ពិធីបុណ្យ​ចូលឆ្នាំថ្មីប្រពៃណីជាតិខ្មែរ ជាពិធីបុណ្យធំមួយ​របស់ជនជាតិខ្មែរ ដែលតែងប្រព្រឹត្ត​ធ្វើរយៈពេលបី​ថ្ងៃ នៅខែចេត្រ ឬពាក់កណ្តាលខែមេសា។ អ្នកជំនាញមើលឃើញថា រដូវបុណ្យចូលឆ្នាំខ្មែរ គឺ​ជាពេលវេលាដ៏ល្អ សម្រាប់យុវជន​ក្នុង​ការ​បង្ហាញការដឹងគុណទៅកាន់ឪពុកម្តាយ បងប្អូនសាច់ញាតិ ព្រមទាំងបង្កើតបរិយាកាសរីករាយតាមទំនៀមទម្លាប់ខ្មែរ។

លោកបណ្ឌិត យង់ ពៅ អគ្គលេខាធិការ នៃរាជបណ្ឌិតសភាកម្ពុជា មានប្រសាសន៍ថា តាមទំនៀមទម្លាប់ខ្មែរ នៅក្នុងពិធីបុណ្យចូលឆ្នាំ កូនៗតែងគោរពជូនទេយ្យវត្ថុទៅកាន់ឪពុកម្ដាយ អ្នកមានគុណ ដើម្បីបង្ហាញពីការដឹងគុណ។ លោកថា នេះជាប្រពៃណីទំនៀមទម្លាប់ល្អមួយក្នុងការជូនឪពុកម្ដាយ អ្នកមានគុណ ឬចាស់ទុំនៅក្នុងក្រុមគ្រួសារ គេហៅថា ជូនវត្ថុសក្ការៈ ជាការតបស្នងសងគុណ។

អគ្គលេខាធិការ នៃរាជបណ្ឌិតសភាកម្ពុជា បន្ថែមថា ការជូនតេយ្យវត្ថុ បច្ច័យ ឬក៏សម្ភារៈផ្សេងៗ រួមទាំងសម្លៀកបំពាក់ ទៅកាន់ឪពុកម្ដាយ អ្នកមានគុណ អ្នកចិញ្ចឹមបីបាច់ ចាស់ព្រឹទ្ធាចារ្យ គ្រូបង្រៀន ក្នុង​ឱកាសបុណ្យចូលឆ្នាំខ្មែរនេះ គឺជាទស្សនៈក្នុងសង្គមខ្មែរដែលមានយូរមកហើយ។ ហើយនេះជាសីលធម៌ល្អក្នុងសង្គមខ្មែរ ពោលគឺធ្វើឱ្យកូនចៅចេះគោរពដឹងគុណឪពុកម្ដាយ ចាស់ទុំ អ៊ំ ពូមីង ពីមួយជំនាន់ទៅមួយជំនាន់។

“រូបភាពជូនទេយ្យវត្ថុទៅកាន់ឪពុកម្ដាយ ឬអ្នកមានគុណនេះ គឺមានតាំងពីយូរមក ហើយនេះជាទំនៀមទម្លាប់ល្អរបស់ខ្មែរ”

លោក សៅ សាមម៉ាឌី ជាគ្រូបង្រៀននៅសាលាអន្តរជាតិមួយកន្លែង ឱ្យដឹងថា ពិធីបុណ្យចូលឆ្នាំខ្មែរ គឺជាពេលវេលាបានទៅលេងស្រុកកំណើត ដើម្បីជួបជុំក្រុមគ្រួសារ និងបងប្អូន។ ក្នុងឱកាសចូលឆ្នាំថ្មីខាងមុខនេះ លោកនឹងជូនថវិកាទៅឪពុកម្ដាយ ព្រមទាំងធ្វីម្ហូបឆ្ងាញ់ៗជូនលោកទាំងពីរពិសារ។ លោកគិតថា ការបង្ហាញក្ដីស្រឡាញ់នេះ ពិតជាអាចធ្វើឱ្យឪពុកម្ដាយសប្បាយចិត្ដ។

គ្រូបង្រៀនរូបនេះ បន្ថែមថា ក្នុងឱកាសបុណ្យចូលឆ្នាំខ្មែរខាងមុខ ទោះបីយើងស្ថិតនៅទីណា កន្លែងណា ឬឆ្ងាយយ៉ាងណាក៏ដោយ សូមកុំភ្លេចនឹករលឹកដល់ឪពុកម្ដាយដែលកំពុងទន្ទឹងរង់ចាំផ្លូវកូនៗ ដើម្បីបានមកជួបជុំគ្នា។ ទោះយើងជាកូនគ្មានអ្វីធំដុំជូនពួកគាត់ ប៉ុន្តែឱ្យតែបានឃើញមុខកូនៗក៏ឪពុកម្ដាយសប្បាយចិត្ដណាស់ទៅហើយ។

កញ្ញា ឌឹម វណ្ណណេត និស្សិតឆ្នាំទី៤ ជំនាញគ្រប់គ្រងពាណិជ្ជកម្មអន្តរជាតិ នៃសកលវិទ្យាល័យភូមិន្ទភ្នំពេញ លើកឡើងថា ពិធីបុណ្យចូលឆ្នាំខ្មែរ ជាពិធីបុណ្យជាតិមួយដែលគ្រប់ស្ថាប័ននឹងត្រូវឈប់សម្រាក ហើយក៏ជាឱកាសមួយសម្រាប់បងប្អូនដែលនៅឆ្ងាយពីគ្រួសារ អាចជួបជុំសួរសុខទុក្ខគ្នា ធ្វើដំណើរកម្សាន្ត ប្រារព្ធពិធីអបអរសម្រាប់បុណ្យចូលឆ្នាំថ្មីតាមប្រពៃណីជាតិដោយសប្បាយរីករាយ។

សម្រាប់ កញ្ញា វណ្ណណេត ក្នុងឱកាសបុណ្យចូលឆ្នាំខាងមុខនេះ កញ្ញាក៏មានកាដូបន្តិចបន្តួចតាមលទ្ធភាពជូនទៅកាន់ឪពុកម្ដាយ ទោះបីមិនមានតម្លៃថ្លៃ ប៉ុន្តែកញ្ញាជឿជាក់ថា ឪពុកម្ដាយនឹងសប្បាយចិត្ត។ កញ្ញា ឌឹម វណ្ណណេត គិតថា ឪពុកម្ដាយគ្រប់រូបមិនចង់បានអ្វីពីកូនក្រៅពីចង់ឃើញមុខកូន ទង្វើយកចិត្តទុកដាក់របស់កូនចំពោះឪពុកម្ដាយ និងចង់ឱ្យកូនបានមកជួបជុំគ្រួសារក្នុងឱកាសបុណ្យប្រពៃណីជាតិខ្មែរ។

និស្សិតឆ្នាំទី៤ រូបនេះ ក៏បានលើកទឹកចិត្តដល់យុវជនខ្មែរក្នុងឱកាសបុណ្យចូលឆ្នាំខាងមុខនេះ ប្រសិនបើមានពេលវេលាឈប់សម្រាក សូមចំណាយពេលជាមួយក្រុមគ្រួសារ មនុស្សជាទីស្រឡាញ់ឱ្យបានច្រើន ដោយបង្ហាញការយកចិត្តទុកដាក់សូម្បីរឿងតូចតួចក៏ដោយ៕