នាឱកាសបុណ្យកាន់បិណ្ឌ ភ្ជុំបិណ្ឌ ការស្លៀកសម្លៀកបំពាក់ប្រពៃណីខ្មែរ បានបង្ហាញភាពស្រស់ស្អាត និងសមសួនបំផុតសម្រាប់នារីខ្មែរ។ ក្នុងន័យនេះ ការស្លៀកពាក់ត្រូវតាមបរិបទ ក៏ជាការតុបតែងខ្លួនមួយបែប អាចបង្ហាញពីការយល់ដឹង ការប្រាស្រ័យទាក់ទង និងការឱ្យតម្លៃដល់ខ្លួនឯង នៅតាមទីសាធារណៈផងដែរ។

កញ្ញា នុត ស្រីមុំ លើកឡើងថា ការស្លៀកសម្លៀកបំពាក់បែបប្រពៃណីខ្មែរក្នុងឱកាសបុណ្យភ្ជុំបិណ្ឌ គឺដើម្បីឆ្លុះបញ្ចាំងពីទំនៀមទម្លាប់ប្រពៃណីនៃការស្លៀកពាក់តាំងពីសម័យបុរាណរហូតមកដល់បច្ចុប្បន្ន។ កញ្ញាបន្តថា កត្តាដែលជំរុញឱ្យកញ្ញាស្លៀកសម្លៀកបំពាក់ប្រពៃណីខ្មែរ ដោយសារកញ្ញាយល់ថា ពិធីបុណ្យភ្ជុំបិណ្ឌជាបុណ្យប្រពៃណីខ្មែរដ៏ធំមួយនៅក្នុងប្រទេសកម្ពុជា នៅពេលបានស្លៀកសម្លៀកបំពាក់បែបនេះ ក៏បានបង្ហាញពីអត្តសញ្ញាណជាតិ ក៏ដូចជាឆ្លុះបញ្ចាំងពីទំនៀមទម្លាប់ប្រពៃណីដែលមានតាំងពីយូរលង់មកហើយ។

«ពេលខ្ញុំបានស្លៀកសម្លៀកបំពាក់បែបប្រពៃណី នឹងធ្វើឱ្យយើងមានអារម្មណ៍ថាខ្លួនឯងស្រស់ស្អាត ព្រោះសម្លៀកបំពាក់បែបនេះ មិនងាយមានឱកាសបានស្លៀកនោះទេ  ទាល់តែមានឱកាសពិធីបុណ្យជាតិផ្សេងៗទើបអាចស្លៀកបាន» ។

កញ្ញា នុត ស្រីមុំ

ស្រីមុំ បន្តថា ចំពោះនារីខ្មែរ នៅពេលស្លៀកពាក់បែបប្រពៃណី គឺមើលទៅសមសួនជានារីខ្មែរ ហើយយើងក៏បានជួយលើកស្ទួយសម្លៀកបំពាក់ខ្មែរ និងធ្វើឱ្យយើងដឹងថាសម្លៀកបំពាក់ខ្មែរមានច្រើនបែបបទ។ ជាមួយ​គ្នានេះ កញ្ញាក៏បានលើកទឹកចិត្តដល់យុវជនយើង ជាពិសេសនារីៗ គួរងាកមកស្លៀកសម្លៀកបំពាក់បែបប្រពៃណីខ្មែរនាឱកាសបុណ្យភ្ជុំ ដូចជា ហូលផាមួង សឹងខ្មែរ អាវប៉ាក់ខ្មែរ ឱ្យបានគ្រប់ៗគ្នាដើម្បីឱ្យបរទេសមើលមកថាប្រទេសរបស់យើងមានសម្លៀកបំពាក់មួយដ៏ស្រស់ស្អាត និងឆ្លុះបញ្ចាំងពីអត្តសញ្ញាណជាតិរបស់ខ្មែរ ព្រោះសម្លៀកបំពាក់បែបប្រពៃណីខ្មែរស្រស់ស្អាត និងទន់ភ្លន់។

ជាមួយគ្នានេះ សម្រាប់ កញ្ញា ញ៉ែម ស្រីលីន វិញនិយាយថា ដោយមើលឃើញថាវប្បធម៌នៃការស្លៀកសម្លៀកបំពាក់ប្រពៃណីខ្មែរមិនសូវមានការពេញនិយម ដោយសារមានការហូរចូលនៃវប្បធម៌ស្លៀកពាក់ពីបណ្ដាប្រទេសជិតខាង ទើបកញ្ញាចង់ចូលរួមថែរក្សាវប្បធម៌នៃការស្លៀកពាក់បែបប្រពៃណីខ្មែរចូលរួមក្នុងពិធីបុណ្យភ្ជុំបិណ្ឌ។ កញ្ញាបន្តថា ការស្លៀកពាក់បែបប្រពៃណីខ្មែរ ឃើញថាផ្ដល់ភាពស្រស់ស្អាត និងសមសួនស្រមតាមបរិបទសង្គមនាពេលបច្ចុប្បន្ន។

«ខ្ញុំគិតថាការស្លៀកសម្លៀកបំពាក់បែបប្រពៃណីក្នុងឱកាសបុណ្យភ្ជុំបិណ្យបែបនេះ ធ្វើឱ្យខ្ញុំមានអារម្មណ៍ថាសប្បាយចិត្ត និងរំភើប ព្រោះមើលទៅស្អាត សមសួនជានារីខ្មែរ»។

