សិស្សានុសិស្សរៀតណាមប្រមាណជាង ២៣លាននាក់នៅទូទាំងប្រទេស បានអបអរសាទរបវេសនកាលថ្មី ឆ្នាំសិក្សា ២០២៣ -២០២៤ កាលពីព្រឹកថ្ងៃអង្គារ (៥ កញ្ញា) ក្រោមបរិយាកាសរីករាយ និងបង្ហាញស្នាមញញឹមដោយទំនុកចិត្តទៅលើការសិក្សារបស់ពួកគេ ។ បវេសនកាលឆ្នាំសិក្សាថ្មីនេះ បានធ្វើឱ្យសិស្សានុ សិស្ស ម្តាយឪពុក និងអាណាព្យាបាលជាច្រើន បង្ហាញពីអារម្មណ៍រីករាយ និងគាំទ្រយ៉ាងពេញទំហឹងចំពោះការអប់រំរបស់កូន ។ នេះបើតាមការចុះផ្សាយរបស់សារព័ត៌មាន VN Express ។

នៅព្រឹកថ្ងៃអង្គារ តាមដងផ្លូវនានានៅទីក្រុងហាណូយ ចាប់ម៉ោង ៦កន្លះព្រឹកមក ចរាចរណ៍ផ្តើមមមាញឹកខ្លាំង ខណៈសិស្សានុសិស្សប្រមាណជាង ២លាននាក់ធ្វើដំណើរយ៉ាងសស្រាក់សស្រាំទៅកាន់សាលារៀនរបស់ខ្លួន ។ គេកត់សម្គាល់ថា បវេសនកាលឆ្នាំសិក្សាថ្មីនេះខុសប្លែងពីឆ្នាំផ្សេងៗ ដោយហេតុថា កុមារនិងយុវជនវៀតណាមចាប់ផ្តើមស្រឡាញ់ការសិក្សាកាន់តែខ្លាំង ។

ជាមួយគ្នានេះដែរ នៅក្នុងសារព័ត៌មាន Saigon News លោក Nguyen Kim Son រដ្ឋមន្ត្រីក្រសួងអប់រំ និងបណ្តុះបណ្តាលវិជ្ជាជីវៈ មានប្រសាសន៍ថា បវេសនកាលឆ្នាំសិក្សាថ្មីជាឱកាសដែលសិស្សានុសិស្ស ចាប់ផ្តើមពង្រឹងសមត្ថភាព និងបង្កើនចំណេះដឹងរបស់ខ្លួនឱ្យកាន់តែប្រសើរប្រកបដោយគំនិតច្នៃប្រតិដ្ឋ និងនវានុវត្តន៍ ។

លោក Nguyen Kim Son រដ្ឋមន្ត្រីក្រសួងអប់រំ និងបណ្តុះបណ្តាលវិជ្ជាជីវៈ បានឱ្យដឹងថា សម្រាប់ឆ្នាំសិក្សា២០២៣ – ២០២៤ ក្រសួងអប់រំបានត្រៀមខ្លួនរួចជាស្រេច ដើម្បីអនុវត្តកម្មវិធីកំណែទម្រង់ការអប់រំ ១២ចំណុច ដោយរាប់ចាប់ពីកម្រិតមត្តេយ្យសិក្សាឡើងទៅ ។ កំណែទម្រង់កម្មវិធីអប់រំនេះ គឺឆ្លើយតបនឹងលទ្ធភាពទទួលចំណេះដឹងរបស់សិស្ស លុបបំបាត់របាំងការអប់រំ ព្រមទាំងដើរទាន់ការរីកចម្រើនបច្ចេកវិទ្យា ។

សូមជម្រាបថា រយៈពេលប្រមាណ ១០ឆ្នាំចុងក្រោយនេះ ការអប់រំនៅប្រទេសវៀតណាមចាប់ផ្តើមមានសន្ទុះរីកចម្រើនគួរឱ្យកត់សម្គាល់ និងក្លាយជាប្រទេសដែលមានការអប់រំជឿនលឿនក្នុងតំបន់អាស៊ីអាគ្នេយ៍ បន្ទាប់ពីប្រទេសសិង្ហបុរី និងប្រទេសម៉ាឡេស៊ី ។ បច្ចុប្បន្នវៀតណាមមានប្រជាជនសរុបជាង ៩៧លាននាក់ ហើយពីមួយឆ្នាំទៅមួយឆ្នាំសិស្សនិងនិស្សិតវៀតណាមមានចំនួនកាន់តែច្រើន កំពុងចាប់យកឱកាសសិក្សានៅក្រៅប្រទេស ដើម្បីពង្រីកចំណេះដឹង និងការប្រកួតប្រជែងទីផ្សារការងារនៅក្នុងតំបន់៕