ខ្ញី គឺជាមើមរុក្ខជាតិ ដែលមានអត្ថប្រយោជន៍ច្រើនសម្រាប់សុខភាព និងសម្បូរទៅដោយសារធាតុចិញ្ចឹម។ មើមរុក្ខជាតិប្រភេទនេះ ត្រូវបានគេចាត់ទុកជាឱសថធម្មជាតិ គ្រឿងទេស និងភេសជ្ជៈ ដ៏ពេញនិយម ក្នុងវប្បធម៌ជនជាតិអាស៊ី និងមជ្ឈិមបូព៌ា អស់រយៈពេលរាប់ពាន់ឆ្នាំមកហើយ។ ដូច្នេះ តើវាអាចជួយបង្កើនការផ្គត់ផ្គង់ទឹកដោះម្ដាយដែរឬទេ? ហើយវាមានសុវត្ថិភាពសម្រាប់ម្ដាយ និងទារក នៅអំឡុងពេលបំបៅដោះដែរឬយ៉ាងណា?

ខ្ញី និងការបំបៅដោះ

យោងតាម verywell family បានឱ្យដឹងថា នៅក្នុងតំបន់មួយចំនួន ស្ត្រីត្រូវបានឱ្យញ៉ាំខ្ញីភ្លាមៗបន្ទាប់ពីសម្រាលកូន។ ខ្ញីត្រូវបានគេជឿថា អាចជួយម្ដាយឱ្យឆាប់ជាសះស្បើយ ក្រោយសម្រាលកូន។ វាក៏មានផ្ទុកនូវសារធាតុកាឡាក់តាហ្គោក (galactagogue) ដែលជំរុញការផលិតទឹកដោះផងដែរ។ ការសិក្សាមួយនៅឆ្នាំ ២០១៦ បានសន្និដ្ឋានថា ការប្រើប្រាស់ខ្ញី ជាវិធីសាស្ត្រធម្មជាតិ ដើម្បីបង្កើនទឹកដោះម្ដាយ ក្នុងដំណាក់កាល ក្រោយសម្រាលកូន។

យ៉ាងណាក៏ដោយ រសជាតិអាហារក៏មានឥទ្ធិពល លើការបៅរបស់កូនផងដែរ។ ក្រោយទទួលទានខ្ញីហើយ ប្រសិនបើកូនរបស់អ្នក មានភាពច្របូកច្របល់ និងមានអាការៈមិនចង់បៅ អ្នកអាចបញ្ឈប់ការទទួលទានមួយរយៈ ដើម្បីស្វែងរកមូលហេតុ។ ក្នុងករណីដែលខ្ញី រំខានដល់ការបំបៅ អ្នកអាចបញ្ឈប់រហូតតែម្ដង។

កម្រិតសុវត្ថិភាពនៅអំឡុងពេលពរពោះ

នៅអំឡុងពេលពរពោះ អ្នកអាចទទួលទានខ្ញីបាន ព្រោះវាត្រូវបានគេទទួលស្គាល់ថា អាចកាត់បន្ថយអាការៈចង្អោរ ហើយមានសុវត្ថិភាព សម្រាប់ស្ត្រីមានផ្ទៃពោះ ដែលចាញ់កូន។ ទោះជាយ៉ាងណាក៏ដោយ អំឡុងពេលនេះ ការបន្ថែមខ្ញីទៅក្នុងរបបអាហាររបស់អ្នក ត្រូវមានការពិគ្រោះច្បាស់លាស់ជាមួយអ្នកជំនាញ ព្រោះការទទួលទានខ្ញីក្នុងបរិមាណច្រើនពេក អាចបង្កហានិភ័យចំពោះសុខភាព។

កម្រិតសុវត្ថិភាពក្នុងការបំបៅកូនដោយទឹកដោះ

បច្ចុប្បន្ន មានការស្រាវជ្រាវតិចតួចណាស់ អំពីសុវត្ថិភាពសម្រាប់ម្ដាយ ដែលទទួលទានខ្ញី អំឡុងពេលបំបៅកូនដោយទឹកដោះ។ ប៉ុន្តែ ក្នុងលក្ខខណ្ឌជាក់ស្ដែង វាត្រូវបានគេទទួលស្គាល់ថា មានសុវត្ថិភាព ព្រមទាំងមិនបង្កឱ្យប៉ះពាល់ ឬគ្រោះថ្នាក់ដល់ទារកនោះទេ។ យ៉ាងណាក៏ដោយ អាណាព្យាបាល គួរតែពិគ្រោះជាមួយវេជ្ជបណ្ឌិតជំនាញជានិច្ច មុនពេលចាប់ផ្ដើមផ្លាស់ប្ដូររបបអាហារ ឬប្រើថ្នាំថ្មី រួមទាំងឱសថធម្មជាតិផងដែរ។

