បរិយាកាសជះឥទ្ធិពលដល់ការបង្កើនផលិតភាពនៃការសិក្សា តាមរយៈការជ្រើសកៅអីអង្គុយ ពន្លឺភ្លើង សម្លេងខាងក្រៅ និងពណ៌ទៀតផង ដូច្នេះបរិយាកាសនៃការរៀនសូត្រដើរតួនាទីសំខាន់ក្នុងការជួយសម្រេចបាននូវភាពជោគជ័យក្នុងការសិក្សា។ តាមរយៈគេហទំព័រ UCAS បានឱ្យដឹងថា ចំពោះសិស្សដែលមានឱកាសរៀនសូត្រ នៅកន្លែងដែលមានបរិយាកាសវិជ្ជមាន និងការគិតគូរប៉ុន្មានចំណុចដែលបានរៀបរាប់អំបាញ់មិញនេះ គឺធ្វើឱ្យការសិក្សារបស់ពួកគេ ទទួលបានលទ្ធផលល្អ មានកម្លាំងចិត្ត និងការជំរុញទឹកចិត្តឱ្យបន្តក្នុងការសិក្សា ក៏ដូចជាសមត្ថភាព នៃការស្រូបយកចំណេះដឹងបន្ថែម។

ដោយឡែកសិស្សដែលរៀននៅក្នុងបរិយាកាសមួយ ដែលពុំសូវបានគិតគូរអំពីការរៀបចំ និងអនាម័យ ឬហៅថាបរិយាកាសមិនសូវអំណោយទាន មិនមានផាសុកភាព មានសម្លេងរំខានខ្លាំង ឬមានការរំខាន ធ្វើ​ឱ្យ​ពិបាកក្នុងការស្រូបយកព័ត៌មានថ្មីៗ និងពិបាកក្នុងការផ្តោត ធ្វើឱ្យផលិតភាពនៃការរៀនសូត្ររបស់ពួកគេធ្លាក់ចុះទៅតាមនោះដែរ។

មិនថាអាណាព្យាបាល សិស្ស ឬក៏អ្នកដែលធ្វើការក្នុងប្រព័ន្ធអប់រំនោះទេ ការសិក្សាស្វែងយល់អំពីរបៀបដែលបរិយាកាសជះឥទ្ធិពលលើការសិក្សា គឺជាកត្តាមួយដ៏ឈ្លាសវៃក្នុងការជំរុញផលិតភាព នៃការសិក្សាឱ្យកាន់តែមានភាពរីកចម្រើនក្នុងរយៈពេលវែង។ ដូច្នេះគួរសិក្សាអំពីការរៀបចំ ឬពិនិត្យតាមរយៈគន្លឹះខាងក្រោម ដើម្បីដឹងថា តើគួរអភិវឌ្ឍន៍កន្លែងសិក្សាបែបណាខ្លះ ឱ្យឆ្លើយតបនឹងថាមពលដែលបានចំណាយ។

ផាសុកភាព ៖ ​ការបង្កើតផាសុកភាពទៅកាន់បរិយាកាសសិក្សា មិនមែនធ្វើឱ្យសិស្សមានភាពស្រណុកស្រួលរហូតលែងចង់រៀន និងចូលចិត្តដាក់ខ្លួនតែកន្លែងមានសុវត្ថិភាពរហូតមិនហ៊ានសាកល្បងអ្វីថ្មីៗនោះទេ! ប៉ុន្តែការបង្កើនភាពងាយស្រួលក្នុងការសិក្សាជាការអន្ទងឱ្យចាប់អារម្មណ៍លើការសិក្សាបន្ថែម។ ដូចនេះគួរកែច្នៃកន្លែងសិក្សាឱ្យកាន់តែទាក់ទាញ និងមានផាសុកភាព មិនថាក្នុងបន្ទប់គេង នៅក្នុងហាងកាហ្វេ ឬក៏នៅក្នុងបណ្ណាល័យរបស់សាលានោះទេ អ្វីដែលសំខាន់គឺធ្វើឱ្យកន្លែងនោះ គួរឱ្យចង់ទាញសៀវភៅមកអាន ឬទាញលំហាត់មកអនុវត្តន៍។ ការជ្រើសរើសកៅអី និងការជ្រើសរើសសម្ភារៈ ឬតុបតែងកន្លែងរៀនគឺជាការរួមចំណែកឱ្យសិស្សកាន់តែស្រឡាញ់ទីតាំងដែលខ្លួនសិក្សា។

