ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ទីភ្នាក់ងារសុខុមាលភាពកុមារ បានជួយកុមារចំនួន១លាន៥សែននាក់នៅក្នុងប្រទេសកម្ពុជា ដើម្បីមានលទ្ធភាពទទួលបានទឹកស្អាត ការអប់រំប្រកបដោយបរិយាបន្ន អាហារូបត្ថម្ភកាន់តែល្អប្រសើរ និងសេវាថែទាំសុខភាព។
តាមរយៈកិច្ចសហការយ៉ាងជិតស្និទ្ធជាមួយភាគីពាក់ព័ន្ធនានា អង្គការទស្សនៈពិភពលោកអន្តរជាតិ ប្រចាំនៅកម្ពុជា បានផ្តល់ផលជាវិជ្ជមានដល់ ប្រជាជនចំនួនជាង ៣,២លាននាក់ ដែលក្នុងនោះ មានកុមារចំនួនជាង ១លាន៥សែននាក់ នៅបណ្តាខេត្តចំនួន ២០ និងរាជធានីភ្នំពេញ។
បើតាមអង្គការ World Vision សមិទ្ធផលដែលទទួលបាន គឺមានកុមារចំនួនជិត៨ម៉ឺននាក់ទទួលបានអាហារពេលព្រឹកដែលមានជីវជាតិតាមរយៈកម្មវិធីស្បៀងអាហារនៅតាមសាលារៀន។ អង្គការបានចាត់ទុកកម្មវិធីស្បៀងអាហារនៅតាមសាលារៀនថាបានរួមចំណែកយ៉ាងសំខាន់ធ្វើឱ្យអត្រាអ្នកចូលរៀនកើនឡើង និងអត្រាអ្នកបោះបង់ការសិក្សាធ្លាក់ចុះ។ ក្រៅពីនេះ មានកុមារ និងក្មេងវ័យជំទង់ចំនួនជាង១ម៉ឺន ៣ពាន់នាក់ បានទទួលការបណ្តុះបណ្តាលលើជំនាញជីវិតទាក់ទងនឹងការការពារ និងមានសមាជិកសហគមន៍ចំនួនជិត៣ម៉ឺននាក់បានចូលរួមនៅក្នុងវគ្គផ្លាស់ប្តូរឥរិយាបថស្តីពីការការពារកុមារ។
លោក ជេនេស អ៊ីម៉ានូអ៊ែល ហ្គីនទីញ នាយកប្រចាំប្រទេសនៃអង្គការទស្សនៈពិភពលោកអន្តរជាតិប្រចាំនៅកម្ពុជា បានបង្ហាញការកោតសរសើរ និងអំពាវនាវឱ្យមានការសហការគ្នាកាន់តែខ្លាំងឡើងបន្ថែមទៀត ដោយថា កិច្ចខិតខំប្រឹងប្រែងរួមគ្នារបស់ដៃគូ និងអ្នកគាំទ្រនឹងបន្តធ្វើឱ្យមានផលវិជ្ជមានកាន់តែច្រើន ហើយយើងប្តេជ្ញាបន្តបេសកកម្មរបស់យើងជាមួយនឹងភាពស្វាហាប់ និងការប្តេជ្ញាចិត្តជាថ្មីបន្ថែមទៀត។
«យើងធ្វើជាកម្លាំងសម្រាប់ភាពវិជ្ជមាននៃការផ្លាស់ប្តូរ ធានាបាននូវអនាគតភ្លឺស្វាង និងបរិយាបន្នសម្រាប់កុមារ និងសហគមន៍ទាំងអស់នៅក្នុងប្រទេសកម្ពុជា។»។
លោក ជេនេស អ៊ីម៉ានូអ៊ែល ហ្គីនទីញ នាយកប្រចាំប្រទេសនៃអង្គការទស្សនៈពិភពលោកអន្តរជាតិប្រចាំនៅកម្ពុជា
បើតាមរបាយការណ៍ផលវិជ្ជមាន ប្រចាំឆ្នាំ២០២៣ របស់អង្គការទស្សនៈពិភពលោកអន្តរជាតិ ស្ដីពីសមិទ្ធផលសំខាន់ៗរួមមាន ទី១. កុមារចំនួន ៧ម៉ឺន៩ពាន់៥រយនាក់ ទទួលបានអាហារពេលព្រឹកដែលមានជីវជាតិតាមរយៈកម្មវិធីស្បៀងអាហារតាមសាលារៀន បង្កើនអត្រាចូលរៀន និងអត្រាបោះបង់ការសិក្សាធ្លាក់ចុះ ទី២. ប្រជាជនចំនួន ៧ម៉ឺន៨ពាន់៤រយនាក់ ទទួលបានទឹកស្អាតប្រើប្រាស់ ក្នុងនោះកន្លែងយកទឹកថ្មីចំនួន ៤៣កន្លែងត្រូវបានតម្លើងនៅតាមគ្រឹះស្ថានសុខាភិបាល ទី៣. កុមារ និងក្មេងវ័យជំទង់ចំនួន ១ម៉ឺន៣ពាន់១៧០នាក់ បានទទួលការបណ្តុះបណ្តាលលើជំនាញជីវិតទាក់ទងនឹការការពារ និងសមាជិកសហគមន៍ចំនួន ២ម៉ឺន៩ពាន់៥០២នាក់ បានចូលរួមក្នុងវគ្គផ្លាស់ប្តូឥរិយាបថស្តីពីការការពារកុមារ ទី៤. កសិករចំនួន ៤ពាន់៤០នាក់ មកពីសហគមន៍កសិកម្មវ័យឆ្លាតធន់នឹងអកាសធាតុ និងផ្តោតលើអាហារូបត្ថម្ភទទួលបានការពង្រឹងសមត្ថភាព។ ក្នុងនោះ សហគ្រាសធុនតូច/មធ្យមចំនួន១៨៧ ទទួលបានគាំទ្រក្នុងការទទួលបានប្រាក់កម្ចីក្នុងទំហំទឹកប្រាក់ប្រមាណជាង៥លានដុល្លារអាមេរិក និងទី៥. គ្រួសារចំនួន ២ពាន់១រយ៥០ ដែលរងផលប៉ះពាល់ដោយគ្រោះមហន្តរាយបានទទួលជំនួយតាមរយៈការឆ្លើយតបគ្រោះទឹកជំនន់របស់អង្គការទស្សនៈពិភពលោក៕