របៀបយកខ្ញីធ្វើជាអាហារ ឬភេសជ្ជៈ​ ដើម្បីទទួលទាន

• ឬសខ្ញី ៖ អ្នកអាចបន្ថែមឬសខ្ញីស្រស់ ឬឆៅ ដើម្បីតុបតែងលើអាហារ ឬភេសជ្ជៈ ដែលត្រូវការខ្ញី។ វាអាចដាក់ពីលើអាហារ ឬភេសជ្ជៈ ឬច្នៃទៅតាមការចង់បានរបស់អ្នក តាមវិធីផ្សេងៗ។
• ទឹកខ្ញី (Ginger Ale) ៖ ទឹកខ្ញី គឺជាភេសជ្ជៈគ្មានជាតិកាហេ្វអ៊ីន និងមានរសជាតិខ្ញី។ អ្នកអាចទទួលទានទឹកខ្ញី បានដោយសុវត្ថិភាព នៅអំឡុងពេលបំបៅដោះកូន ដរាបណា អ្នកទទួលទានក្នុងបរិមាណមួយ ដែលសមរម្យ។ ប៉ុន្តែសូមអានការណែនាំនៃភេសជ្ជៈនេះ ដោយមានការប្រុងប្រយ័ត្ន ព្រោះមានភេសជ្ជៈមួយចំនួន មិនបានផ្ទុកខ្ញីពិតប្រាកដនោះទេ។
• តែខ្ញី ៖ ការទទួលទានតែរុក្ខជាតិ គឺជាវិធីបន្ធូរអារម្មណ៍ដ៏មានប្រសិទ្ធភាព។ ប៉ុន្តែអ្នកអាចទទួលទានក្នុងកម្រិតមួយសមល្មម ដើម្បីចៀសវាងពីផលប៉ះពាល់។

វិធីធ្វើតែខ្ញី

១. ដាំទឹកក្នុងឆ្នាំងតូចមួយឱ្យពុះ

២. កាត់ខ្ញីពីរបីចំណិត

៣. ដាក់ខ្ញីទៅក្នុងទឹកនោះ ហើយទុកចោល ៥នាទី

៤. បន្ទាប់មក ដកខ្ញីចេញពីទឹកនោះវិញ

៥. ដើម្បីទទួលបានរសជាតិផ្អែម អ្នកអាចបន្ថែមស្ករស ឬទឹកឃ្មុំមួយស្លាបព្រាកាហ្វេក្នុងនោះ ជាការស្រេច។

អត្ថប្រយោជន៍ខ្ញីចំពោះសុខភាពទូទៅ

នៅក្នុងវប្បធម៌ប្រទេសជាច្រើន ខ្ញីត្រូវបានគេចាត់ទុកថាជាថ្នាំព្យាបាលដ៏ពេញនិយម។ ប្រសិទ្ធភាពនៃការព្យាបាលរបស់វា គឺមានវិសាលភាពលើសពីការបំបៅកូនទៅទៀត ក្នុងនោះមានដូចជា ជួយដោះស្រាយបញ្ហាចង្អោរ, សម្រួលប្រព័ន្ធរំលាយអាហារ, ដោះស្រាយបញ្ហាគ្រុនក្ដៅដូចជា ផ្ដាសាយ ឈឺបំពង់ក និងការឆ្លងមេរោគផ្លូវដង្ហើម, ប្រឆាំងនៃការរលាក ដូចជា ការឈឺចាប់ពេលមករដូវ និងឈឺចាប់សាច់ដុំ, ជំងឺរលាកសន្លាក់, ជំងឺមហារីក, ជំងឺរ៉ាំរ៉ៃ ដូចជា ជំងឺទឹកនោមផ្អែមប្រភេទទី២ (ខ្ញីអាចកាត់បន្ថយជាតិស្ករក្នុងឈាម) និងជំងឺបេះដូង និងធ្វើឱ្យដំណើរលំហូរឈាមប្រសើរឡើង។

ប៉ុន្តែខ្ញី ក៏ដូចជាឱសថផ្សេងៗទៀតដែរ សុទ្ធសឹងតែជាអាវុធមុខពីរ ដែលអាចបង្កផលប៉ះពាល់សុខភាព ប្រសិនបើអ្នកប្រើប្រាស់ ឬទទួលទានវាលើសកំណត់។ ដូច្នេះ ដើម្បីប្រាដកថា អ្នកអាចទាញប្រយោជន៍ច្រើនបំផុតអំពីរុក្ខជាតិនេះ អ្នកអាចពិគ្រោះជាមួយអ្នកជំនាញបន្ថែម៕