ឥទ្ធិពលរបស់ពន្លឺ ៖ ពន្លឺគ្រប់គ្រាន់ គឺជាកត្តាមួយជួយបំបាត់អាការៈ ងងុយគេងកំឡុងពេលសិក្សា ដូច្នេះគួរតែពិចារណាអំពីទីតាំង ដែលមានពន្លឺគ្រប់គ្រាន់នៅកន្លែងរៀន ហើយបើបានពន្លឺជះមកពីព្រះអាទិត្យទៀត នោះគឺកាន់តែមានប្រសិទ្ធភាពទ្វេដង ព្រោះពន្លឺពីធម្មជាតិបានជំរុញឱ្យអារម្មណ៍ល្អ កាត់បន្ថយអាការស្រ្តេស និងអាការថប់បារម្ភ។ ដូច្នេះព្យាយាមទាញប្រយោជន៍ពីពន្លឺព្រះអាទិត្យឱ្យបានច្រើនតាមដែលអាចធ្វើបាន ដោយដាក់តុក្បែរបង្អួច ឬក៏ជ្រើសរើសបន្ទប់រៀនដែលអាចបើកបង្អួចឱ្យមានពន្លឺចេញចូលបាន ធ្វើយ៉ាងណាប្រើប្រាស់ពន្លឺព្រះអាទិត្យឱ្យបានច្រើន។

ពណ៌ ៖ ពណ៌មានតួនាទី និងអត្ថប្រយោជន៍រៀងៗខ្លួន ពណ៌នីមួយៗ មានឥទ្ធិពលផ្សេងៗគ្នា ដូច្នេះការជ្រើសរើសពណ៌ក្នុងការរៀបចំកន្លែងសិក្សា អាស្រ័យទៅលើការចង់បាន និងទីតាំងជាក់ស្ដែងរបស់សិស្សម្នាក់ៗដែរ តួយ៉ាងដូចជា ពណ៌ក្រហមធ្វើឱ្យអារម្មណ៍នឹងធឹង មាំទាំ និងអារម្មណ៍មុតមាំ ប៉ុន្តែវាក៏អាចបង្កើនសម្ពាធឈាមខ្ពស់ និងបង្កើនកម្រិតស្ត្រេស ដូច្នេះសម្រាប់អ្នកដែលកំពុងប្រឈមនឹងបញ្ហាទាំងនេះប្រហែលជាត្រូវការពណ៌ផ្សេងជំនួសវិញ។ សម្រាប់អ្នកសិក្សាគួរជ្រើសរើសពណ៌ស្រាលៗវិញ និងមិនលាយចម្រុះច្រើនពេក ព្រោះអ្នកសិក្សាត្រូវការបរិយាយកាសមួយដែលបន្ថយអាការស្រ្តេស។

សំឡេងបន្ថែម ឬបន្ទរកំឡុងពេលរៀន ៖ អ្នកខ្លះត្រូវការភ្លេងដើម្បីបង្កើនផលិតភាពក្នុងការសិក្សា ប៉ុន្តែអ្នកខ្លះវិញទាល់តែស្ងាត់ឈឹងតែម្តង ទើបអាចផ្តោតលើការសិក្សាបាន ដូច្នេះការសង្កេតពីខ្លួនឯងជាជំហានដំបូង ដើម្បីដឹងថាខ្លួនជាប្រភេទរៀនក្នុងបរិយាកាសអ៊ូអរ ឬស្ងាត់ស្ងៀម។

កាត់ផ្តាច់សម្ភារៈរំខាន ៖ មានការសិក្សាជាច្រើនបានឱ្យដឹងថា ភាពរប៉ាត់រប៉ាយ ជះផលមិនល្អទៅកាន់ការសិក្សា ដូច្នេះគួរសម្អាត និងកាត់ចោលរាល់សម្ភារៈដែលមិនពាក់ព័ន្ធនឹងការសិក្សា ក៏ដូចជាសម្ភារៈដែលនាំឱ្យការរំខាន ដូចជាឧបករណ៍ហ្គេម ទូរទស្សន៍ ឬអាហារសម្រន់ដែលនាំឱ្យប៉ះពាល់ដល់សុខភាពជាដើម ដែលធ្វើយ៉ាងណាឱ្យទីតាំងស្រឡះ ងាយស្រួលរកសម្ភារៈសិក្សា និងងាយស្រួលក្នុងការទាញសៀវភៅមកអាន។

ជារួមមកវិញ កន្លែងរៀនសូត្រមានឥទ្ធិលខ្លាំងណាស់ ក្នុងការជំរុញដល់ការសិក្សាមួយ ដែលមានប្រសិទ្ធភាព ក៏ដូចជាការស្រូបយកព័ត៌មានថ្មីៗ ដូចនេះធ្វើយ៉ាងណាឱ្យទីតាំងទាំងនោះ មានផាសុកភាព ងាយស្រួល មានភ្លេងនាំឱ្យអារម្មណ៍ផ្តោត មានពន្លឺគ្រប់គ្រាន់ មានពណ៌ដែលធ្វើឱ្យចិត្តកាន់តែស្រស់ស្រាយចង់រៀន និងផ្តល់អារម្មណ៍រីករាយក្នុងការសិក្សា៕