ក្នុងពិធីបើកសិក្ខាសាលាស្តីពីយុទ្ធសាស្រ្តសហគមន៍សាលារៀនគាំទ្រការអនុវត្តស្តង់ដាសាលាមត្តេយ្យសិក្សាគំរូ នៅខេត្តកំពង់ចាម កាលពីពេលថ្មីៗនេះ លោកជំទាវបណ្ឌិត គឹម សេដ្ឋានី ម​ន្រ្តីជាន់ខ្ពស់ក្រសួងអប់រំ យុវជន និងកីឡា មានប្រសាសន៍ថា ការងារអប់រំកុមារតូចពិតជាមានសារៈសំខាន់ដែលជះឥទ្ធិពលដល់ការសិក្សានៅថ្នាក់កម្រិតខ្ពស់។

លោកជំទាវបណ្ឌិត គឹម សេដ្ឋានី បញ្ជាក់បន្ថែមថា កំណើនលទ្ធផលតេស្ដ SEA-PLM តេស្ដ PISA បញ្ជាក់ឱ្យឃើញពីការអប់រំកុមារតាំងពីកម្រិតដំបូង ហើយនេះជាហេតុផលទាមទារឱ្យគ្រប់ភាគីពាក់ព័ន្ធទាំងអស់ចូលរួមសហការ ជួយក្នុងការបណ្ដុះបណ្ដាលមូលដ្ឋានគ្រឹះដល់កុមារតូចមុនឈានចូលរៀនបឋមសិក្សា។ លោកជំទាវបណ្ឌិតបន្តថា ស្របតាមចក្ខុវិស័យរាជរដ្ឋាភិបាលនីតិកាលទី៧ នៃរដ្ឋសភា អនុវិស័យអប់រំកុមារតូចត្រូវបានទទួលស្គាល់ថាជាអនុវិស័យដ៏សំខាន់ក្នុងការចូលរួមលើកកម្ពស់គុណភាពអប់រំនៅគ្រប់ភូមិសិក្សា។

លោកជំទាវបណ្ឌិត លើកឡើងទៀតថា ការយល់ដឹងពីសារៈសំខាន់នៃការអប់រំកុមារតូច ការប្ដេជ្ញាចិត្តរួមគ្នានៅក្នុងការពង្រីក និងលើកកម្ពស់សេវាអប់រំកុមារតូចពីតួអង្គពាក់ព័ន្ធដូចជា លោកគ្រូ អ្នកគ្រូ អាជ្ញាធរ សហគមន៍ មាតាបិតា បានធ្វើឱ្យតួលេខនៃការចូលរៀននៅមត្តេយ្យសិក្សាត្រូវបានកើនឡើងគួរឱ្យកត់សម្គាល់។

ជាមួយគ្នានេះ លោកជំទាវ គឹម សេដ្ឋានី ក៏​បានអបអរសាទរ និងវាយតម្លៃខ្ពស់ចំពោះនាយកដ្ឋានអប់រំកុមារតូច និងអ្នកពាក់ព័ន្ធទាំងអស់ដែលបានខិតខំប្រឹងប្រែងក្នុងការពង្រឹង និងពង្រីកសេវាអប់រំកុមារតូច ទាំងមត្តេយ្យរដ្ឋ មត្តេយ្យ​សហគមន៍ មត្តេយ្យគ្រប់រូបភាព និងមត្តេយ្យឯកជន ដែលបានធ្វើឱ្យកំណើនការចូលរៀនរបស់កុមារតូចមានសន្ទុះខ្លាំងក្លា។

បើតាម​របាយការណ៍ស្តីពី​លទ្ធផល​សម្រេច​បានរបស់ក្រសួងអប់រំក្នុងឆ្នាំ​សិក្សា​២០២៤-២០២៥ បានបង្ហាញថា កុមារ​អាយុ​៥ឆ្នាំ មានចំនួន​ ២៣០ ១៨៤នាក់ (ស្រី ១១៣ ១៩១នាក់) ទទួលបាន​សេវាអប់រំគ្រប់រូបភាព ដែលស្មើ​ ៧១,៤ភាគរយ (ស្រី​៧១,៩ភាគរយ)។ ជាមួយគ្នានេះ ក្នុង​ឆ្នាំសិក្សា២០២៤-២០២៥ រាជធានី-ខេត្ត​ចំនួន១១ បាន​ផ្តល់​សេវាអប់រំកុមារតូចអាយុ​៥​ឆ្នាំ គ្រប់រូបភាព​ខ្ពស់​ជាង​ថ្នាក់ជាតិជាក់ស្តែង ពី​ ៧៣,៤ភាគរយ ទៅ៩៨,​៥ភាគរយ។

​គួរជំរាបជូនថា សិក្ខាសាលានេះ រៀបចំដោយនាយកដ្ឋានអប់រំកុមារតូចសហការជាមួយមន្ទីរអប់រំ យុវជន និងកីឡាខេត្តកំពង់ចាម ក្រោមកិច្ចសហការគម្រោងកែលម្អការអប់រំចំណេះទូទៅមូលនិធិបន្ថែម(GEIP-AF) ដើម្បីលើកកម្ពស់សមត្ថភាពមន្ត្រីជំនាញពាក់ព័ន្ធថ្នាក់ជាតិ ថ្នាក់ក្រោមជាតិ ក្នុងការគាំទ្រសាលាមត្តេយ្យសិក្សាក្នុងការអនុវត្តស្តង់ដាសាលាមត្តេយ្យសិក្សាគំរូ ព្រមទាំងបង្កើនសមត្ថភាពគណៈគ្រប់គ្រង និងគ្រូមត្តេយ្យសិក្សានៅតាមសាលាមត្តេយ្យសិក្សាគោលដៅក្នុងការអនុវត្តស្តង់ដាសាលាមត្តេយ្យសិក្សាគំរូប្រកបដោយប្រសិទ្ធភាព៕