បច្ចុប្បន្នការជ្រើសរើសបុគ្គលិកគឺផ្អែកលើជំនាញ ការអភិវឌ្ឍកម្លាំងពលកម្ម សមត្ថភាព និងផលិតភាព ដើម្បីអាចសម្របទៅនឹងការផ្លាស់​​ប្ដូរ និងវិវឌ្ឍនៃបច្ចេកវិទ្យាថ្មីៗ។ ដូច្នេះ តម្រូវឱ្យបុគ្គលិក និងអ្នកកំពុងស្វែងរកការងារទាំងអស់ ត្រូវមានជំនាញច្បាស់លាស់ និងមានសក្ដានុពលគ្រប់គ្រាន់ ដើម្បីឱ្យក្រុមហ៊ុនអភិវឌ្ឍសមត្ថភាពបាន។ ប៉ុន្តែ តើមានជំនាញអ្វីខ្លះ ដែលជាជំនាញមានតម្រូវការខ្ពស់?

លោក Bernard Mar ជាអ្នកសិក្សាអំពីបច្ចេកវិទ្យា និងបញ្ញាសិប្បនិម្មិត បានបង្ហាញ ជំនាញចំនួន ៥ ដែលនឹងមានតម្រូវការខ្ពស់ជាសកលនៅឆ្នាំ ២០២៤ខាងមុខ។

១. ជំនាញ Generative AI ៖ ការមកដល់នៃ Generative AIs ដូចជា ChatGPT បានជួយឱ្យមនុស្សបំពេញការងារងាយស្រួលជាងមុន តាមរយៈការប្រើបច្ចេកវិទ្យានេះ ដើម្បីស្រាវជ្រាវ និងបំពេញការងារដោយស្វ័យប្រវត្តិ ហើយអាចសន្សំសំចៃពេលវេលា។ ទោះជាយ៉ាងណាក៏ដោយ បច្ចេកវិទ្យានេះ នៅតែត្រូវការអ្នកអភិវឌ្ឍ ដើម្បីឱ្យកាន់តែមានគុណភាព បង្កើតដំណោះស្រាយប្រកបដោយប្រសិទ្ធភាព ព្រមទាំងអនុញ្ញាតឱ្យមនុស្សអាចគ្រប់គ្រងបច្ចេកវិទ្យានេះបាន។ អ្នកជំនាញផ្នែកនេះ អាចរកចំណូលបានខ្ពស់ ហើយក៏ជាជំនាញដែលនឹងមានតម្រូវការខ្លាំងនៅឆ្នាំ ២០២៤ ផងដែរ។

២. ជំនាញអភិវឌ្ឍប្រកបដោយចីរភាព (Sustainability Skills) ៖ អាជីវកម្មជាច្រើន កំពុងទទួលស្គាល់សារៈសំខាន់នៃការប្រតិបត្តិការអាជីវកម្ម ក្នុងរបៀបមួយដែលមាននិរន្តរភាព និងបង្កឱ្យមានផលប៉ះពាល់ជាអប្បបរមាដល់បរិស្ថាន។ គោលដៅនៃការរក្សាតុល្យភាពរវាងបរិមាណឧស្ម័នផ្ទះកញ្ចក់ (GHG) ដែលត្រូវបានផលិត និងបរិមាណ ដែលត្រូវបានយកចេញពីបរិយាកាស (Net zero targets) ត្រូវបានគេមើលឃើញកាន់តែច្បាស់ថា ជាអាទិភាពក្នុងយុទ្ធសាស្ត្រអាជីវកម្ម។ ចំណុចនេះមានន័យថា អ្នកជំនាញផ្នែកអភិវឌ្ឍប្រកបដោយចីរភាព ឬជំនាញបៃតង នឹងមានតម្រូវការខ្ពស់។

៣. ជំនាញគ្រប់គ្រងគម្រោង (Project Management) ៖ មិនថាអ្នកកំពុងគ្រប់គ្រងមនុស្ស ឬម៉ាស៊ីននោះទេ។ ជំនាញនេះ នឹងមានតម្រូវការកើនឡើង ជាពិសេស សម្រាប់បុគ្គលដែលពូកែ គ្រប់គ្រង និងដឹកនាំមនុស្ស គ្រប់គ្រងបច្ចេកវិទ្យា និងដោះស្រាយបញ្ហា។ ព្រោះបញ្ញាសិប្បនិម្មិត (AI) នៅតែមិនអាចជំនួសមនុស្សទៅលើសមត្ថភាពសង្កេត និងត្រួតពិនិត្យកម្រិតខ្ពស់ ការកំណត់គោលដៅយុទ្ធសាស្ត្រ ការកំណត់ការងារអាទិភាព និងធនធាន។ ប៉ុន្តែបុគ្គល ដែលធ្វើការក្នុងតួនាទីនេះ អាចប្រើប្រាស់បញ្ញាសិប្បនិម្មិត (AI) ជាជំនួយការ សម្រាប់បំពេញការងារបាន។

៤. ជំនាញថែទាំសុខភាព (Clinical Healthcare Skills) ៖ ពិភពលោកប្រឈមនឺងការខ្វះខាត អ្នកជំនាញថែទាំសុខភាព ហើយកិច្ចការជួរមុខជាច្រើន ពាក់ព័ន្ធនឹងការព្យាបាល និងថែទាំសុខភាព គឺមិនអាចជំនួសដោយបច្ចេកវិទ្យាស្វ័យប្រវត្តិកម្មបានទេ ព្រោះភាពឆ្លាតវៃផ្លូវអារម្មណ៍ និងចិត្តសាស្ត្រព្យាបាល បច្ចេកវិទ្យាមិនអាចជំនួសមនុស្សបានឡើង។ ប៉ុន្តែ វេជ្ជបណ្ឌិត គិលានុបដ្ឋាយិកា និងអ្នកជំនាញសុខភាពផ្សេងទៀត អាចពង្រឹងសមត្ថភាពរបស់ខ្លួន តាមរយៈបច្ចេកវិទ្យាបញ្ញាសិប្បនិម្មិត (AI)។ ការងារនៅក្នុងវិស័យនេះ ត្រូវបានគេមើលឃើញថា នៅតែមានតម្រូវការខ្ពស់ក្នុងឆ្នាំ ២០២៤។

៥. ជំនាញទំនាក់ទំនង (Communication Skill) ៖ ការប្រាស្រ័យទាក់ទងប្រកបដោយប្រសិទ្ធភាព គឺជាធាតុដ៏សំខាន់បំផុតមួយក្នុងប្រតិបត្តិការអាជីវកម្ម។ បច្ចុប្បន្ន តម្រូវការអ្នកជំនាញផ្នែកទំនាក់ទំនង នៅតាមស្ថាប័ននានាមានកំណើន ប៉ុន្តែមនុស្សក៏ត្រូវមានសមត្ថភាពប្រាស្រ័យទាក់ទងជាមួយម៉ាស៊ីនផងដែរ៕