ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
អំណានគឺមានសារៈសំខាន់ ហើយកាន់តែសំខាន់ជាងនោះទៅទៀត នៅក្នុងបរិបទដែលយើងត្រូវការធនធានមនុស្សមានកម្រិតវប្បធម៌ និងចំណេះដឹងបែបសកល លើសអំពីរឿងរ៉ាវនៅកម្ពុជា។ ប្រសិនបើមិនស្វះស្វែងរកព័ត៌មានដែលពាក់ព័ន្ធ ហើយផ្តល់នូវប្រយោជន៍ជាវិជ្ជមានសម្រាប់សង្គមយើងទេ នោះយើងនឹងមិនមានការអភិវឌ្ឍទេ។ នេះជាការលើឡើងរបស់ លោក ឡេង វីរៈ នាយកប្រតិបត្តិ និងនាយកគ្រប់គ្រងគម្រោងគណនេយ្យភាពសង្គម នៅក្នុងកម្មវិធី «អំណានឮៗ» ដែលរៀបចំឡើងដោយអង្គការទស្សនៈពិភពលោកកាលពីចុងសប្តាហ៍កន្លងទៅនេះ ។
លោក ឡេង វីរៈ មានប្រសាសន៍ថា បើសិនជាយើងផ្តោត ឬជ្រើសយកការអានជាត្រីមុខ នោះមានន័យថា យើងកំពុងជ្រើសសកម្មភាពមួយ ដែលនាំទៅការអភិវឌ្ឍ ទៅកាន់គ្រួសារនិងសង្គម ហើយក្លាយទៅជាធនធានមនុស្សដែលជាតិត្រូវការ។
លោក ឡេង វីរៈ
“បើសិនជាបងប្អូនជ្រើសរើសការអាន មានន័យថាបងប្អូនជ្រើសរើសការរអភិវឌ្ឍ ជ្រើសរើសការផ្តល់ជាប្រយោជន៍ជីវិតរបស់យើង ទៅដល់ជីវិតរបស់អ្នកដទៃ”
ចំណែក អ្នកឧកញ៉ាវេជ្ជបណ្ឌិត គួច ម៉េងលី ស្ថាបនិកប្រធានក្រុមហ៊ុន និងអគ្គនាយកប្រត្តិបត្តិនៃក្រុមហ៊ុន ម៉េងលី ជេគួច. អេឌ្យូខេសិន ក៏បានលើកឡើងដែរថា ៧៥ភាគរយនៃប្រជាពលរដ្ឋកម្ពុជា មានជំងឺផ្លូវចិត្ត។ ដូច្នេះ ការអានវាជាផ្នែកមួយជួយកាត់បន្ថយភាពតានតឹង (stress) បន្ថែមពីនោះ ការអានក៏ជំរុញឱ្យមនុស្សមានឱកាសស្គាល់នូវភាសាថ្មីៗ ពង្រឹងជំនាញទន់ មានសិល្បៈក្នុងការស្តាប់ រៀនគ្រប់គ្រងស្ថានភាព និងបន្ថែមនូវវោហារកោសល្យ។ មួយវិញទៀត ការអានអាចឱ្យមនុស្សក្លាយជាបុគ្គលពោរពេញដោយសុភ័គវិនិច្ឆ័យ ដែលមានន័យថាដឹងច្រើន ឮច្រើន ហើយមានបទពិសោធន៍ច្រើន។ ការអានធ្វើឱ្យមនុស្សផ្ចង់ចិត្ត និងការផ្តោតអារម្មណ៍បានមូល ឬនឹងធឹង។ បន្ថែមពីនោះ ជួយឱ្យការចងចាំមានភាពរស់រវើក បង្កើនភាពវៃឆ្លាត និងចេះបង្កើតភាពរីករាយ។
ចំពោះ លោក អ៊ុង ប៉េងអាន អ្នកផលិតមាតិកានៅលើបណ្តាញសង្គម Think with PengAnn ក៏បានលើកឡើងដែរថា មុននឹងចែករំលែកប្រធានបទអ្វីមួយគឺត្រូវការយល់ និងដឹងពីមិតិគ្រប់ជ្រុង ហើយដើម្បីឱ្យទួលបានមតិពីគ្រប់ជ្រុងទៅបាន លុះត្រាណាតែយើងជាអ្នកអានឱ្យបានគ្រប់ជ្រុងជាមុនសិន។ លោកយល់ថា ការយកយោបល់អ្នកដទៃមកថ្លឹងថ្លែងជាមួយនឹងមតិរបស់យើង ជាភាពសំខាន់នៅក្នុងផ្នែកអប់រំ ពីព្រោះពេលដែលយើងចេញអធិប្បាយវាធ្វើឱ្យយើងបានយល់ច្រើន។
លោក អ៊ុង ប៉េងអាន
“ការអានជាផ្នែកមួយនៃជីវិតយើង មិនថាធំ ឬមិនថាយើងនៅចំណុចណានៅក្នុងជីវិតក៏ដោយ ខ្ញុំគិតថាវាសំខាន់ពីព្រោះវាធ្វើឱ្យយើងមើលឃើញពិភពលោកទូលំទូលាយជាងមុន យើងមានការច្នៃប្រឌិតច្រើនជាងមុន ហើយយើងចង់និយាយមែនប៉ុន្តែយើងនិយាយដោយមានការថ្លឹងថ្លែងនិងមានគុណភាព”
ដោយឡែក កញ្ញា គីម ឌីណា អ្នកនិពន្ធសៀវភៅវិញ បានលើកឡើងថា ការអានសំខាន់ណាស់សម្រាប់កុមារ ហើយវាកាន់តែមានតម្លៃប្រសិនបើអាណាព្យាបាលជំរុញបន្ថែម និងទាមទារឱ្យយើងទាំងអស់គ្នាចូលរួមបន្ថែមជាមួយកុមារ៕
