ភ្នំពេញ – ឯកឧត្ដម ហ៊ុន ម៉ានី ប្រធានសហភាពសហព័ន្ធយុវជនកម្ពុជា បានលើកឡើងថា នៅខែកក្កដា ខាងមុខនេះ ព្រឹត្តិការណ៍ស៊ីហ្គេម និងអាស៊ានប៉ារ៉ាហ្គេម នឹងកើតមានឡើងក្រោមភាពជាម្ចាស់ផ្ទះរបស់កម្ពុជា។ ទោះបីជាប្អូនៗ មិនអាចចូលរួមគាំទ្រព្រឹត្តិការណ៍ស៊ីហ្គេម និងអាស៊ានប៉ារ៉ាហ្គេមដោយផ្ទាល់ក្តី តែកម្មវិធីរបស់យុទ្ធនាការ Beyond the games គឺនាំមកនូវស្មារតីរួមគ្នានៃការគាំទ្រជូនទៅដល់ប្អូនៗ។  

ឯកឧត្ដមលើកឡើងបែបនេះ នៅក្នុងកម្មវិធីសប្បុរសធម៌ និងសំណេះសំណាលជាមួយកុមារកំព្រា និងមានពិការភាពនៅវិទ្យាល័យអប់រំពិសេសភ្នំពេញថ្មី កាលពីថ្ងៃទី១៩ ខែមករា កន្លងទៅ ក្នុងគោលបំណងផ្ដល់ភាពកក់ក្ដៅ ចែករំលែកក្ដីស្រលាញ់ ស្វែងយល់បន្ថែមអំពីការសិក្សារបស់សិស្សានុសិស្សដែលមានពិការភាព ប្រគល់អំណោយដើម្បីជួយគាំទ្រដល់វិទ្យាល័យ ព្រមទាំងសម្ភារៈសិក្សា និងកាដូអនុស្សាវរីយ៍។

ឯកឧត្ដម ហ៊ុន ម៉ានី ប្រធានសហភាពសហព័ន្ធយុវជនកម្ពុជា មានប្រសាសន៍ថា “ការគាំទ្រព្រឹត្តិការណ៍នេះ គឺជាភាសាបេះដូងដ៏មានអត្ថន័យបំផុតសម្រាប់ប្រទេសកម្ពុជាទាំងមូល” ។

ក្នុងឱកាសនោះ ឯកឧត្តម ហ៊ុន ម៉ានី បានកោតសរសើរ និងវាយតម្លៃខ្ពស់ចំពោះថ្នាក់ដឹកនាំ លោកគ្រូ អ្នកគ្រូ និងបុគ្គលិកនៃវិទ្យាល័យអប់រំពិសេសភ្នំពេញថ្មី ដែលបានខិតខំប្រឹងប្រែងអស់ពីកម្លាំងកាយចិត្ត ក្នុងការបង្ហាត់បង្រៀនក្មួយៗសិស្សានុសិស្សឱ្យទទួលបានការអប់រំ។

ឯកឧត្តមបានគូសបញ្ជាក់ថា ការរីកលូតលាស់នៃវិទ្យាល័យអប់រំពិសេសភ្នំពេញថ្មីនេះ ពិតណាស់បានមកពីការចូលរួមពីរាជរដ្ឋាភិបាល សប្បុរសជន លោកគ្រូ អ្នកគ្រូ ក្នុងគោលបំណងរួម គឺដើម្បីកសាងធនធានមនុស្ស ជាពិសេសគិតគូរពីអនាគតប្អូនៗដែលមានពិការភាពនៅកម្ពុជាតែម្តង។

គួរជម្រាបជូនថា កម្មវិធីសប្បុរសធម៌នេះ ជាការបង្ហាញឱ្យឃើញពី “ភាសាបេះដូងលោតក្នុងចង្វាក់តែមួយ” របស់កម្ពុជា តាមរយៈការចូលរួមរបស់សប្បុរសជន ដែលបានចំណាយពេលវេលាផ្ទាល់ខ្លួនមកជួបជុំគ្នាដើម្បីចែករំលែកក្ដីស្រលាញ់ និងជួយជាសម្ភារៈទៅដល់កុមារកំព្រា និងសិស្សានុសិស្សដែលមានពិការភាព កំពុងសិក្សានៅវិទ្យាល័យអប់រំពិសេសភ្នំពេញថ្មី។ ជាមួយគ្នានេះ ចាប់ពីថ្ងៃទី២៥ ខែមករា ឆ្នាំ២០២៣ កម្ពុជានឹងធ្វើយុទ្ធនាការជាតិរាប់ថយក្រោយ ១០០ថ្ងៃ សម្រាប់ព្រឹត្តិការណ៍ស៊ីហ្គេម លើកទី៣២ និងអាស៊ានប៉ារ៉ាហ្គេមជាលើកទី១២ ដើម្បីឱ្យប្រជាពលរដ្ឋកម្ពុជាទូទាំងប្រទេសបានដឹងថាកម្ពុជាបានត្រៀមខ្លួនរួចជាស្រេចក្នុងការធ្វើជាម្ចាស់ផ្ទះ នៃព្រឹត្តិការណ៍ការប្រកួតកីឡានេះ៕