ជាឪពុកម្ដាយ ប្រាកដណាស់ អ្នកពិតជាចង់ឱ្យកូនៗ មានសមត្ថភាពប្រឈមនឹងបញ្ហាធំៗក្នុងជីវិត ហើយអាចទប់ទល់ និងដោះស្រាយបញ្ហាជីវិតបានដោយរលូន។ ដើម្បីជួយឱ្យកូនមានសមត្ថភាពនេះ មានន័យថា អ្នកត្រូវបង្រៀនពួកគេអំពីរបៀបពង្រឹងផ្លូវចិត្តឱ្យបានរឹងមាំ។ ការស្រាវជ្រាវបង្ហាញថា មនុស្សមានផ្លូវចិត្តរឹងមាំ គឺចរិតលក្ខណៈវិជ្ជមាន និងគុណសម្បត្តិច្រើន ដែលធ្វើឱ្យអ្នកដទៃអាចមើលឃើញថា គេជាមនុស្សរីករាយ មានទំនុកចិត្ត និងមានភាពធន់។

ក្រុមអ្នកស្រាវជ្រាវលើកឡើងថា ក្មេង និងមនុស្សធំអាចអភិវឌ្ឍ និងពង្រឹងភាពរឹងមាំផ្លូវចិត្តតាមពេលវេលា។ បើតាមអ្នកចិត្តសាស្ត្រ មានរឿងបួនយ៉ាង ដែលឪពុកម្ដាយអាចអនុវត្ត ដើម្បីចិញ្ចឹមកូនឱ្យមានផ្លូវចិត្តរឹងមាំ ៖

១. ជួយពួកគេបង្កើនភាពជឿជាក់លើខ្លួន​ឯង ៖ ទំនុកចិត្ត និងសមត្ថភាពលើកទឹកចិត្តខ្លួនឯង គឺជាទិដ្ឋភាពសំខាន់ នៃការពង្រឹងផ្លូវចិត្ត ឬការកសាងផ្លូវចិត្តឱ្យរឹងមាំ មានន័យថា កូនរបស់អ្នកមិនគួរពឹងផ្អែកអ្នកដទៃដើម្បីបង្កើតអារម្មណ៍វិជ្ជមានសម្រាប់ខ្លួន​ឯងនោះទេ។ អ្នកអាចជួយកុមារឱ្យមានថាមពល និងភាពជឿជាក់លើខ្លួនឯង ដោយបង្រៀនពួកគេ នូវឃ្លាខ្លីៗ និងដដែលៗមួយចំនួនដូចជា អ្វីដែលខ្ញុំអាចធ្វើបាន គឺព្យាយាមឱ្យអស់ពីសមត្ថភាព, ត្រូវធ្វើសកម្មភាពប្រកបដោយទំនុកចិត្ត, ខ្ញុំល្អគ្រប់គ្រាន់ហើយ ឬ ខ្ញុំជ្រើសរើសភាពរីករាយក្នុងថ្ងៃនេះ ជាដើម។

២. បង្ហាញពួកគេពីតម្លៃនៃការធ្វើអ្វីមួយដែលពិបាក ៖ ឪពុកម្ដាយ ត្រូវបង្ហាញកូនថា ការទទួលយកឧបសគ្គដ៏លំបាកមួយ អាចបង្រៀនពួកគេនូវមេរៀនជីវិតជាច្រើន ប៉ុន្តែក្នុងនាមជាឪពុកម្ដាយ ក៏ត្រូវចូលរួម ណែនាំ និងតម្រង់ទិសកូនផងដែរ។ អ្នកអាចបង្ហាញការពេញចិត្ត និងកោតសរសើរ នៅពេលដែលកូនរបស់អ្នកបង្ហាញភាពក្លាហាន ហើយហ៊ានប្រឈមនឹងស្ថានការណ៍លំបាក។ ការទទួលយកភាពលំបាក និងហ៊ានធ្វើការក្រោមសម្ពាធ នឹងជួយពួកគេឆ្លុះបញ្ចាំងពីខ្លួនឯង និងរៀនសូត្របានជំនាញថ្មីៗ ទោះបីជាពួកគេ ជោគជ័យ ឬបរាជ័យក៏ដោយ។

៣. រក្សាផ្នត់គំនិតសុទិដ្ឋិនិយម ៖ អាកប្បកិរិយារបស់អ្នក អាចជះឥទ្ធិពលទៅលើកូនរបស់អ្នក។ ដូច្នេះហើយ បានជាអ្នកចិត្តសាស្ត្រកុមារ និយាយថា អាកប្បកិរិយាម្ដាយឪពុក មានសារៈសំខាន់ណាស់សម្រាប់កូនយកជាគម្រូតាម។ អាកប្បកិរិយានោះ ក៏រួមបញ្ចូលនូវផ្នត់គំនិតសុទិដ្ឋិនិយមដែរ ព្រោះផ្នត់គំនិតនេះ ជាសមាសធាតុសំខាន់ សម្រាប់មនុស្សដែលមានផ្លូវចិត្តរឹងមាំ នេះបើយោងតាមអ្នកវិទ្យាសាស្ត្រសរសៃប្រសាទ Wendy Suzuki ។

៤. បង្រៀនកូនអំពីរបៀប និងពេលវេលា ដែលត្រូវសុំទោស ​៖ ទិដ្ឋភាពសំខាន់នៃការកសាងផ្លូវចិត្តរឹងមាំ គឺភាពឆ្លាតវៃផ្លូវអារម្មណ៍ ដែលរួមបញ្ចូលនូវការយល់ចិត្តអ្នកដទៃ (Empathy) និងការស្គាល់ខ្លួនឯង (Self-awareness)។ ដូច្នេះ អ្នកត្រូវបង្រៀនកូនរបស់អ្នក អំពីសារៈសំខាន់នៃការគោរពអ្នកដទៃ និងខ្លួនឯង ដែលសកម្មភាពទាំងនោះ មានដូចជា ការស្ដាប់ និងគោរពទស្សនៈអ្នកដទៃ និងសុំទោសអ្នកដទៃ ដោយស្មោះនៅពេលដែលគេបានបង្ករកំហុសទៅលើនរណាម្នាក់៕