ភ្នំពេញ – ក្នុងពិធីបើកសិក្ខាសាលាត្រីភាគីស្ដីពីការត្រួតពិនិត្យប្រចាំឆ្នាំលើកម្មវិធីការងារសមរម្យសម្រាប់ប្រទេសកម្ពុជាឆ្នាំ២០១៩-២០២៣ ធ្វើឡើងនៅសណ្ឋាគារភ្នំពេញ នាព្រឹកថ្ងៃទីពុធ ទី២៩ ខែមីនា ឯកឧត្តមបណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ មានប្រសាសន៍ថា កម្ពុជាជាប្រទេសឈានមុខក្នុងការអនុវត្តកម្មវិធីការងារសមរម្យ ស្របនឹងការអនុវត្តន៍គោលដៅអភិវឌ្ឍន៍ប្រកបដោយចីរភាព (SDG) ។

ឯកឧត្តមបណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានលើកឡើងថា កម្មវិធីការងារសមរម្យបានអនុវត្តចំនួន៥ ដំណាក់កាលរួចមកហើយសម្រាប់កម្មវិធីឆ្នាំ២០១៩-២០២៣ ។ គោលដៅអាទិភាពសំខាន់ៗ ទាំង៣ រួមមាន គោលដៅទី១. ការអភិវឌ្ឍមុខរបរ និងការងារ និងសហគ្រាស គឺបុរស ស្ត្រី យុវជន និងក្រុមជនងាយរងគ្រោះកម្ពុជាកាន់តែច្រើនទទួលបានការងារសមរម្យប្រកបដោយផលិតភាព ដោយសារការកើនឡើងនូវពិពិធកម្មសេដ្ឋកិច្ច ផលិតភាព ភាពប្រកួតប្រជែង និងការអភិវឌ្ឍសេដ្ឋកិច្ចឌីជីថល ។

ចំណែកគោលដៅទី២. ការពង្រឹង និងពង្រីកកិច្ចគាំពារសង្គម គឺបុរស ស្ត្រី យុវជន និងក្រុមជនងាយរងគ្រោះកម្ពុជាកាន់តែច្រើនមានការងារធ្វើប្រកបដោយសុខភាព និងសុវត្ថិភាព និងទទួលបានប្រយោជន៍ពីសេវាគាំពារសង្គមប្រកបដោយចីរភាព តម្លាភាព និងសមធម៌ ។ គោលដៅអាទិភាពទី៣. ការធ្វើឱ្យប្រសើរឡើងទំនាក់ទំនងវិជ្ជាជីវៈ និងសិទ្ធិការងារ មានដូចជា ធ្វើឱ្យប្រសើរឡើងនូវទំនាក់ទំនងវិជ្ជាជីវៈ និងសិទ្ធិការងារ ស្របទៅតាមបទដ្ឋានអន្តរជាតិខាងការងារ រាប់បញ្ចូលទាំងសម្រាប់ពលករទេសន្តរប្រវេសក៍ ។

សិក្ខាសាលាត្រីភាគីស្ដីពីការត្រួតពិនិត្យប្រចាំឆ្នាំលើកម្មវិធីការងារសមរម្យសម្រាប់ប្រទេសកម្ពុជាឆ្នាំ២០១៩-២០២៣ រៀបចំឡើងក្នុងគោលបំណងសំខាន់បីចំណុច រួមមាន ១. ពិនិត្យមើលសមិទ្ធផលសំខាន់ៗនៃការអនុវត្តកម្មវិធីការងារសមរម្យសម្រាប់កម្ពុជាក្នុងឆ្នាំ២០២២, ២. ការបង្ហាញអំពីចំណុចអាទិភាពសម្រាប់ឆ្នាំ២០២៣ និងការលើកកម្ពស់ការយល់ដឹងអំពីដំណើរការអភិវឌ្ឍកម្មវិធីការងារសមរម្យសម្រាប់ប្រទេសកម្ពុជា, និង៣. ការពិនិត្យអនុម័តលើសេចក្តីព្រាងផែនទីបង្ហាញផ្លូវសម្រាប់ការរៀបចំកម្មវិធីការងារសមរម្យសម្រាប់ប្រទេសកម្ពុជាសម្រាប់ឆ្នាំ២០២៤-២០២៨ ។

សូមជម្រាបថា ពិធីបើកសិក្ខាសាលាត្រីភាគីស្ដីពីការត្រួតពិនិត្យប្រចាំឆ្នាំលើកម្មវិធីការងារសមរម្យសម្រាប់ប្រទេសកម្ពុជាឆ្នាំ២០១៩-២០២៣ ធ្វើឡើងនៅសណ្ឋាគារភ្នំពេញ ដោយមានការចូលរួមពីតំណាងក្រសួងស្ថាប័នពាក់ព័ន្ធ តំណាងនិយោជក តំណាងសហជីព និងតំណាងអង្គការអន្តរជាតិខាងការងារ (ILO) និងតាមប្រព័ន្ធអនឡាញពីចម្ងាយសរុបប្រមាណ ១៣០នាក់ ។ ក្រសួងការងារបានឱ្យដឹងថា ការផ្សារភ្ជាប់កម្មវិធីការងារសមរម្យជារបៀបវារៈនៃគោលដៅអភិវឌ្ឍន៍ដោយចីរភាពឆ្នាំ២០៣០ (SDG) ដែលរាជរដ្ឋាភិបាលកម្ពុជាកំពុងអនុវត្តន៍ ៕