវ និងអភិវឌ្ឍន៍ នៅក្នុងសាកលវិទ្យាល័យ ដើម្បីលើកកម្ពស់គំនិតផ្តួចផ្តើមក្នុងការធ្វើអាជីវកម្ម ភាពជាដៃគូរវាងវិស័យសាធារណៈ និងឯកជន, ទី៣. ការពិចារណាឡើងវិញលើការបណ្ដុះបណ្ដាលវិជ្ជាជីវៈ ដើម្បីបណ្ដុះបណ្ដាលយុវជនសម្រាប់ការងារថ្ងៃអនាគត, ការរៀបចំកម្មសិក្សាដោយផ្សារភ្ជាប់ទ្រឹស្តី និងការអនុវត្តផ្ទាល់ និងការអភិវឌ្ឍកម្មវិធីសិក្សាជាមួយក្រុមហ៊ុន សហគ្រាសឧស្សាហកម្ម, ទី៤. ការបង្កើតប្រព័ន្ធអេកូដែលផ្តល់ឱកាសដល់ការផ្តួចផ្តើមក្នុងការចាប់ផ្តើមអាជីវកម្មថ្មីៗ បង្កើតក្រុមផ្តល់គំនិត និងអនុវត្ត (Incurbateur) បង្កើនល្បឿនមូលនិធិវិនិយោគសម្រាប់កិច្ចការពាណិជ្ជកម្ម អាជីវកម្មផ្សេង និងទី៥. គឺការជំរុញកិច្ចសហប្រតិបត្តិការអន្តរជាតិ ដែលអនុញ្ញាតឱ្យមានការលើកកម្ពស់កម្មវិធីផ្លាស់ប្តូរកម្រិតតំបន់ និងកម្រិតអន្តរជាតិ។

គួរជម្រាបជូនថា ការអប់រំតម្រង់ទិសទៅអនាគត មានគោលបំណងបំពាក់ឱ្យអ្នកសិក្សា មិនត្រឹមតែចំណេះដឹងមូលដ្ឋានរឹងមាំប៉ុណ្ណោះទេ ប៉ុន្តែថែមទាំងមានជំនាញឌីជីថល ជាពិសេសជំនាញបញ្ញាសិប្បនិម្មិត ជំនាញអន្តរបុគ្គលថែមទៀតផង ដែលទាំងនេះ គឺជាការឆ្លើយតបទៅនឹងជំនាញសតវត្សរ៍ទី២១ ដែលផ្តោតជាពិសេសលើការគិតកម្រិតខ្ពស់ (សង្កប្ប) កិច្ចទំនាក់ទំនង កិច្ចសហប្រតិបត្តិការ និងគំនិតច្នៃប្រឌិត។ បើតាម​ឯកឧត្តមរដ្ឋមន្រ្តី ការអប់រំតម្រង់ទិសទៅអនាគតនេះ ត្រូវតែធានាឱ្យបាននូវការរៀបចំយុវជនជំនាន់ក្រោយឱ្យទទួលបានជោគជ័យ ក្នុងការជម្នះរាល់ឧបសគ្គ ការលំបាកនានាដែលកាន់តែមានភាពស្មុគស្មាញ និងផ្លាស់ប្តូរឥតឈប់ឈរ ដោយត្រូវចង្អុលបង្ហាញផ្លូវពួកគេឱ្យចេះស្វែងរកដំណោះស្រាយប្រកបដោយនិរន្តរភាពចំពោះបញ្ហាប្រឈមធំៗនាពេលបច្ចុប្បន្ន ក៏ដូចជាពេលអនាគត៕