កញ្ញា ញ៉ែម ស្រីលីន

កញ្ញា ញ៉ែម ស្រីលីន បញ្ជាក់បន្ថែមថា ការស្លៀកសម្លៀកបំពាក់ប្រពៃណីបែបនេះ បានរួមចំណែកជួយដល់សង្គមជាតិជាច្រើន ដូចជា ផ្នែកវប្បធម៌ ជួយជនជាតិខ្មែរចេះថែរក្សាប្រពៃណីទំនៀមទម្លាប់ដែលបានបន្សល់ទុក។ លើសពីនេះ ការស្លៀកពាក់បែបប្រពៃណី បានបង្ហាញពីឥរិយាបទល្អ និងភាពសមរម្យរបស់ជនជាតិខ្មែរ។ ស្រីលីន បន្តថា កាលពីមុនរូបនាងក៏មិនមានចំណូលចិត្តស្លៀកសម្លៀកបំពាក់ប្រពៃណីនោះដែរ ប៉ុន្តែនៅពេលមានការផ្សព្វផ្សាយតាមបណ្ដាញសង្គមអំពីសារៈសំខាន់ នៃសម្លៀកបំពាក់ប្រពៃណី និងមើលទៅស្រស់ស្អាត សមសួន និងសាកសម្យពេលចូលរួមពិធីបុណ្យជាតិធំៗ ទើបជំរុញឱ្យគាត់ចង់ស្លៀកសម្លៀកបំពាក់ប្រពៃណីខ្មែរ។

សម្រាប់លោក យូ សុភា សាស្រ្ដាចារ្យផ្នែកវប្បធម៌ នៅសាកលវិទ្យាល័យភូមិន្ទភ្នំពេញ មានប្រសាសន៍ថា ការស្លៀកសម្លៀកបំពាក់ប្រពៃណីទៅកាន់ទីគោរពសក្ការៈបូជា នឹងជំរុញឱ្យអ្នកដែលស្លៀកសម្លៀកបំពាក់ប្រពៃណីប្រកាន់ភ្ជាប់នូវឥរិយាបទល្អ ទន់ភ្លន់ សុភាពរាបសារ ដើម្បីឱ្យសាកសមជាមួយសម្លៀកបំពាក់ប្រពៃណីខ្មែរ។ ឧទាហរណ៍ យុវនារីមួយចំនួន ពីមុនមកធ្លាប់តែរហ័សរហួន រប៉ិលរប៉ូច ប៉ុន្តែនៅពេលបានស្លៀកសម្លៀកបំពាក់ប្រពៃណី ក៏បានបង្ហាញឱ្យឃើញពីភាពទន់ភ្លន់ ភាពស្រស់ស្អាត សុភាពរាបសារ ដែលបង្ហាញឱ្យឃើញអំពីវប្បធម៌ខ្មែរ និងអត្តចរិកស្រ្តីខ្មែរ។

“ស្រ្តីខ្មែរកាលណាបានស្លៀកសម្លៀកបំពាក់ប្រពៃណីខ្មែរ គឺមានសម្រស់ស្រស់ស្អាត ហើយអត្តចរិកក៏សមរម្យ ថ្លៃថ្នូរទៅតាមនោះដែរ” ។

 លោក យូ សុភា សាស្រ្ដាចារ្យផ្នែកវប្បធម៌ នៅសាកលវិទ្យាល័យភូមិន្ទភ្នំពេញ

លោក យូ សុភា បន្ថែមថា នៅពេលនារីខ្មែរឱ្យ​តម្លៃទៅលើការស្លៀកសម្លៀកបំពាក់ប្រពៃណីខ្មែរ ក៏បានចូលរួមចំណែកថែរក្សាម៉ូតសម្លៀកបំពាក់កុំឱ្យបាត់បង់ និងចូលរួមលើកទឹកចិត្តដល់សិប្បករខ្មែរដែលផលិតក្រណាត់សូត្រខិតខំរកវិធីត្បាញរវៃឱ្យបានច្រើន មានទីផ្សារ មានការងារធ្វើ ក្នុងការថែរក្សាវប្បធម៌ប្រពៃណីខ្មែរផង និងរួមចំណែកកសាងសេដ្ឋកិច្ចជាតិផង។

លោកសាស្រ្ដាចារ្យក៏បានលើកទឹកចិត្តនៅក្នុងនាមជាកូនខ្មែរ ជាពិសេសយុវនារីគួរតែនាំគ្នាស្លៀកសម្លៀកបំពាក់ប្រពៃណីខ្មែរ មានហូល ផាមួង អាវប៉ាក់ សំពត់បត់ ចូលរួមក្នុងឱកាសបុណ្យភ្ជុំបិណ្ឌខាងមុខ ពីព្រោះមិនត្រឹមតែជួយបង្កើនសោភ័ភាពខ្លួនឯងប៉ុណ្ណោះទេ ថែមទាំងជាចំណាប់អារម្មណ៍របស់អ្នកដទៃ ជាពិសេសភ្ញៀវអន្តរជាតិបានទទួលស្គាល់ និងឱ្យតម្លៃវប្បធម៌ខ្មែរ ជាប្រជាជាតិមួយដែលមានសម្លៀកបំពាក់ជាវប្បធម៌របស់ខ្លួន៕