ការអប់រំអាចជាស្ពានចម្លងសម្រាប់មនុស្សឱ្យមានអនាគតល្អប្រសើរ ប៉ុន្តែជាមួយការអប់រំ និងការផ្ដល់ចំណេះដឹងទូទៅ សាលាហាក់ដូចជា កំពុងមើលរំលងការផ្ដល់ជំនាញជីវិតសំខាន់ៗមួយចំនួន ដែលធ្វើ​ឱ្យ​កុមារអាចរស់នៅក្នុងពិភពលោក​ដែល​កំពុងវិវត្តឥតឈប់ឈរ។

បើយោងតាមអ្នកជំនាញផ្នែកអប់រំ លោក Tony Wagner ជាសហនាយកនៃក្រុមផ្លាស់ប្ដូរភាពជាអ្នកដឹកនាំរបស់ហាវឺត (Harvard’s Change Leadership Group) អះអាងថា កុមារសព្វថ្ងៃ កំពុងប្រឈមមុខនឹង «គម្លាតសមិទ្ធផលសកល – global achievement gap»  ដែលជាគម្លាតរវាងអ្វីដែលសាលាបានបង្រៀន និងជំនាញដែលយុវជនត្រូវរៀន។

ក្នុងសៀវភៅរបស់គាត់មានចំណងជើងថា «គម្លាតសមិទ្ធផលសកល – the global achievement gap» លោក Wagner បានកំណត់សមត្ថភាពស្នូលចំនួន ៧ ដែលកុមារគ្រប់រូបត្រូវការ ដើម្បីរស់នៅក្នុងពិភពលោកបច្ចុប្បន្ន។

១. ការត្រិះរិះពិចារណា និងដោះស្រាយបញ្ហា ៖ ក្រុមហ៊ុន និងស្ថាប័នទាំងអស់ ចាំបាច់ត្រូវមានលទ្ធភាពបន្តពង្រឹង និងអភិវឌ្ឍផលិតផល និងសេវាកម្មរបស់ខ្លួន ដើម្បីអាចប្រកួតប្រជែងនៅក្នុងទីផ្សារ ។ ហេតុនេះ ម្ចាស់ក្រុមហ៊ុន និងអ្នកគ្រប់គ្រងស្ថាប័ន ពិតជាត្រូវការបុគ្គលិក ដែលមានជំនាញក្នុងការត្រិះរិះពិចារណា និងមានសមត្ថភាពសួរសំណួរដែលត្រឹមត្រូវ ដើម្បីឈានទៅរកការដោះស្រាយបញ្ហាចំពោះមុខ។

២. ការសហការ និងភាពជាអ្នកដឹកនាំ ៖ ដោយមើលឃើញពីភាពសំខាន់ នៃកិច្ចសហប្រតិបត្តិការក្នុងពិភពអាជីវកម្ម, លោកបានលើកឡើងថា ជំនាញភាពជាអ្នកដឹកនាំ សមត្ថភាពក្នុងធ្វើឱ្យខ្លួនមានឥទ្ធិពលលើអ្នកដទៃ និងធ្វើការរួមគ្នាជាក្រុម កាន់តែមានសារៈសំខាន់។ ដូច្នេះ តើអ្វីជាគន្លឹះ ក្នុងការក្លាយខ្លួនជាអ្នកដឹកនាំដ៏មានប្រសិទ្ធភាព ? លោក Tony Wagner លើកឡើងថា មានចំណុចពីរសំខាន់ ទី១ ការដោះស្រាយបញ្ហាប្រកបដោយភាពច្នៃប្រឌិត និងទី២ ក្រមសីលធម៌ការងារច្បាស់លាស់។

៣. ភាពរហ័សរហួន និងបត់បែន ៖ សមត្ថភាពក្នុងការសម្របខ្លួន និងជ្រើសរើសជំនាញថ្មីបានឆាប់រហ័ស គឺមានសារៈសំខាន់ ដើម្បីឆ្ពោះទៅរកភាពជោគជ័យ។ បុគ្គលិកត្រូវតែមានសមត្ថភាពអាចប្រើប្រាស់កម្មវិធី និងបច្ចេកវិទ្យាបានច្រើន ដើម្បីដោះស្រាយបញ្ហា។ ដូច្នេះ គេត្រូវមានសមត្ថភាព «រៀនសូត្រពេញមួយជីវិត» ដែលនេះគឺជាជំនាញមួយ ដែលពិភពលោកកំពុងត្រូវការ។

