អគ្គលេខាធិការ នៃរាជបណ្ឌិតសភាកម្ពុជា លោកបណ្ឌិត យង់ ពៅ បានមានប្រសាសន៍ថា អ្នកផលិតមាតិកាលើបណ្តាញសង្គមដែលបាន យកវិធីសាស្ត្រលេងសើច (Prank) ហួសហេតុ មកផលិតមាតិកា ដើម្បីផ្សព្វផ្សាយលក់លទ្ធផលរបស់ខ្លួន គឺបានធ្វើឱ្យប៉ះពាល់ដល់កិត្តិយស សេចក្តីថ្លៃថ្នូររបស់អ្នកដទៃ ជាពិសេសកុមារកម្ពុជាដែលខ្វះលទ្ធភាព។ លោកថា នេះជាករណីកេងចំណេញដែលគ្មានគុណធម៌ សីលធម៌ លើកុមារ ក៏ដូចជាទៅលើមនុស្សទូទៅដែរ។

លោកបណ្ឌិត យង់ ពៅ មានប្រសាសន៍ថា ជាសង្កេតឃើញរបស់លោក អ្នកដែលផលិតមាតិកាបែបនេះ គឺបានដើរហួសបន្ទាត់សិទ្ធិសេរីភាព នៃការបញ្ចេញមតិ ការប្រើប្រាស់បណ្ដាញសង្គម ព្រមទាំងបង្ហាញពីការធ្លាក់ចុះសីលធម៌នៃបុគ្គលដែលផលិតវីដេអូបែបនេះ ដែលនាំឱ្យបាត់បង់សេចក្ដីថ្លៃថ្នូរក្នុងសង្គមខ្មែរ។

បើតាមលោកអគ្គលេខាធិការ អ្នកដែលមានបំណងផលិតមាតិកាតាមបណ្ដាញសង្គម គួររៀនសូត្របន្ថែមទាក់ទងនឹងក្រមសីលធម៌វិជ្ជាជីវៈសារព័ត៌មាន និងប្រព័ន្ធផ្សព្វផ្សាយ។ ទន្ទឹមគ្នានេះ ក្រសួង សមត្ថកិច្ចពាក់ព័ន្ធ អាចអញ្ជើញម្ចាស់ផលិតមាតិកាដែលប៉ះពាល់ដល់សង្គម មកអប់រំកែលម្អដោយធ្វើកិច្ចសន្យា ហើយ​ប្រសិនបើគ្មានការអប់រំជាបន្ទាន់ ករណីបែបនេះ នឹងមានបន្តទៀត ដោយអ្នកផលិតមាតិកានោះយល់ថា ជារឿងធម្មតា។

ស្របគ្នានេះដែរ នៅថ្ងៃនេះ (២៨ កុម្ភៈ) ក្រសួងព័ត៌មាន ក៏​បានចេញ​សេចក្តីណែនាំ ទៅដល់អ្នកផលិតមាតិកាផ្សព្វផ្សាយតាមបណ្តាញសង្គម ​និងអ្នកប្រើប្រាស់បណ្តាញទំនាក់ទំនងសង្គម ឱ្យបញ្ឈប់ជាបន្ទាន់ការយកវិធីសាស្ត្រលេងសើច (Prank) មកផលិតមាតិការបស់ខ្លួនដើម្បីលក់ផលិតផលដាច់ ឬទាក់ទាញការចាប់អារម្មណ៍ ដែលបង្កផលប៉ះពាល់ដល់កិត្តិយស សេចក្តីថ្លៃថ្នូរ និងសិទ្ធិរបស់អ្នកដទៃ។

ក្រសួងព័ត៌មានបានធ្វើការ​កត់សម្គាល់ថា កាលពីពេលថ្មីៗនេះ មានអ្នកផលិតមាតិកាផ្សព្វផ្សាយតាមបណ្តាញទំនាក់ទំនងសង្គម និងអ្នកប្រើប្រាស់បណ្ដាញសង្គមមួយចំនួន បានផលិតខ្លឹមសារដោយបំពានលើក្រមសីលធម៌ និង ផ្សព្វផ្សាយនៅលើបណ្តាញទំនាក់ទំនងសង្គមដោយប្រើប្រាស់វិធីសាស្ត្រមិនស្មោះត្រង់ និងបំពានលើសិទ្ធិ សេចក្ដីថ្លៃថ្នូររបស់អ្នកដទៃ ឬប្រើប្រាស់ពាក្យពេចន៍អសុរោះ ដើម្បីទាក់ទាញការចាប់អារម្មណ៍ និងលក់ផលិតផលរបស់ខ្លួនដាច់ ដោយមិនមានការគិតគូរដល់សីលធម៌សង្គម។

ការយកវិធីសាស្ត្រលេងសើច (Prank) មកផលិតមាតិការបស់ខ្លួននេះ មិនមែនជាភាពស្មោះត្រង់ក្នុងការផលិតមាតិតាទេ ប៉ុន្តែជាការបង្កើតមាតិកាដោយខ្វះក្រមសីលធម៌ និងការទទួលខុសត្រូវ ព្រមទាំងបានបង្កើតឱ្យមានការយល់ច្រឡំ និងប៉ះពាល់ធ្ងន់ធ្ងរដល់កិត្តិយស និងសេចក្តីថ្លៃថ្នូររបស់បុគ្គល។ ក្នុងន័យនេះ ក្រសួងព័ត៌មាន​បានអំពាវនាវដល់សាធារណជន កុំចែករំលែកបន្តនូវខ្លឹមសារ ដែលមិនមានក្រមសីលធម៌ និងបំពានដល់សេចក្ដី ថ្លៃថ្នូរ និងកិត្តិយសរបស់អ្នកដទៃ និងចូលរួមទប់ស្កាត់ព័ត៌មានក្លែងក្លាយ និងមាតិកាបែបបំពុលសង្គមទាំងអស់គ្នា។

ទន្ទឹមនេះ ក្រសួងព័តមាន​ក៏​បាន​ប្រកាស​ពីការមានវិធានការផ្លូវច្បាប់ចំពោះអ្នកដែលផលិតមាតិកាមិនសមរម្យ ប្រាស់ចាកក្រមសីលធម៌ និងប្រពៃណី ទំនៀមទម្លាប់ វប្បធម៌ជាតិ និងប៉ះពាល់ដល់សីលធម៌សង្គម។

យ៉ាងណាក៏ដោយ ក្រសួងព័ត៌មាន​ក៏​លើកទឹកចិត្ត និង​កោតសរសើរ​ចំពោះអ្នកផលិតមាតិកា​តាម​បណ្តាញ​សង្គម​ភាគច្រើន ដែលបាន​គោរព​ក្រមសីលធម៌ រក្សា​បាន​នូវ​សេចក្តីថ្លៃថ្នូរ និង​គោរព​សិទ្ធិអ្នកដទៃ និង​ផ្តល់​ព័ត៌មានពិត និង​ត្រឹមត្រូវ​ជូនដល់សាធារណជន៕