ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការជួយកុមារស្វែងរកចំណង់ចំណូលចិត្ត និងជំនាញរបស់ពួកគេ គឺជាជំហានសំខាន់ក្នុងការអភិវឌ្ឍន៍អត្តចរិត និងភាពជោគជ័យរបស់ពួកគេនៅថ្ងៃអនាគត។ ក្នុងនាមជាឪពុកម្តាយ អ្នកអាចអនុវត្តវិធីសាស្រ្តខាងក្រោមនេះ ដើម្បីជួយកូនក្នុងការស្វែងរកអ្វីដែលពួកគេចង់ធ្វើ និងសម្រេចគោលដៅនោះដោយមិនចំណាយពេលខុស។
១. យល់ដឹងពីសមត្ថភាព និងចំណង់ចំណូលចិត្តរបស់កូន ៖ លើកទឹកចិត្ត ឬនាំកូនចូលរួមកម្មវិធីផ្សេងៗដូចជាការងារស្ម័គ្រចិត្ត ក៏ដូចជាកម្មវិធីសិល្បៈជាដើម ដើម្បីឱ្យពួកគេទទួលបានបទពិសោធន៍ និងរកមើលនូវអ្វីដែលពួកគេចូលចិត្ត។ ជាមួយគ្នានេះ ឪពុកម្តាយអាចសង្កេតមើលដែរថា តើកូនរបស់អ្នកផ្តោតអារម្មណ៍ទៅលើអ្វី ហើយអ្វីដែលពួកគេសប្បាយចិត្ត និងអ្វីដែលពួកគេមិនចូលចិត្ត។ ពេលខ្លះអាចសួរពួកគេអំពីដែលពួកគេចូលចិត្ត ឬចង់រៀនខ្លាំងបំផុត ឬអ្នកអាចប្រើតេស្តអាជីពដើម្បីឱ្យកូនរបស់អ្នកស្វែងយល់ពីអ្វីដែលពួកគេចូលចិត្ត និងអាជីពណាដែលអាចសាកសមនឹងពួកគេ។
២. ផ្តល់បទពិសោធន៍ជាក់ស្តែង ៖ អាចនាំកូនចូលរួមកម្មវិធីពិពណ៌ការងារ ឬពិពណ៌ជំនាញ ដើម្បីឱ្យកូនពិនិត្យមើលពីអាជីពដែលពួកគេចាប់អារម្មណ៍។ ដំណើរការនេះ អាចជួយឱ្យកូនរបស់អ្នកស្វែងយល់ពីវិស័យ និងអាជីពផ្សេងៗ។
៣. និយាយអំពីជម្រើសការងារ និងមនុស្សគំរូ ៖ ពិភាក្សាជាមួយកូនពីជម្រើសអាជីពនានា និងអ្វីដែលត្រូវការក្នុងការងារនីមួយៗ ក៏ដូចជាគុណតម្លៃនៃអាជីពទាំងនោះ ។ ភ្ជាប់គ្នានេះ ក៏អាចជជែកអំពីអ្នកដែលជោគជ័យក្នុងអាជីព និងការសិក្សាអំពីការងាររបស់ពួកគេ ដែលវាអាចជួយកូនរបស់អ្នកបង្កើតគោលដៅកាន់តែល្អ។
៤. កំណត់គោលដៅ ៖ នៅពេលកូនដឹងថា ការងារអ្វីដែលពួកគេស្រឡាញ់ហើយ ឪពុកម្តាយគួរជួយឱ្យកូនចេះរៀបចំជំហានត្រូវដើរ ដើម្បីមានផែនការច្បាស់លាស់ក្នុងការសម្រេចគោលដៅ ដូចជាស្រាវជ្រាវអំពីសាលាដែលផ្តល់ការបណ្តុះបណ្តាលដែលសមនឹងអាជីពរបស់ពួកគេចង់ទទួលបាន និងតម្រូវការនៃការអប់រំសម្រាប់អាជីពនោះជាដើម។
៥. អត់ធ្មត់ និងជួយកូនជានិច្ច ៖ ជាឪពុកម្តាយ ត្រូវចាំថា នេះជាផ្លូវជីវិតរបស់កូន មិនមែនរបស់អ្នកទេ។ ដូចនេះអ្វីដែលអ្នកអាចធ្វើបានគឺចាំជួយកូន តែមិនមែនបញ្ជាកូនឱ្យបំពេញក្តីស្រមៃអ្នកឡើយ។ ជួយកូនជាគំនិត ជួយកូនលើការសិក្សា និងគិតពីសុខភាពផ្លូវចិត្តកូន៕
