ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ហេតុអ្វីបានជាបច្ចុប្បន្ននេះ នៅតែមានមនុស្សមើលរំលងទាក់ទងនឹងការហាត់កីឡា ខណៈការបរិភោគអាហារល្អ និងការធ្វើលំហាត់ប្រាណ វាពិតជាមានសារៈសំខាន់ណាស់សម្រាប់ការរស់នៅប្រចាំថ្ងៃ។ ដូច្នេះយើងគ្រប់គ្នាគួរតែត្រូវតាមដាន និងមានចំណេះដឹងពីកម្រិតរបបអាហារដោយខ្លួនឯងជាកត្តាចម្បង។
លោកបណ្ឌិត តាន់ មុនីវណ្ណ អគ្គនាយករងក្រុមហ៊ុន ម៉ុង ឬទ្ធី គ្រុប បានលើកឡើងថា ការហាត់កីឡាមិនមែនជារឿងសាមញ្ញាពេកនោះទេ ព្រោះដើម្បីទទួលបានប្រសិទ្ធភាព យើងត្រូវហាត់ប្រាណតាំងតែពីយើងនៅជាវ័យកុមារមកម្ល៉េះ ។ ព្រោះទាំងនេះ ជាសកម្មភាពដែលតម្រូវឱ្យមានការវិនិយោគក្នុងរយៈពេលវែង មិនមែនគ្រាន់តែចង់បានលទ្ធផលថ្ងៃស្អែក ទើបចាប់ផ្តើមនៅថ្ងៃនេះនោះឡើយ ។ បើតាមលោកបណ្ឌិត តាន់ មុនីវណ្ណ ការចាប់ផ្តើមនៅក្នុងវ័យចំណាស់ពេក វាធ្វើឱ្យស្ថានភាពឆ្អឹងមិនមានភាពរឹងប៉ឹង រួមទាំងប៉ះពាល់ដល់ឆ្អឹង ឬរាងកាយក្នុងផ្អែកណាមួយ។
ជាបទពិសោធន៍ ក្នុងរយៈពេលប្រមាណ២០ឆ្នាំកន្លងមកនេះ ក្រោយពីធ្វើលំហាត់ប្រមាណទៀងទាត់ និងរបបអាហារត្រឹមត្រូវ លោកមិនដែលមានអាការៈជំងឺអ្វីឡើយ សូម្បីតែជំងឺផ្តាសាយ។
ខ្ញុំមានទម្លាប់ហាត់ប្រាណជាង៣០ឆ្នាំហើយ ទើបវាអត់ធ្វើឱ្យខ្ញុំមានអាការៈកើតជំងឺធ្ងន់ធ្ងរអ្វីទេ ហើយក្នុងរយៈពេល២០ឆ្នាំកន្លងមកនេះ ខ្ញុំគ្មានអាការៈផ្ដាសាយម្តងណាឡើយ។ ហូប ហាត់ គេង និងគិត ជាធម្មជាតិរបស់មនុស្ស គឺពិបាកនឹងធ្វើវាឱ្យត្រូវណាស់។ ដែលចំណុចទាំងអស់នេះត្រូវការមានមូលដ្ឋានគ្រឹះពីក្មេងទៅ។
បណ្ឌិត តាន់ មុនីវណ្ណ
ជាមួយគ្នានេះ លោកបណ្ឌិត តាន់ មុនីវណ្ណ ក៏បានផ្តល់ដំបូន្មានទៅដល់យុវជន ត្រូវចាប់ផ្តើមហាត់កីឡាពីពេលនេះតទៅ ហើយផលដែលទទួលបានមានដូចជា៖ សុខភាពល្អ ការគិតក៏ដូចជាបញ្ញាវាខុសអំពីមនុស្សធម្មតាបើប្រៀបទៅនឹងអ្នកដែលបានហាត់ ! ទន្ទឹមគ្នានោះ វាមិនធ្វើឱ្យសុខភាពរងសម្ពាធ ឬជំងឺនានា ហើយមិនខាតបង់ពេលវេលា ឬការចំណាយថវិកាមិនចាំបាច់ និងជំរុញឱ្យអាយុវែង។ ការហាត់ប្រាណ មិនត្រឹមតែធ្វើទៅដើម្បីឱ្យឆ្លើយតបនឹងការស្រឡាញ់សុខភាពប៉ុណ្ណោះទេ ការហាត់ដែលមានប្រសិទ្ធភាពគឺទាល់តែយើងចេះស្រឡាញ់រូបរាងខ្លួនឯងផងដែរ។
គួរបញ្ជាក់ថា ការលើកឡើងរបស់លោកបណ្ឌិត តាន់ មុនីវណ្ណ នេះ បានធ្វើឡើងនៅក្នុងកម្មវិធីសិក្ខាសាលាប្រចាំឆ្នាំរបស់សាកលវិទ្យាល័យបញ្ញាសាស្ត្រកម្ពុជា ក្រោមប្រធានបទ “Winning University Life 2024″ កាលពីពេលថ្មីៗនេះ៕
