ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ដើម្បីចូលរួមចំណែកជាមួយរាជរដ្ឋាភិបាលកម្ពុជា និងដើម្បីសម្រាលបន្ទុកហិរញ្ញវត្ថុក្នុងគ្រួសារយុទ្ធជនពលីក្នុងបុព្វហេតុការពារជាតិ សាលារៀនសុវណ្ណភូមិ ប្រកាសផ្ដល់អាហារូបករណ៍១០០% រហូតដល់ចប់ថ្នាក់ទី១២ សម្រាប់កម្មវិធីចំណេះដឹងទូទៅ និងភាសាអង់គ្លេសទូទៅ។
តាមរយៈអាហារូបករណ៍ នឹងផ្ដល់ឱ្យ កុមារ ឬយុវជនទាំងអស់ដែលជា កូនៗរបស់យុទ្ធជនពលីជីវិតដើម្បីបុព្វហេតុជាតិ ក្នុងជម្លោះរវាងកម្ពុជា-ថៃ កាលពីពេលថ្មីៗនេះ ឱ្យទទួលបានឱកាសសិក្សារៀនសូត្ររហូតដល់ចប់ថ្នាក់ទី១២។ អាហារូបករណ៍ផ្ដល់ដោយ លោកឧកញ៉ា ជា ធីឡាយ អគ្គនាយក និងជាស្ថាបនិក នៃស្ថាប័នអប់រំ អ៉ិន ធី ស៉ី គ្រុប។
លក្ខខណ្ឌនៃអាហារូបករណ៍ មិនកំណត់អាយុរបស់កូនៗយុទ្ធជនពលីឡើយ ហើយពួកគាត់អាចទៅសិក្សាគ្រប់សាខាទាំងអស់នៃសាលារៀនសុវណ្ណភូមិ ដែលមានទីតាំងនៅជិតបំផុត។ សាខានៃ សាលារៀនសុវណ្ណភូមិ រួមមាននៅ រាជធានីភ្នំពេញ កំពត ស្វាយរៀង កំពង់ធំ កំពង់ឆ្នាំង កំពង់ចាម កំពង់ស្ពឺ កំពង់សោម ពោធិសាត់ សៀមរាប បាត់ដំបង និង បន្ទាយមានជ័យ។
ក្នុងករណីដែលកូនៗរបស់យុទ្ធពលី មានផ្ទះ ឬទីតាំងក្រៅពីខេត្តដែលបានរៀបរាប់ខាងលើ គណកម្មាធិការ នៃសាលារៀនសុវណ្ណភូមិ នឹងរៀបចំដំណាក់កាលទី២សម្រាប់ពួកគាត់ទៅលើការស្នាក់នៅ និងការគាំទ្រផ្សេងៗ។
អាស្រ័យដូចបានជម្រាបខាងលើ សូមក្រុមគ្រួសារយុទ្ធជនពលីជីវិតក្នុងបុព្វហេតុការពារជាតិ ធ្វើការទំនាក់ទំនងទៅកាន់ សាលារៀនសុវណ្ណភូមិ តាមរយៈលេខ ០១៥ ៨៣៨ ០១៥ និង ០១៥ ៨៣៨ ៩០២ ចាប់ទីថ្ងៃផ្សាយដំណឹងនេះតទៅ៕
