ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ព្រះសីហនុ – មានប្រសាសន៍នៅក្នុងពិធីសម្ពោធដាក់ឱ្យប្រើប្រាស់ផ្លូវលេខ១៤៦B តភ្ជាប់ទៅផ្លូវលេខ១៤៨ ក្នុងខេត្តព្រះសីហនុ នៅព្រឹកថ្ងៃទី២២ ខែធ្នូ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា បានធ្វើការអំពាវនាវដល់ប្រជាពលរដ្ឋកម្ពុជាទាំងអស់ សូមរៀនច្បាប់ចរាចរណ៍ ហើយគោរពច្បាប់ចរាចរណ៍ឱ្យបានម៉ឺងម៉ាត់ ដោយមិនគួរខ្លាចប៉ូលិសចរាចរណ៍នោះទេ។
សម្តេចតេជោមានប្រសាសន៍ថា កាលពីមុនគឺប្រជាជនកម្ពុជាត្រូវស្លាប់ដោយសារសង្រ្គាម បន្ទាប់មកស្លាប់ដោយសារគ្រាប់មីន ជំងឺអេដស៍ ក៏ដូចជាដោយសារកូវីដ១៩ ប៉ុន្តែឥឡូវនេះ ជារៀងរាល់ថ្ងៃប្រជាជនកម្ពុជាបានស្លាប់ដោយសារគ្រោះថ្នាក់ចរាចរណ៍។
សម្តេចតេជោលើកឡើងថា ឥឡូវនេះប្រជាពលរដ្ឋរបស់យើងហាក់កំពុងតែខ្លាចប៉ូលិសចរាចរណ៍ ជាជាងខ្លាចច្បាប់ទៅវិញ ។ សម្តេចថា ប្រសិនបើយើងគោរពច្បាប់ យើងមិនចាំបាច់ត្រូវខ្លាចប៉ូលិសចរាចរណ៍នោះទេ ព្រោះប៉ូលិសចរាចរណ៍នឹងមិនធ្វើអ្វីចំពោះអ្នកដែលមិនធ្វើខុសច្បាប់នោះឡើយ។
សម្តេចតេជោ ហ៊ុន សែន នាយករដ្ឋមន្រ្តី
“កន្លែងខ្លះអត់មានប៉ូលិសចរាចរណ៍ គឺគាត់លេងទៅម៉ាសេរីតែម្តង ប៉ុន្តែដល់ទៅឃើញប៉ូលិសចរាចណ៍ គាត់ថាខ្លាចប៉ូលិសផាក អញ្ចឹងគាត់អត់ខ្លាចច្បាប់ឯណា… ប្រសិនបើយើងគោរពច្បាប់ យើងអត់ត្រូវការខ្លាចប៉ូលិសចរាចរណ៍អីទេ”
ជាមួយគ្នានេះ សម្តេចតេជោនាយករដ្ឋមន្រ្តីក៏រំពឹងថា ប្រជាពលរដ្ឋកម្ពុជានឹងកែលម្អផ្នត់គំនិត នាំគ្នាគោរពច្បាប់ចរាចរណ៍ ជាជាងខ្លាចប៉ូលិសចរាចរណ៍ ដែលនេះ ទើបយើងអាចកសាងប្រទេសជាតិរបស់យើង និងកាត់បន្ថយគ្រោះថ្នាក់ ឬបញ្ចប់គ្រោះថ្នាក់ទៅលើបញ្ហាទាក់ទងនឹងចរាចរណ៍នេះ។
បើយោងតាមរបាយការណ៍របស់គណៈកម្មាធិការជាតិសុវត្ថិភាពចរាចរណ៍ផ្លូវគោកបានឱ្យដឹងថា នៅក្នុងឆមាសទី១ ឆ្នាំ២០២២កន្លងទៅនេះ គ្រោះថ្នាក់ចរាចរណ៍នៅកម្ពុជាបានកើតឡើងចមនួន ១៦០៩ករណី ក្នុងនោះបណ្តាលឱ្យមនុស្សស្លាប់ចំនួន ៩៤២នាក់ ដោយក្នុងនោះជាមធ្យមក្នុងមួយថ្ងៃមានមនុស្សចំនួន៥នាក់ស្លាប់ និងរបួស១៣នាក់។
ដោយឡែកមូលហេតុបង្កគ្រោះថ្នាក់ចរាចរណ៏ដែលបន្តកើនឡើង មានដូចជា ការបើកលើសល្បឿនកំណត់ ៣៨%, ការមិនគោរពសិទ្ធិអាតិភាពចំនួន២៤% និងការមិនប្រកាន់ស្តាំចំនួន ១១% នៅតែមានកម្រិតខ្ពស់។ ជាមួយនេះ ករណីល្មើស ច្បាប់ស្តីពីចរាចរណ៍ផ្លូវគោកដែលនៅតែបន្តកើតមានឡើង គឺការមិនពាក់មួកសុវត្ថិភាពចំនួន ៩០% ការមិនពាក់ខ្សែក្រវាត់ ចំនួន ៥២% និងការប្រើប្រាស់ទូរស័ព្ទពេលបើកបរចំនួន ១០%៕