៤. គំនិតផ្តួចផ្ដើម និងសហគ្រិនភាព ៖ ការសាកល្បង និងព្យាយាមធ្វើរឿងថ្មីៗមិនមែនជារឿងអាក្រក់នោះទេ។ ជារឿយៗ មនុស្ស និងអ្នកធ្វើអាជីវកម្ម មានទំនោរមិនហ៊ានប្រថុយប្រថាន។ លោកបន្ថែមថា ព្យាយាមធ្វើរឿង ១០មុខ ជោគជ័យ ៨មុខ ប្រសើរជាងធ្វើរឿង ៥មុខ ហើយជោគជ័យទាំងអស់។

៥. ការទំនាក់ទំនងផ្ទាល់មាត់ និងជាលាយលក្ខណ៍អក្សរប្រកបដោយប្រសិទ្ធភាព ៖ បើតាមលោក Wagner ការអសមត្ថភាព ក្នុងការបកស្រាយគំនិតខ្លួនឯងរបស់បុគ្គលិក និងអ្នកគ្រប់គ្រង គឺជាបញ្ហាទូទៅ ដែលម្ចាស់អាជីវកម្មតែងតែជួបប្រទះ។ ដូច្នេះ របៀបប្រាស្រ័យទាក់ទងច្បាស់លាស់ និងប្រកបដោយប្រសិទ្ធភាព តាមរយៈការប្រើពាក្យសម្ដី ការសរសេរ និងធ្វើបទបង្ហាញពិតជាមានសារៈសំខាន់ណាស់ ព្រោះប្រសិនអ្នកមានគំនិតអស្ចារ្យ ប៉ុន្តែមិនអាចពន្យល់គំនិតនោះទៅអ្នកដទៃ មានន័យថា គំនិតនោះមិនអាចយកមកអនុវត្តបានទេ។

៦. សមត្ថភាពប្រើ និងវិភាគព័ត៌មាន ​៖ បច្ចុប្បន្ន បុគ្គលិកជាច្រើន ត្រូវដោះស្រាយ និងប្រឈមមុខនឹងចំនួនដ៏ច្រើន នៃព័ត៌មានជារៀងរាល់ថ្ងៃ។ ដូច្នេះ សមត្ថភាពក្នុងការប្រមូល វិភាគ និងប្រើប្រាស់ព័ត៌មាន ដែលពាក់ព័ន្ធនឹងបញ្ហាប្រឈមសំខាន់ៗប្រចាំថ្ងៃ ពិតជាមានសារៈសំខាន់។

៧. ភាពចង់ចេះចង់ដឹង និងការស្រមើសម្រៃ ៖ ប្រភពដែលជំរុញឱ្យមានការច្នៃប្រឌិត និងគំនិតក្នុងការដោះស្រាយបញ្ហាប្រកបដោយប្រសិទ្ធភាព គឺទទួលបានពីភាពចង់ចេះចង់ដឹង និងការស្រមើស្រមៃ។ ពួកយើងគ្រប់គ្នា កើតមកគឺសុទ្ធតែមានចំណង់ចង់ដឹង ចេះចង់ដឹង មានភាពច្នៃប្រឌិត និងការស្រមើស្រមៃ។ តាមការសិក្សា ជាមធ្យមកុមារដែលមានអាយុ ៤ឆ្នាំ សួរសំណួរចំនួន ១០០ក្នុងមួយថ្ងៃ។ ប៉ុន្តែនៅពេលដែលក្មេងនោះ មានអាយុ ១០ឆ្នាំ គាត់ទំនងជាព្រួយបារម្ភ ចំពោះការទទួលចម្លើយពីសាលា ជាជាងការសួរសំណួរ។ «អ្វីដែលគ្រូបង្រៀន និងឪពុកម្ដាយ ត្រូវធ្វើ រក្សា និងជំរុញឱ្យក្មេងចង់ចេះចង់ដឹង និងចូលចិត្តស្រមើស្រមៃ ទោះក្នុងកម្រិតណាមួយក៏ដោយ»៕