ឯកឧត្តម ហង្ស សុតសំភារ រដ្ឋលេខាធិការ​ក្រសួងរៀបចំដែនដី នគរូបនីយកម្ម និង​សំណង់ បានកត់សម្គាល់ឃើញថា ពីមួយឆ្នាំទៅ​មួយ​ឆ្នាំ ស្ថាបត្យករ​ជាស្រ្តី ក៏​ដូចជាស្រ្តី​រៀនផ្នែកស្ថាបត្យកម្ម មានចំនួនកាន់តែច្រើន ដែលវា​បានបង្ហាញពីសមភាព នៃសមត្ថភាពរវាងបុរស និងស្រ្តីនៅកម្ពុជា។

ក្នុងពិធីបិទ នៃការប្រកួតប្រជែងស្នាដៃរចនា​ឧទ្យានកោះនរា “បេះដូងរាជធានី” វគ្គជម្រុះចុងក្រោយ កាលពីថ្ងៃពុធ (១៤ មករា) ឯកឧត្តម ហង្ស សុតសំភារ លើកឡើងថា តាមរយៈ​ការ​ប្រកួតប្រជែង​ស្នាដៃនេះ បេក្ខជន​ទាំង​បុរស និង​ស្រ្តី ពួកគេ​មានសមត្ថភាព​ខ្ពស់​ដូចគ្នា ចាប់តាំងពីវគ្គដំបូង រហូត​ដល់វគ្គបញ្ចប់។ តែយ៉ាងណា ឯកឧត្តម​បាន​បង្ហាញមោទនភាព​ចំពោះស្ថាបត្យករជាស្រ្តី ដែល​ចូលរួមប្រកួត​មានចំនួនច្រើន។

រដ្ឋលេខាធិការ​ក្រសួងរៀបចំដែនដី នគរូបនីយកម្ម និងសំណង់ បានធ្វើការកត់សម្គាល់ថា កាលពីមុន​ស្ថាបត្យករជាស្រ្តីមានចំនួនតិចតួចណាស់ ប៉ុន្តែ​បច្ចុប្បន្ន អ្នក​ដែល​រៀនផ្នែកស្ថាបត្យកម្មជាស្រ្តី មានចំនួនកាន់តែច្រើន, ឯកឧត្តម ហង្ស សុតសំភារ មានប្រសាសន៍ថា ក្នុងការ​ប្រកួតប្រជែង​ស្នាដៃស្ថាបត្យកម្មជាច្រើន​នាពេលកន្លងមក បេក្ខនារីជា​ច្រើនបានចូលរួម ហើយពួកគេ​ក៏ទទួល​បានចំណាត់ថ្នាក់ល្អផងដែរ ដែលនេះបានបង្ហាញពីសមត្ថភាព​របស់ស្រ្តីខ្មែរ មានគុណតម្លៃស្មើនឹងបុរសដែរ។

ឯកឧត្តម ហង្ស សុតសំភារ មើលឃើញថា កាលពីមុនស្រ្តី មិនបានបញ្ចេញនូវសមត្ថភាពផ្ទាល់ទេ ប៉ុន្តែបច្ចុប្បន្ន ស្រ្តីមិនខ្លាចបុរសឡើយ ហើយក៏មិនខ្លាចវេទិកានៃការប្រកួតប្រជែងដែរ ពួកគេ​ក្លាហាន ហើយហ៊ានបញ្ចេញមតិ និងហ៊ានបញ្ចេញសមត្ថភាពជាសាធារណៈ។ បើនិយាយពីស្នាដៃស្ថាបត្យកម្មវិញ ឯកឧត្តមរដ្ឋលេខាធិការ​ចាត់ទុកថា ជាស្ថាបត្យករវ័យក្មេង​បន្តវេន។

ឯកឧត្តម ហង្ស សុតសំភារ បន្ថែមថា បច្ចុប្បន្ន​មនុស្ស​ដែលខ្លាំង មិន​មែនបុរស​តែ​ម្នាក់ឯងនោះទេ។ ឯកឧត្តមមានប្រសាសន៍​ថា មនុស្ស​ប្រុស និង​មនុស្សស្រី ប្រៀបដូចជា​ដៃឆ្វេង និង​ដៃស្តាំ ដូច្នេះប្រសិន​បើដៃ​ស្តាំខ្លាំង ហើយដៃឆ្វេងមិនមានសកម្មភាព ក៏​មិន​បាននោះដែរ។ ដូច្នេះ ឯកឧត្តមរំពឹងថា សង្គមជាតិយើងនឹង​អភិវឌ្ឍកាន់តែខ្លាំង ព្រោះពេលនេះ​ ដៃឆ្វេងក៏ខ្លាំង ហើយ​ដៃស្តាំក៏ខ្លាំងដូចគ្នាដែរ។

“ខ្ញុំគិតថានៅពេលដែលនារីរបស់យើងខ្លាំង ធ្វើឱ្យប្រទេសរបស់យើងខ្លាំង”

សម្រាប់ ឯកឧត្តម ជា ចន្ទ័ថែបរ៉ាស អគ្គលេខាធិការរង នៃអគ្គលេខធិការដ្ឋានគណៈស្ថាបត្យករនៃកម្ពុជា ក៏​មើលឃើញដែរថា សម័យបច្ចុប្បន្ននេះ ស្ត្រីចូលរួមចំណែកក្នុងវិស័យស្ថាបត្យកម្មមានការកើនឡើង ខណៈជំនាញមួយនេះ សមស្របសម្រាប់ទាំងបុរស និងស្ត្រី ជាពិសេស លើផ្នែករចនា តុបតែងលម្អ និងស្ថាបត្យកម្មទេសភាព ដែលជាមុខជំនាញស្របនឹងអ្វីដែលស្ត្រីងាយធ្វើ។ រីឯសមត្ថភាពវិញ ស្រ្តីក៏មានភាពឆ្នើមដូចនឹងបុរសដែរ។

តាមទិន្នន័យ ដែលឯកឧត្តមបានដឹង បច្ចុប្បន្ននេះ ស្ថាបត្យករជាស្ត្រីមានចំនួនប្រមាណ១៦ភាគរយ នៃចំនួនស្ថាបត្យករសរុប ដែលកាលពីមុន ស្រ្តីមានចំនួនតែប្រមាណ៩ ឬ១០ភាគរយប៉ុណ្ណោះ៕